Kodi Munapereka Pinakwanisa Imwe Thangwi Ya Umambo?
“Munthu anapasa mbakomerwa napyo, Mulungu ananfuna.”—2 AKOR. 9:7.
MALEMBA TOERA KUANYEREZERA MWACIDIKHODIKHO
Kodi malemba awa asakuphedzani tani toera kudinga ntsembe zinapereka imwe thangwi ya Umambo?
1. Ndi pinthu pipi pyakuti anthu asapereka munakwanisira iwo, na thangwi yanji?
ANTHU asafuna kakamwe kupereka ninga munakwanisira iwo ku pinthu pyakufunika kwa iwo. Anyakubala asaphatisira ndzidzi wawo, kobiri, na mphambvu zawo toera kusaka udidi wa anawo. Munasendzeka axamwali awo, anapiana akuthamanga mapika akuti asaimirira dziko yawo pa masendzekero a mapika asaphatisira ndzidzi uzinji ntsiku zonsene mbakapfundza kuthamanga. Yezu aperekambo pikhakwanisa iye ku pinthu pyakuti pikhali pyakufunika kakamwe kwa iye. Iye nee asaka pinthu pya mpfuma, pontho nee akhali na ana. Mbuto mwace, iye asankhula kuikha pifuno pya Umambo pa mbuto yakutoma. (Mat. 4:17; Luka 9:58) Mu njira ibodzi ene atowereri ace asiya pizinji toera kuphedza Umambo wa Mulungu. Kuikha pa mbuto yakutoma Umambo unoyu cikhali cinthu cakufunika kakamwe kwa iwo, pontho apereka pikhakwanisa iwo toera kucita khundu mwakukwana mu kuphedza Umambo. (Mat. 4:18-22; 19:27) Panango tinakwanisa kubvundzika, ‘Ndi cinthu cipi cakufunika mu umaso wanga?’
2. (a) Ndi pinthu pipi pyakufunika kakamwe kwa Akristu onsene andimomwene? (b) Ndi pinthu pipi pinango pyakuthimizirika pyakuti anango anakwanisa kupicita?
2 Kupereka ninga munakwanisira ife ndi kwakufunika kwa Akristu onsene andimomwene, pontho ndi kwakufunika toera kukhala na uxamwali wadidi na Yahova. Pinthu pyenepi pisaphataniza kuphatisira ndzidzi wathu na mphambvu toera kuphembera, kuleri Bhibhlya, kucita kulambira kwa banja, kugumanika pa misonkhano na mu utumiki wa m’munda.a (Yos. 1:8; Mat. 28:18, 19; Aheb. 10:24, 25) Ninga maphindu a kuwangisira kwathu na nkhombo za Yahova, basa yakumwaza mphangwa isaenda kutsogolo, pontho anthu azinji asapitiriza kuenda ku ‘phiri idamangwa nyumba ya Yahova.’ (Iza. 2:2) Toera kuphedza mabasa a Umambo, azinji asapereka na asacita pinakwanisa iwo toera kutumikira ku Beteli, kuphedza basa yakumanga Nyumba za Umambo na Nyumba za Misonkhano, kusasanyira misonkhano ya gawo, peno toera kucita basa yakuphedza anthu adagwerwa na pidengwa pyacibaliro. Mabasa anewa akuthimizirika nee asacita khundu toera tiwine umaso mbwenye ndi akufunika toera kuphedza pifuno pya Umambo.
3. (a) Kodi tisaphindula tani tingapereka pinakwanisa ife thangwi ya Umambo? (b) Ndi mibvundzo ipi inafunika ife kudinga?
3 Kufunika toera kuphedza basa ya Umambo ndi kukulu kakamwe. Mphyakutsandzayisa kuona kuti azinji asafuna kakamwe kupereka pinakwanisa iwo kuna Yahova. (Lerini Masalmo 54:6.) Nzimu unoyu wakupasa usabweresa kutsandzaya kakamwe mu ndzidzi unadikhira ife kubwera kwa Umambo wa Mulungu. (Deut. 16:15; Mach. 20:35) Natenepa, ife tonsene tisafunika kudingika tekhene mwacidikhodikho. Kodi pana njira zakuti tinakwanisa kuthimizira kupereka pinakwanisa ife thangwi ya Umambo? Kodi tisaphatisira tani ndzidzi wathu, kobiri, mphambvu na maluso athu? Ndi pinthu pipi pyakuti tisafunika kucita mphole-mphole? Tendeni tidinge citsandzo cakuti tinakwanisa kucitowezera toera kupereka pinakwanisa ife mwakukhonda kukakamizwa, mbatithimizira kutsandzaya kwathu.
