ANYAKULERI ATHU ASABVUNDZA . . .

Thangwi Yanji Mulungu Asatawirisa Kuti Anyamphambvu Aponderere Anthu Akusowa Mphambvu?

Bhibhlya isalonga pya anthu angasi akusowa mphambvu adapondererwa na anyamphambvu. Nabote ndi m’bodzi wa iwo. Akabu, mambo wa Israele mu pyaka 1.000 M.N.W., atawirisa nkazace Yezabele toera kuphesa Nabote na anace ene toera mambo akwanise kukwata munda wace wa mauva. (1 Amambo 21:1-16; 2 Amambo 9:26) Thangwi yanji Mulungu atawirisa kupondererwa kweneku?

Tendeni tidinge thangwi yakufunika kakamwe: Mulungu nkhabe kulonga pyauthambi. (Tito 1:2) Pyenepi pisabverana tani na kupondererwa kwakuipa kunacitwa anyakusowa mphambvu? Kubulukira pakutoma, Mulungu acenjeza anthu kuti kukhonda kumbvera mbakudabweresa kufa. Ninga mudalongera Mulungu, anthu asathimbana na kufa kubulukira mu upanduki wa mu Edeni. Mwandimomwene, kufa kwa munthu wakutoma kwaoneka kubulukira mu kupondererwa​—pa ndzidzi udapha Kayini m’bale wace.​—Genesi 2:16, 17; 4:8.

Kubulukira pa ndzidzi unoyu, Bhibhlya isalonga pya mbiri ya anthu m’mafala awa: ‘Munthu akuponderera munthu ndzace mpaka kunfudza.’ (Koelete 8:9) Kodi pyenepi pikucitika? Yahova acenjeza dzindza ya Israele yakuti ikhali mbumba yace kuti amambo awo mbadakhala akuipa, mbacitisa anthu kukhuwa kuna Mulungu. (1 Samwele 8:11-18) Ngakhale Salomoni Mambo wandzeru, alipisa misonkho anthu ace mwakupiringana midida. (1 Amambo 11:42; 12:3, 4) Amambo akuipa ninga Akabu akhali akuipa kakamwe. Nyerezerani mphapo: Kodi Mulungu angatsidzikiza macitiro anewa akutonga mwakuipa, nee mbadapangiza kuti mafalace ndi authambi?

Kumbukanimbo kuti Sathani asalonga kuti anthu asatumikira Mulungu thangwi ya maphindu anatambira iwo. (Yobe 1:9, 10; 2:4) Kodi Mulungu angatsidzikiza atumiki ace onsene toera akhonde kupondererwa, nee mbipidapangiza kuti akuphedzera Sathani? Khala Mulungu asatsidzikiza anthu onsene toera akhonde kupondererwa, kodi iye nee mbadakhala na mulando wa uthambi ukulu? Na citsidzikizo ceneci, anthu azinji mbadatawira kuti iwo anakwanisa kutongeka okha mwakusowa citsogolero ca Mulungu. Mbwenye Bhibhlya isalonga kuti anthu nkhabe maluso toera kutongeka okhene. (Yeremiya 10:23) Ife tisafuna kuti Umambo wa Mulungu udze; natenepa uipi unadzamala.

Kodi pyenepi pisabveka kuti Mulungu nkhabe cinacita iye thangwi ya kupondererwa? Nkhabe. Dingani pinthu piwiri pinacita iye: Cakutoma, iye asapangiza pakweca uipi. Mwacitsandzo, Mafalace asalonga masasanyiro onsene akuipa adacita Yezabele toera kupha Nabote. Bhibhlya isapangizambo pakweca kuti pinthu pyenepi pyakuipa pisatsogolerwa na ntongi wamphambvu wakuti nee asafuna kuti anthu andziwe. (Jwau 14:30; 2 Akorinto 11:14) Bhibhlya isamulonga pakweca kuti ndi Sathani Dyabo. Mu kulonga pakweca uipi, kupondererwa na ale anapitsogolera, Mulungu asatiphedza toera kucalira pinthu pyakuipa. Natenepa, iye asatsidzikiza tsogolo yathu ya kwenda na kwenda.

Caciwiri, Mulungu asapereka cidikhiro cakuwanga cakuti kupondererwa kunadzamala. Njira idaphatisira iye toera kupangiza pakweca, kutonga, na kutcinyusa Akabu na Yezabele​—kuphatanizambo azinji ninga iwo, pisatipasa cinyindiro ca pikiro yace yakuti ntsiku yace iye anadzatcinyusa anyakuipa. (Masalmo 52:1-5) Mulungu asatipasambo cidikhiro cakuwanga cakuti mwakukhonda dembuka iye anadzacinja makhaliro akuipa kwa ale ananfuna.a Natenepa, Nabote munthu wakukhulupirika pabodzi na anace anadzakhala na mwai wakukhala mu paradizu pa dziko yapantsi kwenda na kwenda mwakusowa uipi.—Masalmo 37:34.

[Cidzindikiro capantsi]

[Ntsonga zikulu pa tsamba 31]

‘Munthu akuponderera munthu ndzace mpaka kunfudza.’​—Koelete 8:9