Yezu Amwaza Mphangwa za Umambo

Mwakukhonda dembuka, pakumala kubatizwa, Yezu atoma kumwaza mphangwa mbalonga: ‘Umambo wa Mulungu uli cifupi.’ Anyakupfundzace akhantowera pikhamwaza iye mphangwa ku Galileya na ku Yudeya. Pidabwerera Yezu ku cisa cidabalwa iye ca Nazareti, aenda mu sinagoga, afungula mpukutu wa Izaiya mbaleri mwakugaluza: ‘Yahova andipasa nzimu wakucena toera kumwaza mphangwa zadidi.’ Thangwi yanji Yezu alonga pyenepi? Thangwi anthu akhafuna kuona Yezu mbaphatisira nzimu wakucena toera kucita pirengo. Mbwenye iye apaswa nzimu wakucena makamaka toera kumwaza mphangwa zadidi. Natenepa, iye apanga anyakubvesera: ‘Lero profesiya iyi yakwanirisika.’

Buluka penepo, Yezu aenda ku Bara ya Galileya. Kweneko iye asankhula anyakupfundza anai akuti akhali anyakumedza. Iye aacemera mbaapanga: ‘Nditowereni, ndinadzakucitisani kukhala anyakusodza anthu.’ Anyakupfundza anewa akhali Pedhru, Andreya, Tiyago na Juwau. Mwakucimbiza, iwo asiya basa yawo yakumedza mbatowera Yezu. Iwo aenda mu nzinda onsene wa Galileya mbakamwaza mphangwa za Umambo wa Yahova. Iwo amwazambo mphangwa m’masinagoga, m’mbuto za malonda na m’miseu. Nsoka ukulu wa anthu waatowera konsene kukhaenda iwo. Mphangwa zikhalonga thangwi ya Yezu zamwazika m’mbuto zonsene, ngakhale m’mbuto zakutali ninga ku Sirya.

Buluka penepo, Yezu apasa atowereri ace anango mphambvu yakuwangisa anthu na yakubulusa madimonyo. Anango akhaenda na Yezu kamwaza mphangwa nzinda na nzinda, pontho cisa na cisa. Akazi akukhulupirika ninga Mariya Madhalena, Juwana, Suzana na anango akhacita pikhakwanisa iwo toera kuphedza Yezu na anyakupfundzace.

Pakumala kupfundzisa anyakupfundzace, Yezu aatuma toera kuenda kamwaza mphangwa. Pikhamwaza iwo mphangwa mu Galileya, anthu azinji adzakhala anyakupfundza mbabatizwa. Mbwenye pakhali na anthu anango azinji akuti akhafunambo kubva mphangwa za Umambo. Ndi thangwi yace, Yezu aalandanisa na munda wakuti usafunika kubvunwa. Iye alonga: ‘Phembani Yahova kuti atumize anyabasa azinji toera kubvuna.’ Buluka penepo iye asankhula anyakupfundza 70 mbaatuma awiri-awiri toera kamwaza mphangwa mu Yudeya onsene. Iwo apfundzisa anthu a mitundu yonsene pya Umambo. Pidabwerera anyakupfundza, iwo akhafuna kakamwe kupanga Yezu thangwi ya pinthu pidacitika. Ngakhale Dyabo acimwana kupingiza basa yawo yakumwaza mphangwa.

Yezu akhali na cinyindiro cakuti angaenda kudzulu, atowereri ace mbadapitiriza kucita basa ineyi yakufunika. Iye aapanga: ‘Mwazani mphangwa zadidi pa dziko yonsene yapantsi. Pfundzisani anthu Mafala a Mulungu, mbamuabatiza.’