NSOLO WA REVISTA | UTHAMBI UNACITISA ANTHU KUKHONDA KUFUNA MULUNGU

Undimomwene Unakwanisa Kukusudzulani

Ntsiku ibodzi mu Yerusalemu, Yezu akhalonga thangwi ya Babace, Yahova, mbalonga pakweca pya atsogoleri auphemberi waunthawatawa a ntsiku zace. (Jwau 8:12-30) Pidalonga iye pa ntsiku ineyi pisatipfundzisa kuti tinadinga tani pikhulupiro pyakudziwika pinalonga thangwi ya Mulungu lero. Yezu alonga: ‘Imwe mungabvera mafala anga, ndimwe anyakupfundza anga kakamwe, munadzadzindikira pya undimomwene, undimomwene unadzakusudzulani.’​—Jwau 8:31, 32.

‘Mungabvera mafala anga.’ Na mafala anewa Yezu akhazikisa n’dida toera kudinga khala pipfundziso pya uphemberi ndi ‘pya undimomwene’ peno nkhabe. Mungabva mafala analonga thangwi ya Mulungu, bvundzikani, ‘Mafala anewa asabverana na mafala a Yezu, pontho asabverana na Bhibhlya?’ Towezerani ale adabva mpostolo Paulu mbakalonga, pontho ale akuti ‘ntsiku zonsene awerenga mabukhu akucena, toera kuona ngakhala pinthu pikhapfundza iwo mphyandimomwene.’​—Machitiro 17:11.

Marco, Rosa, na Raymonde, adalongwa mu nsolo wakutoma wa revista ino, mwamphole-mphole iwo adinga pikhulupiro pyawo mu kupfundza Bhibhlya na Mboni za Yahova. Kodi iwo apfundzanji?

Marco: “Mpfundzisi wathu wa Bhibhlya akhaphatisira Malemba toera kutawira mibvundzo yonsene ikhacita ine na nkazanga. Kufuna kwathu Yahova kwatoma kukula, pontho takhala akuphatana ninga mamuna na nkazi!”

Rosa: “Pakutoma, ndanyerezera kuti Bhibhlya ikhali basi ene bukhu ya ndzeru za anthu toera kufokotoza kuti Mulungu akhala tani. Mwa pang’ono pang’ono, ndagumana matawiro a Bhibhlya a mibvundzo yanga. Cincino, Yahova ndi wandimomwene kwa ine. Iye ndi Munthu wakuti ndinakwanisa kun’nyindira.”

Raymonde: “Ndaphembera kwa Mulungu toera kundiphedza kupfundza pya iye. Mwakukhonda dembuka, ine na nkazanga tatoma kupfundza Bhibhlya. Mwandimomwene, tapfundza undimomwene wa Yahova! Tikhakomerwa kakamwe kudzindikira kuti Mulungu ali tani.”

Bhibhlya isacita pinthu pizinji kakamwe kupiringana kuikha pakweca uthambi unalonga pya Mulungu; iyo isapangiza undimomwene wa makhaliro ace akudzumisa. Iyo ndi Mafala akupumirwa, pontho isatiphedza “towera tione [kudziwa] pyonsene pidatipasa Mulungu.” (1 Akorinto 2:12) Thangwi yanji nkhabe kudinga mwekhene kuti Bhibhlya isatawira tani mibvundzo inacitwa kazinji kene thangwi ya Mulungu, cifuniro cace, na ntsogolo mwathu? Lerini matawiro a mibvundzo ineyi mu Interneti www.jw.org pantsi pa “Ensinos Bíblicos > Perguntas Bíblicas Respondidas.” Munakwanisambo kuphemba pfundziro ya Bhibhlya mu Web site peno kulonga na m’bodzi wa Mboni za Yahova. Tisanyindira kuti mungacita pyenepi, munadzaona kuti nkhabe nentsa kufuna Mulungu kupiringana pikhanyerezera imwe.