NTSEMBE ZIKHAPEREKWA MU ISRAELE WAKALE
4. Kodi Aisraele aphindula tani mu kupereka kwawo ntsembe?
4 Kupereka ntsembe mu Israele wakale ikhali pfuli toera kulekererwa madawo. Ntsembe zikhafunika toera mbumba itawirwe na Yahova. Ntsembe zinango zikhaphembwa; zinango zikhali zakukhonda kukakamizwa. (Lev. 23:37, 38) Ntsembe zonsene zakupiswa mbizidaperekwa ninga ntsembe zakukhonda kukakamizwa, peno ninga muoni kwa Yahova. Citsandzo cakupambulika cakupereka ntsembe cikhaoneka mwakubverana na kudzimulwa kwa templo mu ntsiku ya Salomoni.—2 Pya dziko. 7:4-6.
5. Kodi ndi masasanyiro api adacita Yahova kwa anthu akutcerenga?
5 Mwaufuni Yahova akhadziwa kuti anthu onsene nee mbadakwanisa kupereka ntsama ibodzi ene, natenepa, iye akhaphemba m’bodzi na m’bodzi mwakubverana na pikhakwanisa iye. Mwambo wa Yahova ukhalonga kuti ciropa ca cinyama cikhafunika kukhutulwa toera kukhala ‘nthunzi wa pinthu pyadidi pya kutsogolo’ kubulukira kwa Mwanace, Yezu. (Aheb. 10:1-4) Natenepa, Yahova nee akhakakamiza mu kuphatisira mwambo unoyu. Mwacitsandzo, Mulungu mbadatambira cakupereka cinango ninga nkhangaiwa ziwiri khala munthu nee akhakwanisa kupereka cinyama ca nkumbi wace. Natenepa, ngakhale anyakutcerenga mbadatsadzaya kakamwe kupereka ntsembe kwa Yahova. (Lev. 1:3, 10, 14; 5:7) Ngakhale kuti pinyama pikhaperekwa pikhali pyakusiyana, mbwenye pakhali pinthu piwiri pikhaphembwa kwa munthu onsene akhapereka ntsembe zakukhonda kukakamizwa.
6. Kodi ninji pikhaphembwa kwa munthu m’bodzi na m’bodzi angapereka ntsembe, pontho pikhali pyakufunika tani kutowezera pitsogolero pyenepi?
6 Cakutoma, munthu akhafunika kupereka pyadidi pikhakwanisa iye. Yahova apanga mbumba kuti cakupereka consene cikhafunika kukhala cadidi toera ‘kutawirwa.’ (Lev. 22:18-20) Khala cinyama cikhali na cirema, mbicidaoniwa ninga ntsembe yakukhonda kutawirika kwa Yahova. Caciwiri, munthu akhapereka ntsembe akhafunika kukhala wakucena na wakusowa midonthi. Khala munthu akhali na makhaliro akukhonda kucena, iye akhafunika kucita ntsembe ya madawo peno ntsembe ya mulando toera kukhala pontho na makhaliro adidi na Yahova mbadzati kupereka ntsembe yace yakukhonda kukakamizwa. (Lev. 5:5, 6, 15) Ineyi ikhali nkhani yakufunika kakamwe. Yahova akhadalonga kuti khala munthu ali na makhaliro akukhonda kucena acita khundu mu ntsembe yakuperekwa na mwinji, yakuti ikhaphataniza ntsembe yakukhonda kukakamizwa, iye mbadaphiwa pakati pa mbumba ya Yahova. (Lev. 7:20, 21) Mu njira inango, munthu angapereka ntsembe kwa Yahova wakuti akhali na makhaliro adidi, pontho ntsembe yace mbisowa cirema, nyakupasa mbadakomerwa na kutsandzaya.—Lerini 1 Pya dziko ya Israele 29:9.
