NSOLO WA REVISTA | KODI MULUNGU ASAKUTSALAKANANI?

Mulungu Asadziwa Makhaliro Anu

‘Yahova, mwandiyesera mbamundidziwiratu.’​—MASALMO 139:1.

THANGWI YANJI ANANGO ASAPENULA: Anthu azinji asanyerezera kuti Mulungu asaona anthu ninga anyakudawa​—anthu akupswipa pamaso pace, akuti nee athema kutsalakanwa na iye. Kendra, wakuti athimbana na kutsoperwa, akhapasika mulando kakamwe thangwi nee akhakwanisa kutowezera mwakukwana midida ya Mulungu. Pakumalisa iye alonga: “Ndasiya kucita phembero.”

MAFALA A MULUNGU ASAPFUNDZISANJI: Yahova asaona pizinji kupiringana kusowa kwanu ungwiro, iye asadziwa mwadidi kuti ndimwe ani. Bhibhlya isalonga kuti iye “asadziwa kuti tachitwa nanji; asanyerezera kuti ndife mataka basi.” Cinthu cakufunika kakamwe ndi cakuti iye “hanachita na ife tayu ninga mudadawira ife,” mbwenye tingatcinyuka iye asabvera ntsisi mbatilekerera.​—Masalmo 103:10, 14.

Onani citsandzo ca Dhavidhi, mambo wa Israele adalongwa mu nsolo wakutoma wa revista ino. Mu phembero idacita iye kuna Mulungu, Dhavidhi alonga: ‘Mwandiona mbandidzati kubalwa; mukhadalemba kale m’bukhu mwanu makhundu onsene a moyo wanga . . . Mulungu, mundisake mbamuona ntima wanga.’ (Masalmo 139:16, 23) Inde, Dhavidhi akhanyindira kuti maseze midzidzi inango akhadacita madawo makulu, Yahova mbadadzindikira kutcinyuka kwace na ntima onsene.

Yahova asakudziwani mwadidi kakamwe kupiringana munthu onsene. ‘Munthu asaona pyakunja basi, mbwenye Yahova asaona pya muntima.” (1 Samwele 16:7) Mulungu asadziwa kuti thangwi yanji imwe musacita pinthu munjira inacitira imwe​—ndanda yanu, makhaliro adakuzwa imwe, makhaliro a cisa cinakhala imwe, na makhaliro onsene a umaso wanu. Iye asaona mbapasa ntengo kuwangisira kunacita imwe toera kukhala munthu wadidi, maseze musadodoma.

Mphapo, Mulungu asaphatisira tani kubvesesa kwace ‘makhaliro anu’ toera kukubalangazani?