Tinatawira Tani ‘Munthu Onsene’?
‘Mafala anu adzipe ninga munyu, mbamudziwa kuti munatawira tani munthu onsene na mafala adidi.’—AKOL. 4:6.
MBAMUDATAWIRA TANI?
Thangwi yanji tisafunika kuphatisira mibvundzo yadidi toera kuphedza anyakubvesera athu kukhala akusudzuka?
Ninji pinafuna kutiphedza toera kunyerezera mwacidikhodikho pinalonga Bhibhlya?
Tinakwanisa tani kuphatisira misangani yadidi mu utumiki wathu?
1, 2. (a) Longani cakugumana naco cinapangiza ntengo wakucita mibvundzo yadidi. (Onani cithundzithundzi cakutoma.) (b) Thangwi yanji nee tisafunika kugopa kudinga ntsonga zakunentsa?
MU PYAKA pizinji pidapita, mulongo unango akhacedza pya Bhibhlya na mamunace wakukhonda khulupira. Kale iye akhali ciwalo ca Uphemberi Waunthawatawa. Mukhacedza iwo, mamunace alonga kuti akhakhulupira pya Utatu. Mu kudzindikira kuti panango iye nee akhadziwa kuti cipfundziso ca Utatu cisabvekanji, mwaluso mulongo ambvundza, “Musakhulupira kuti Mulungu ndi Mulungu, kuti Yezu ndi Mulungu, pontho nzimu wakucena ndi Mulungu; mwa iwo nee ndi Alungu atatu, mbwenye ndi Mulungu m’bodzi basi?” Mwakukhonda dikhira mamunace atawira, “Nkhabe, nee ndisakhulupira pyenepi!” Ninga maphindu, iwo acedza mwadidi pya nkhani yakuti mwandimomwene Mulungu mbani.
2 Cakugumana naco ceneci cisapangiza ntengo wakucita mibvundzo yadidi mwaluso. Cisagomezerambo ntsonga yakufunika kakamwe: Nee tisafunika kugopa kudinga ntsonga zakunentsa ninga, cipfundziso ca Utatu, djenje ya moto, peno kukhalapo kwa Nciti. Tinganyindira Yahova na cipfundziso cinatipasa iye, tinakwanisa kupereka matawiro adidi, akuti anakwanisa kukhuya mitima ya anyakubvesera athu. (Akol. 4:6) Cincino, tendeni tidinge kuti atumiki aluso asacitanji munadinga iwo ntsonga zenezi. Tinadzadinga kuti (1) tinacita tani mibvundzo toera kucitisa munthu kukhala wakusudzuka, (2) kunyerezera mwacidikhodikho pinalonga Bhibhlya, na (3) kuphatisira misangani toera kubvekesa ntsonga.
CITANI MIBVUNDZO INACITISA ANYAKUBVESERA KUKHALA AKUSUDZUKA
3, 4. Thangwi yanji mphyakufunika kuphatisira mibvundzo toera kudzindikira pinakhulupira munthu? Perekani citsandzo.
3 Mibvundzo inatiphedza toera kudzindikira pinakhulupira munthu. Thangwi yanji mphyakufunika? Lemba ya Misangani 18:13 isalonga: ‘Anatawira mbadzati kupibvesa mwadidi asapangiza kuti ndi dzemwa, mbapaswa manyadzo.’ Ndimodi, mbatidzati kupangiza kuti Bhibhlya isalonganji pa ntsonga inadinga ife, mphyadidi kusaka kudziwa kuti nyakubvesera wathu asakhulupiranji. Thangwi panango, tinabvunga ndzidzi uzinji mu kuyesera kufokotoza ntsonga yakuti panango nyakubvesera nee asaikhulupira!—1 Akor. 9:26.
4 Nyerezerani kuti tikucedza na munthu pya nkhani ya djenje ya moto. Si onsene tayu anakhulupira kuti djenje ndi mbuto yandimomwene inathabuswa anthu akuipa na moto. Azinji asakhulupira kuti djenje ineyi isabveka kukhonda tawirwa na Mulungu. Natenepa, mphyadidi kulonga tenepa: “Nakuti anthu ali na maonero akusiyana thangwi ya djenje ya moto, ndisafuna kudziwa maonero anu?” Pakumala kubva ntawiro wace, tinakwanisa kukhala akukhunganyika mwadidi toera kumphedza kubvesesa pinalonga Bhibhlya thangwi ya ntsonga ineyi.