TSEMBE ZINAPEREKWA MU NTSIKU ZINO
7, 8. (a) Ndi kutsandzaya kupi kunakhala na anthu azinji mu kupereka pinakwanisa iwo thangwi ya Umambo? (b) Kodi ndi mpfuma zipi ziri na ife?
7 Lero, anthu azinji asafunambo kakamwe kuperekeka m’basa ya Yahova, pontho Yahova asatsandzaya na pyenepi. Kuphedza abale athu ndi basa inabweresa nkhombo. M’bale m’bodzi anacita khundu m’basa yakumanga Nyumba za Umambo, pontho asaphedza ale adagwerwa na pidengwa pyacibaliro alonga kuti mphyakucimwanika kulonga kutsandzaya kunakhala na iye mu kutumikira kwace m’mabasa anewa. Iye alonga, “Kuona kutsandzaya na kupereka takhuta kwa abale na alongo apacisa angatoma kuphatisira Nyumba yawo ipswa ya Umambo peno angatambira ciphedzo pakumala kucitika cidengwa cacibaliro, basa yonsene na kuwangisira konsene ndi kwakuphindulisa kakamwe.”
8 Ndzidzi onsene, gulu ya cincino ya Yahova isasaka miyai toera kuphedza basa ya Mulungu. Mu caka 1904, M’bale C. T. Russell alemba: “Munthu onsene asafunika kupiona ninga wakuikhwa na Mbuya toera kutonga kuti anaphatisira tani ndzidzi wace, mphambvu, kobiri na pinthu pinango, pontho munthu onsene asafunika kuyesera kuphatisira maluso anewa mwakubverana na pinakwanisa iye, toera kupasa mbiri Mbuya.” Ngakhale kuti tisakhala na nkhombo zizinji, tisaphembwa toera kupereka ninga munakwanisira ife kwa Yahova. (2 Sam. 24:21-24) Kodi tinakwanisa kuphatisira mwadidi mpfuma ziri na ife?
9. Tingalonga pya kuphatisira ndzidzi wathu, ndi n’dida upi wa pitsogolero pya Yezu unagumanika pa Luka 10:2-4 wakuti tinakwanisa kuuphatisira?
9 Ndzidzi wathu. Pisaphemba ndzidzi uzinji na kuwangisira toera kuthumburuza na kudhinda mabukhu athu, kumanga Nyumba za Umambo, kusasanyira misonkhano ya gawo, kuphedza adagwerwa na pidengwa, pontho toera kucita khundu m’mabasa anango mazinji akufunika. Tiri na ndzidzi udakhazikiswa pa ntsiku. Yezu apereka n’dida wakuti unatiphedza. Mudatuma iye anyakupfundzace m’basa ya m’munda, Yezu aapanga kuti ‘pa njira lekani kumwanyika nee munthu m’bodzi.’ (Luka 10:2-4) Thangwi yanji Yezu apereka pitsogolero pyenepi? Nyakudziwisa pya Bhibhlya alonga: “Kumwanyikana pakati pa anthu akumabulukiro a dzuwa nee kukhali ninga mamwanyikiro athu, kukotama pang’ono, peno kuphatana manja, mbwenye akhaphataniza kukhumbatirana mwakubwereza-bwereza, kugodama ngakhale kukhuyisa nkhope pantsi. Pinthu pyakuti pikhakwata ndzidzi kakamwe.” Yezu nee akhawangisa atowereri ace toera kukhala akudzikuza. Mbuto mwace, iye akhaaphedza toera kuona kuti ali na ndzidzi wakucepa na asafunika kuuphatisira mwadidi toera kutsalakana pinthu pyakufunika kakamwe. (Aef. 5:16) Kodi tinakwanisa kuphatisira n’dida unoyu kuti tikhale na ndzidzi uzinji toera kuphedza mabasa a Umambo?
10, 11. (a) Kodi pyakupereka pyathu pya dziko yonsene pisaphatisirwa mu njira zipi zinango? (b) Ndi n’dida upi udalongwa pa 1 Akorinto 16:1, 2 wakuti unakwanisa kutiphedza?
