KUTAWIRWA KWA MIBVUNDZO YA BHIBHLYA

Thangwi Yanji Tisafunika Kucita Phembero?

Yahova Mulungu asafuna kuti tikhale akusudzuka toera kulonga na iye ndzidzi onsene thangwi ya pinthu pinatidzudzumisa. (Luka 18:1-7) Iye asatibvesera thangwi asatitsalakana. Nakuti Babathu wakudzulu asaticemera na ntima onsene toera kucita phembero, mphyadidi kwa ife kutawira ncemerero wace.​—Lerini Afilipi 4:6.

Phembero si njira toera kuphemba ciphedzo basi tayu. Mbuto mwace, phembero isatiphedza toera kufendedzera cifupi Mulungu. (Masalmo 8:3, 4) Tingalonga na Mulungu mwakukhonda phonya mbatipangiza mabvero athu, tisakhala na uxamwali wakuwanga na iye.​—Lerini Tyago 4:8.

Tisafunika Kuphembera Tani?

Tingacita phembero, Mulungu nee asafuna kuti tiphatisire mafala akudzumisa peno kubwerezera mafala a maphembero akulembwa. Nee tisafunikambo kusaka njira yakukhala toera kucita phembero. Yahova asatiphemba toera kucita phembero yakubulukira muntima. (Mateo 6:7) Mwacitsandzo, mu Israele wakale, Yana acita phembero thangwi ya nyatwa yakutsukwalisa ikhathimbana na iye pabanja. Mukupita kwa ndzidzi, mudacinja kutsukwala kwace kudza kutsandzaya, iye acita phembero toera kupereka takhuta kuna Mulungu.​—Lerini 1 Samwele 1:10, 12, 13, 26, 27; 2:1.

Ndi mwai wadidi tani uli na ife! Ife tinakwanisa kufendedzera Mulungu toera kulonga pinatidzudzumisa. Tinakwanisambo kunsimba na kupereka takhuta thangwi ya pinaticitira iye. Mwandimomwene, nee tisafunika kupwaza mwai unoyu wa ntengo ukulu kakamwe.​—Lerini Masalmo 145:14-16.

Toera kudziwa pizinji, onani nsolo 17 wa bukhu iyi, Kodi Mwandimomwene Bhibhlya Isapfundzisanji?, Kutawirwa Kwa Mibvundzo Ya Bhibhlya yaubuluswa na Mboni za Yahova

Isagumanika mu site www.jw.org