5. Kodi mibvundzo inatiphedza tani toera kudzindikira thangwi inacitisa munthu kukhulupira cinthu?
5 Mibvundzo yadidi inatiphedzambo toera kudzindikira thangwi inacitisa munthu kukhulupira cinthu. Mwacitsandzo, ndiye tani khala tagumana munthu mu utumiki mbalonga kuti nee asakhulupira Mulungu? Mphyakukhonda nentsa kunyerezera kuti panango ali na maonero anewa thangwi ya pidapfundza iye kuxikola, ninga cipfundziso ca kusanduka kwa pinthu. (Sal. 10:4) Mbwenye anthu azinji asiya kukhulupira Mulungu thangwi ya nyatwa zizinji zidaona iwo peno zidatamba iwo. Thangwi ya nyatwa zenezi, pisanentsa kwa iwo kutawira kuti alipo Nciti waufuni. Natenepa, mwanaciro nyumba angapenula kukhalapo kwa Mulungu, tisafunika kubvundza, “Kodi ndzidzi onsene musanyerezera tepo?” Angalonga kuti nkhabe, tisafunika kubvundzisa khala ciripo cidancitisa kupenula kuti Mulungu alipo. Ntawiro wace unatiphedza kuona njira yadidi toera kumphedza mwauzimu.—Lerini Misangani 20:5.
6. Tisafunika kucitanji pakumala kucita mbvundzo?
6 Pakumala kucita mbvundzo, tisafunika kubvesera mwadidi ntawiro wa munthu na kulemedza mabvero ace. Mwacitsandzo, panango munthu analonga kuti thangwi ya cidengwa, nee asatawira kuti alipo Nciti waufuni. Mbatidzati kupereka cipangizo cakuti Mulungu alipo, mphyadidi kupangiza citsalakano kuna munthu unoyu, na kumphedza kudziwa kuti si pyakuipa tayu kusaka kudziwa thangwi yanji tisathabuka. (Aheb. 1:2, 3) Kupirira kwathu na malongero athu aufuni anakwanisa kunkhuya toera kufuna kudziwa pizinji.a
NYEREZERANI MWACIDIKHODIKHO PINALONGA BHIBHLYA
7. Kodi kupembera kwathu mu utumiki kusanyindiranji?
7 Cincino tendeni tione kuti tinanyerezera tani mwacidikhodikho pinalonga Bhibhlya. Mwandimomwene, Bhibhlya ndi feramentu yathu ikulu mu utumiki. Iyo isatiphedza kukhala ‘akuthema toera kucita mabasa adidi onsene.’ (2 Tim. 3:16, 17) Kupembera kwathu mu utumiki kazinji kene nee kusanyindira kunjipa kwa malemba analeri ife, mbwenye kusanyindira njira inanyerezera ife mwacidikhodikho na kufokotoza malemba anewa. (Lerini Machitiro 17:2, 3.) Ninga citsandzo, onani makhundu matatu anatowerera.
8, 9. (a) Ndi ipi njira ibodzi yakunyerezera mwacidikhodikho na munthu anakhulupira kuti Yezu ndi sawasawa na Mulungu? (b) Ndi api maonero anango a ntsonga ineyi anaona imwe kukhala akuphindulisa?
8 Khundu 1: Mu utumiki wathu, tingagumana munthu anakhulupira kuti Yezu ndi sawasawa na Mulungu. Tinaphatisira malemba api toera kunyerezera naye mwacidikhodikho? Tinamphemba toera kuleri Jwau 6:38, inapangiza mafala adalonga Yezu kuti: “Ine ndatchitha kudzulu si towera ndichite pinafuna ine tayu, mbwenye pinafuna uyu adandituma.” Pakumala kuleri vesi ineyi, tinakwanisa kumbvundza: “Khala Yezu ndi Mulungu, mbani adantuma buluka kudzulu kudza pantsi pano? Kodi Munthu unoyu nee mbadakhala nkulu kupiringana Yezu? Mwandimomwene, nyakutuma ndi nkulu kupiringana ule adatumwa.”