10 Kobiri yathu. Ntsama ya kobiri isafunika toera kuphedza mabasa a Umambo. Pyaka pyonsene kusaphatisirwa kobiri yakukwana mamiliyau khumi a madolari toera kutsalakana ayang’aniri a cisa, a gawo, apainiya akupambulika na amisionaryo. Kutomera caka 1999, kwamangwa Nyumba za Umambo zakupiringana 24.500 m’madziko akuti ali na mpfuma zakucepa. Mbwenye, Nyumba za Umambo cifupi na 6.400 ziciri kufunika toera kumangwa. Nthanda zonsene marevista akukwana mamiliyau 100 a Ncenjezi na Despertai! asadhindwa. Basa yonsene ineyi isaphedzerwa na pyakupereka pyanu pyakufuna.
11 Mpostolo Paulu apereka n’dida toera kuutowezera tingalonga thangwi ya pyakupereka. (Lerini 1 Akorinto 16:1, 2.) Mwakupumirwa, iye awangisa abale ace a ku Korinto kuti akhonde kudikhira kumala kwa sumana toera kuona kuti ninji piri na iwo, mbwenye toera kukoya pakhundu kobiri pakutoma kwa sumana mwakubverana na pikhakwanisa iwo. Ninga mu pyaka dzana yakutoma, abale na alongo mu ndzidzi wathu asacitiratu masasanyiro a pyakupereka mwakubverana na makhaliro awo. (Luka 21:1-4; Mach. 4:32-35) Yahova asapasa ntengo nzimu unoyu wakupasa.
12, 13. Ndi pinthu pipi pyakuti panango pinacimwanisa anango toera kuphatisira mphambvu zawo na maluso awo, mbwenye Yahova anaadzaphedza tani?
12 Mphambvu zathu na maluso athu. Yahova asatiphedza mu kuwangisira kwathu toera kuphatisira mphambvu zathu na maluso athu thangwi ya Umambo. Iye apikira toera kutiphedza tinganeta. (Iza. 40:29-31) Kodi tisapibva kuti maluso athu ndi akucepa toera kuphedza mabasa a Umambo? Kodi tisanyerezera kuti pana anthu anango akuti ndi akuthema kakamwe toera kucita mabasa anewa? Kumbukani, Yahova anakwanisa kuthimizira munthu onsene maluso acibaliro ninga pidacita iye na Beselele na Olyabu.—Eks. 31:1-6; Onani cithundzithundzi cakutoma.
13 Yahova asatiwangisa toera kupereka pyadidi pinakwanisa ife tayu kukhonda. (Mis. 3:27) Mu ndzidzi ukhamangwa templo, Yahova apanga Ayuda mu Yerusalemu toera kunyerezera pikhacita iwo thangwi ya basa ya kumamanga. (Ageu 1:2-5) Iwo akhali akudzudzumika, pontho akhadaluza cifuno cawo. Tinacita mwadidi kudinga khala pinaikha ife pa mbuto yakutoma pisabverana na pifuno pya Yahova. Kodi tinakwanisa kuikha mitima yathu mu njira zathu toera kucita khundu mwakukwana m’basa ya Umambo mu ntsiku zino zakumalisa?
KUPEREKA MWAKUBVERANA NA PIRE PINA IFE
14, 15. (a) Kodi tisawangiswa tani na citsandzo ca abale athu akuti ndi akutcerenga? (b) Kodi cifuno cathu cisafunika kukhala cipi?
14 Azinji asakhala m’mbuto zakuti pinentso peno utcerengi ndi makhaliro a ntsiku na ntsiku. Gulu yathu isawangisira toera kuphedza abale athu anakhala m’madziko anewa. (2 Akor. 8:14) Ngakhale tenepa, abale akuti ali na mpfuma zakucepa asakomerwa na mwai wakupasa. Pyenepi pisatsandzayisa Yahova nyakutcerenga angapasa mwakukomerwa.—2 Akor. 9:7.
