Kutawirwa Kwa Mibvundzo Ya Bhibhlya
Kodi ciripo cidikhiro kwa anyakufa?
Kufa ndi ninga kugona kwakuti anyakufa nkhabe kudziwa pinthu, pontho nkhabe kucita cinthu nee cibodzi. Natenepa, Nciti wa umaso anakwanisa kulamusa anyakufa. Ninga cipangizo ca pyenepi, Mulungu apasa mphambvu Yezu toera kulamusa anyakufa azinji.—Lerini Koelete 9:5; Jwau 11:11, 43, 44.
Ndi mu njira ipi kufa ndi ninga kugona?
Mulungu apikira kuti anyakufa akuti ali m’manyerezero mwace anadzalamuswa muli akufa toera kukhala mu dziko ipswa ya ulungami. Ale anafuna kudzalamuswa muli akufa asapitiriza muli akufa mpaka Mulungu angaapasa pontho umaso. Mulungu wamphambvu zonsene asafuna kakamwe kuphatisira mphambvu zace toera kulamusa anyakufa.—Lerini Yobe 14:14, 15.
Kodi kulamuswa muli akufa kunadzacitwa tani?
Mulungu angadzalamusa anthu, iwo anadzakwanisa kudzindikirika okhene, kudzindikira axamwali awo na acibale awo. Ngakhale munthu wakuti manungo ace amala kubvunda, Mulungu anadzalamusa munthu unoyu na manungo ace mapswa.—Lerini 1 Akorinto 15:35, 38.
Anthu akucepa asalamuswa muli akufa toera kakhala kudzulu. (Apokalipse 20:6) Anthu azinji anafuna kudzalamuswa muli akufa anadzakhala mu paradizu pa dziko yapantsi. Iwo anadzakhala na matomero mapswa, cidikhiro cakukhala na umaso wa kwenda na kwenda.—Lerini Masalmo 37:29; Machitiro 24:15.