9 Na maonero anewa, tinakwanisambo kuleri Afilipi 2:9. Penepa mpostolo Paulu asafokotoza kuti Mulungu acitanji pidafa Yezu mbalamuswa muli akufa. Vesi ineyi isalonga: “Mulungu ankuza kakamwe [Yezu], mbanthula dzina yakupiringana madzina anango onsene.” Toera kuphedza munthu kubvesesa lemba ineyi, tinakwanisa kumbvundza: “Khala mbadzati kufa, Yezu akhali sawasawa na Mulungu, buluka penepo Mulungu ankuza kakamwe, pyenepi nee mbipidacitisa Yezu kukhala wankulu kupiringana Mulungu? Mphapo, pinacitika tani kuti munthu unango akhale wankulu kupiringana Mulungu?” Khala iye asalemedza Mafala a Mulungu, pontho ndi wa ntima wadidi, maonero anewa anankulumiza toera kudinga ntsonga ineyi mwakuthimizirika.—Mach. 17:11.
10. (a) Tinanyerezera tani mwacidikhodikho na munthu anakhulupira pya djenje ya moto? (b) Ndi maonero api anaona imwe kukhala akuphindulisa pakudinga pya djenje ya moto?
10 Khundu 2: Khala mwanaciro nyumba nee asatawira kuti anthu akuipa nkhabe kudzathabuswa kwenda na kwenda mu djenje ya moto. Panango iye asakhulupira pya djenje ya moto thangwi asafuna kuti anthu akuipa atcinyuswe thangwi ya pyakuipa pinacita iwo. Tinanyerezera tani mwacidikhodikho na munthu wakuti ali na maonero anewa? Pakutoma, tisafunika kumpasa cinyindiro cakuti anthu akuipa anadzatcinyuswa. (2 Ates. 1:9) Buluka penepo, tinakwanisa kumphemba toera kuleri lemba ya Genesi 2:16, 17 inapangiza kuti ntengo wakulipa madawo ndi kufa. Tisafunika kunfokotozera kuti thangwi ya kudawa, Adhamu acitisa kuti anthu onsene abalwe m’madawo. (Arom. 5:12) Tinakwanisambo kupangiza kuti Mulungu nee alonga pya kutcinyuswa n’djenje ya moto. Buluka penepo tinakwanisa kubvundza: “Khala Adhamu na Eva akhali pangozwi ya kutcinyuswa kwenda na kwenda, nee mbapidakhala pyadidi kuacenjeza pyenepi?” Buluka penepo, tinakwanisa kuleri lemba ya Genesi 3:19 inapangiza mafala akutonga kwa Mulungu pakumala kudawa kwa Adhamu na Eva, penepa nee palongwa fala ya djenje ya moto. Mbuto mwace, Adhamu apangwa kuti mbadabwerera ku pfumbi. Tinakwanisa kumbvundza: “Kodi mbapidakhala pya cilungamo kupanga Adhamu kuti mbadabwerera ku mataka khala mwandimomwene iye mbadaenda ku djenje ya moto?” Khala iye ndi wa maonero adidi, mibvundzo ineyi inamphedza toera kunyerezera mwakuzika kakamwe pya nkhani ineyi.
11. (a) Ndi ipi njira ibodzi yakunyerezera mwacidikhodikho na munthu anakhulupira kuti anthu adidi onsene anaenda kudzulu? (b) Ndi maonero api anaona imwe kukhala akuphindulisa pakudinga pya kuenda kudzulu?
11 Khundu 3: Mu utumiki wathu, tingagumana munthu anakhulupira kuti anthu adidi onsene anaenda kudzulu. Maonero anewa asakhuya njira inabvesesa mwanaciro nyumba Bhibhlya. Mwacitsandzo, nyerezerani kuti tikudinga naye Apokalipse 21:4. (Lerini) Panango iye ananyerezera kuti nkhombo zinalongwa pa vesi ineyi zisaphataniza umaso wakudzulu. Tinanyerezera tani naye mwacidikhodikho? Mbuto mwakuleri malemba anango, tisafunika kugomezera ntsonga zinalongwa mu lemba ineyi. Iyo isalonga kuti “kufa hakunadzakhalapo pontho tayu.” Tinakwanisa kumbvundzisa khala iye asatawira kuti toera cinthu cikhonde kuoneka pontho, cisafunika kuoneka pakutoma. Panango iye anatawira pyenepi. Buluka penepo, tinakwanisa kufokotoza kuti kufa cipo kwaoneka kudzulu; anthu asafa pantsi pano. Natenepa, lemba ya Apokalipse 21:4 isapangiza nkhombo za ntsogolo zinafuna kudzaoneka pa dziko yapantsi.—Sal. 37:29.