15 Mu dziko ibodzi yakutcerenga kakamwe ya mu Afrika, abale anango asalima m’munda ung’ono na asagulisa pinalima iwo mbaphatisira kobiri ineyi toera kuphedza basa ya Umambo. Mu dziko ibodzi ene, mwacitwa masasanyiro toera kumanga Nyumba ya Umambo. Abale na alongo apacisa akhafuna kakamwe kuphedza. Natenepa, basa ikhafunika kutoma mu ndzidzi wakubzwala. Nakuti akhafuna kakamwe kuphedza, iwo akhaphata basa yakumanga Nyumba ya Umambo namacibese, buluka penepo, angakotoka akhaenda kabzwala mbeu zawo. Unoyu ndi nzimu wakudzimana kakamwe! Pyenepi pisatikumbusa abale a pyaka dzana yakutoma ku Masedonya. Iwo akhali ‘akutcerenga kakamwe,’ mbwenye aphemba mwai toera kuphedza basa ikhacitwa. (2 Akor. 8:1-4) Mu njira ibodzi ene, m’bodzi na m’bodzi wa ife anakwanisa ‘kupasa pinthu ninga munaphedzwa ife na Mulungu.’—Lerini Deuteronomyo 16:17.
16. Tinakhala tani na cinyindiro cakuti pinapereka ife ndi pyakutawirika kwa Yahova?
16 Natenepa, kucita mphole-mphole ndi kwakufunika. Ninga pikhali pyandimomwene mu Israele wakale, tisafunika kukhala na cinyindiro kuti ntsembe zinapereka ife mwakukhonda kuphembwa ndi zakutawirika kwa Mulungu. Ninji mbicidakucitisani kupenula? Tisafunika kukoya kulinganira kwathu toera kutsalakana mabasa athu akufunika mwakubverana na mabanja athu na kulambira Yahova. Kupasa ndzidzi wathu na mpfuma zathu toera kuphedza anango nee kusafunika kuticitisa toera kupwaza uzimu wathu peno ukhali wadidi wa banja yathu. Tingacita pyenepi tikupasa pinthu pyakuti ife nee tiri napyo. (Lerini 2 Akorinto 8:12, Tradução do Novo Mundo.) Kusiyapo pyenepi, tisafunika kutsalakana uzimu wathu. (1 Akor. 9: 26, 27) Natenepa, khalani na cinyindiro cakuti tingaphatisira midida ya Bhibhlya pinapereka ife pinabweresa kutsandzaya na kukomerwa kakamwe kwa ife, pontho pinakhala pyakutawirika kwa Yahova.
PINAPEREKA IFE NDI PYA NTENGO UKULU
17, 18. Kodi tisapibva tani thangwi ya ale onsene anaperekeka m’basa ya Umambo, na ife tonsene tisafunika kudinganji?
17 Abale na alongo athu azinji asaperekeka okhene ninga ntsembe kubulukira m’mabasa awo toera kuphedza mabasa akufunika a Umambo. (Afil. 2:17) Mwandimomwene, tikupereka takhuta kwa ale anapangiza nzimu unoyu. Pontho, tikuperekambo takhuta kwa akazi na anapiana a abale anatsogolera mabasa a Umambo thangwi ya nzimu wawo wakupasa mwakudzala manja na wakudzimana.
18 Pana basa yakuwanga kakamwe toera kuphedza pifuno pya Umambo. Tonsene tinakwanisa kudinga kubulukira mu phembero kuti tinakwanisa tani kucita khundu ikulu m’basa ineyi. Munakwanisa kunyindira kuti nkhombo za basa ineyi ndi zikulu cincino na zinadzakhala zikulu kakamwe pa ‘ndzidzi unafuna kudza.’—Mko. 10:28-30.
[Cidzindikiro capantsi]
a Onani nsolo wakuti “Ofereçamos Sacrifícios de Toda a Alma Para Jeová” mu A Sentinela ya 15 de Janeiro de 2012, matsamba 21-25.
[Foto pa tsamba 14]
Ntsembe za pyakumwa zikhaperekwa mwakukhonda kukakamizwa ndi ninga ntsembe zinapereka ife lero (Onani ndima 7-13)
[Foto pa tsamba 14]
Amwazi mphangwa pa Nyumba ya Umambo ku Kenya, Afrika
[Foto pa tsamba 15]
Komiti yakuperekeka Yakumanga ya Cisa ku Tuxedo, Nova York, Estados Unidos
[Foto pa tsamba 15]
Piwalo pya Beteli ya Australia