KUTAWIRWA KWA MIBVUNDZO YA BHIBHLYA

Kodi Yezu Alamusadi Anthu Akufa?

Bhibhlya isalonga pakweca kuti Yezu alamusa anthu akufa. Mbiri zenezi si ninga pithankano tayu; izo zisaphataniza mbuto yandimomwene na ndzidzi udacitika ipyo. Mwacitsandzo, pa ndzidzi wa malimwe a caka 31 N. W., mwinji wa anthu ukhacita ulendo pabodzi na Yezu buluka ku Kafarnau kuenda ku nzinda wa Nayini. Mudafika iwo, agumanyikana na mwinji unango wa anthu. Imwe munakwanisa kunyindira mbiri ya pidacitika pa ndzidzi unoyu thangwi pyalembwa m’Bhibhlya, Mafala a Mulungu, pontho pyacitika pamaso pa amboni azinji.​—Lerini Luka 7:11-15.

Yezu alamusambo xamwali wace, Lazaro wakuti akhadamala ntsiku zinai munthumbi. Imwe munakwanisa kunyindira mbiri ya pidacita Yezu pa ntsiku ineyi thangwi pyaoniwambo na anthu azinji.​—Lerini Jwau 11:39-45.

Thangwi Yanji Yezu Alamusa Anthu Akufa?

Yezu alamusa anthu akufa thangwi akhakulumizwa na ntsisi. Iye acitambo pyenepi toera kupangiza kuti Babace, Nciti wa umaso akhadampasa mphambvu za kukunda kufa.​—Lerini Jwau 5:21, 28, 29.

Kulamuswa kwa anthu akufa kudacitwa na Yezu kusatipasa cinyindiro ca mapikiro ace a ntsogolo. Iye anadzalamusa anthu azinji, kuphatanizambo anthu akukhonda kulungama akuti nee akhala na mwai wakudziwa Mulungu wandimomwene. Iwo anadzakhala na mwai toera kudziwa na kufuna Yahova Mulungu.​—Lerini Machitiro 24:15.

Toera kudziwa pizinji, onani nsolo 7 wa bukhu iyi, Kodi Mwandimomwene Biblya Isapfunzisanji? yakubuluswa na Mboni za Yahova

Isagumanika mu site www.jw.org