PHATISIRANI MISANGANI TOERA KUBVEKESA NTSONGA.
12. Thangwi yanji Yezu aphatisira misangani?
12 Pabodzi na mibvundzo, Yezu akhaphatisira misangani m’basa yace yakumwaza mphangwa. (Lerini Mateo 13:34, 35.) Misangani ya Yezu ikhaphedza toera kupangiza khala anyakubvesera ace akhali na cifuno candimomwene. (Mat. 13:10-15) Yezu aphatisirambo misangani toera kulonga mafala akukhuya ntima na kuphedza anthu kukumbukira pipfundziso pyace. Tinakwanisa tani kuphatisira misangani pakupfundzisa?
13. Tinaphatisira citsandzo cipi toera kubvekesa kuti Mulungu ndi nkulu kupiringana Yezu?
13 Kazinji kene mphyadidi kuphatisira misangani yakukhonda nentsa. Mwacitsandzo, khala tisafuna kupangiza kuti Mulungu ndi nkulu kupiringana Yezu, tinakwanisa kuyesera citsandzo ici: Pakutoma, tinakwanisa kulonga kuti Mulungu na Yezu alonga pya uxamwali wawo ninga wa Baba na Mwana. (Luka 3:21, 22; Jwau 14:28) Buluka penepo, tinakwanisa kubvundza mwanaciro nyumba: “Khala musafuna kundipangiza kuti anthu awiri ndi sawasawa, mbamudaphatisira kulandana kupi kwa anthu a pabanja toera kubvekesa ntsonga ineyi? Panango iye anaphatisira aphale peno atsikana awiri akuti ndi ubale wawo—peno ana a mamphasa. Angatawira pyenepi, tinakwanisa kulonga kuti kulandanisa kweneku ndi kwakuthema kakamwe. Buluka penepo, tinakwanisa kubvundza: “Khala ife tisabvesesa mwadidi kulandanisa kweneku, thangwi yanji Yezu, wakuti ndi Mpfundzisi Wankulu nee mbadaphatisirambo kulandanisa kweneku? Mbuto mwace, iye alonga kuti Mulungu ndi Babace. Natenepa, Yezu apangiza kuti Mulungu ndi wankulu, pontho ali na utongi ukulu kupiringana wace.”
14. Ndi citsandzo cipi cinapangiza kuti nee mbipidakhala pyakuthema kuti Mulungu acitise Dyabo kuthabusa anthu mu djenje ya moto?
14 Onani citsandzo cinango. Anango asalonga kuti Sathani ndiye “anaonera” djenje ya moto. Citsandzo ceneci cinaphedza nyakubala toera kubvesesa kuti mphyakukhonda thema kuti Mulungu atawirise Dyabo kuthabusa anthu mu djenje ya moto. Tinakwanisa kulonga: “Nyerezerani kuti mwananu acinja mbakhala wakupanduka kakamwe, mbatoma kucita pinthu pizinji pyakuipa. Mbamudacitanji?” Panango analonga kuti mbadayesera kulanga mwanace. Mwakubwereza-bwereza iye mbadayesera kuphedza mwanace toera asiye kucita pinthu pyakuipa. (Mis. 22:15) Pa ntsonga ineyi tinakwanisa kubvundza nyakubala kuti mbadacitanji khala mwanace nee atawira ciphedzo consene cidapereka iye. Anyakubala azinji mbadalonga kuti nee mbadacita cinango kusiyapo kutcinyusa mwanace. Natenepa tinakwanisa kubvundza: “Ndiye tani mungadzindikira kuti munthu wakuipa ndiye adanyengerera mwananu toera kukhala wakupanduka?” Mwakukhonda penula, nyakubala mbadaipirwa na munthu unoyu. Toera kubvekesa ntsonga ya citsandzo ceneci, tinakwanisa kubvundza nyakubala: “Kudziwa kuti munthu wakuipa ndiye adanyengerera mwananu, mbamudaphemba munthu unoyu toera kutcinyusa mwananu?” Mwakukhonda penula iye nee mbadatawira pyenepi. Mu njira ibodzi ene, Mulungu nee mbadaphemba Sathani toera kutcinyusa anthu abodzi ene adanyengererwa na Diyabo toera kucita pinthu pyakuipa!
