Yezu Abwerera Kudzulu

Yezu agumanyikana na atowereri ace ku Galileya. Iye aapasa basa yakufunika kakamwe mbaapanga: ‘Ndokoni mukacite anyakupfundza kuna anthu a madzindza onsene. Apfundziseni toera abvere pinthu pyonsene pidakupangani ine, mbamuabatiza.’ Buluka penepo, iye aapanga: ‘Dziwani kuti ndiri na imwe ntsiku zonsene.’

Papita ntsiku 40 Yezu mbadamala kale kulamuswa muli akufa. Iye aonekera kuna anyakupfundzace azinji ku Galileya na ku Yerusalemu. Iye aapfundzisa pinthu pyakufunika kakamwe, pontho acita pirengo pizinji. Buluka penepo, aonekera kuna apostolo ace paulendo wakumalisa Paphiri ya Milivera. Iye alonga: “Lekani kubuluka mu Yerusalemu. Mbwenye pitirizani kudikhira pire pidapikira Baba.”

Apostolo ace nee abvesesa mwadidi pidalonga iye. Iwo akhanyerezera kuti Yezu mbadakhala Mambo wa Izraeli mu ndzidzi unoyu. Yezu aapanga: ‘Uno nee ndi ndzidzi unafuna Yahova toera ndikhale Mambo, mbwenye imwe munadzatambira mphambvu ya nzimu wakucena, mbamudzakhala amboni anga. Ndokoni kamwaza mphangwa ku Yerusalemu, ku Yudeya, ku Samariya mpaka ku mbuto zakutali za dziko.’

Buluka penepo, Yezu atoma kukwira kudzulu, mbaphimbirwa na makole. Anyakupfundzace apitiriza kuyang’ana kudzulu, mbwenye nee akwanisa kumuona.

Anyakupfundza abuluka Paphiri ya Milivera mbaenda ku Yerusalemu. Iwo akhagumanyikana mwakukhonda phonya mu sala yandzulu mbaphembera. Iwo akhadikhira Yezu toera aapase pitsogolero pyakuthimizirika.