PITIRIZANI NA MAONERO AKULINGANIRA
15, 16. (a) Thangwi yanji nee tisafunika kudikhira kuti onsene anacedza na ife anadzatawira mphangwa za Umambo? (b) Kodi tisafunika kukhala aluso kakamwe toera kupfundzisa mwadidi? Fokotozani. (Onanimbo bokosi “Feramentu Toera Kutiphedza Kutawira.”)
15 Ife tisadziwa kuti si onsene tayu anacedza na ife anadzatawira mphangwa za Umambo. (Mat. 10:11-14) Pyenepi pinacitika, maseze ticite mibvundzo yadidi, kunyerezera mwacidikhodikho na anthu, peno kuphatisira misangani yadidi kakamwe. Maseze Yezu akhali Mpfundzisi Wankulu, ndi anthu akucepa adatawira pipfundziso pyace!—Jwau 6:66; 7:45-48.
16 Munjira inango, maseze tione kuti nee ndife apfundzisi aluso kakamwe, tinakwanisa kucita mwadidi utumiki wathu. (Lerini Machitiro 4:13.) Mafala a Mulungu asatipasa cinyindiro cakukwana toera kunyindira kuti ‘onsene akuti ali na cifuno cakukhala na umaso wakukhonda mala’ anadzatawira mphangwa zadidi. (Mach. 13:48) Natenepa, tendeni tikulise na kupitiriza kukhala na maonero akulinganira thangwi ya ife ene, pabodzi na ale anasaka ife kumwazira mphangwa zadidi za Umambo. Tendeni tibandze miyai yonsene ya cipfundziso cinapereka Yahova kwa ife, mbatinyindira kuti cipfundziso ceneci cinadzaphindulisa ife pabodzi na ale anatibvesera. (1 Tim. 4:16) Yahova anakwanisa kutiphedza toera kuona kuti ‘tinatawira tani munthu onsene.’ Ninga pinafuna ife kuona mu nsolo unafuna kudza, njira ibodzi toera kupembera mu utumiki wathu ndi kutowezera ntemo unacemerwa N’dida wa Ndalama.
[Cidzindikiro capantsi]
a Onani nsolo wakuti, “É possível desenvolver fé num Criador?” mu A Sentinela de 1.° de Outubro de 2009.
[Bokosi pa tsamba 12]
Feramentu Toera Kutiphedza Kutawira
Pitsandzo pizinji pidadingwa mu nsolo uno ndi pyakubverana na mphangwa zidabuluswa kale m’misolo yakuti “Uma conversa sobre a Bíblia.” Misolo ineyi isabuluswa mukupita kwa ndzidzi mu Ncenjezi wa anthu onsene.b
Mulongo unango adaphedzeka na misolo ineyi mu utumiki wace alemba: “Kubulukira m’misolo iyi, ndisapfundza kuti ndinacita tani mibvundzo yadidi, ndinaphedza tani anthu toera kubvesesa mwadidi, pontho kuti ndinaphatisira tani matawiro awo toera kunyerezera nawo mwacidikhodikho.” Iye alonga kuti ndzidzi onsene pisakhala pyakukhonda nentsa kupfundza pizinji angapangizwa kuti anacita tani cinthu, misolo ineyi isamphedza kucita pyenepi.
Misolo ineyi ndi njira ibodzi ya masasanyiro anatipasa Yahova toera kutiphedza kukwanirisa basa yakufunika kakamwe idatipasa iye toera kucita. (Sal. 32:8) Tisapereka takhuta kakamwe thangwi iye asatipasa pinafuna ife toera kukwanirisa utumiki wathu!
[Cidzindikiro capantsi]
b Mpaka pano, misolo iyi yabuluswa kale: “O Que é O Espírito Santo?” (1.° de Outubro de 2010); “Jesus é Deus?” (1.° de Abril de 2012); “Todas As Pessoas Boas Vão Para O Céu?” (1.° de Agosto de 2012); “Deus Pune As Pessoas No Inferno?” (1.° de Outubro de 2012); “Deus Se Importa Com Nosso Sofrimento?” (1.° de Julho de 2013); na “Porque Deus Permite o Sofrimento?” (1.° de Janeiro de 2014).