NSOLO WA REVISTA | MUNAKWANISA KUKHALA NA UXAMWALI NA MULUNGU

Kodi Imwe Musalonga na Mulungu?

Axamwali andimomwene, asacedza mukuphatisira ntokodzi, kutumiza e-mail, kuphatisira vidyu, peno kutumiza matsamba, mwakubverana na makhaliro awo. Natenepa, toera kukhala na uxamwali na Mulungu, tisafunika kulonga na iye mwakukhonda phonya. Mphapo, tinacita tani pyenepi?

Tinakwanisa kulonga na Yahova kubulukira mu kucita phembero. Mbwenye kucita phembero kuna Mulungu, kwasiyana na kucedza na xamwali wa thunga ibodzi ene. Tisafunika kudzindikira kuti mu ndzidzi unacita ife phembero, tikulonga na Nciti wathu Wankulu Kakamwe wakudzulu na pantsi. Pyenepi pisafunika kutikulumiza toera kucita phembero na cilemedzo cikulu kakamwe. Toera maphembero athu abviwe na Mulungu, tisafunika kucita pinatiphemba Mulungu. Ipi ndi pitatu mwa pinthu pyenepi.

Cakutoma, maphembero asafunika kucitirwa Yahova Mulungu basi​—tayu Yezu, “anthu akucena” peno madzimunthu. (Eksodo 20:4, 5) Bhibhlya isalonga mwakubveka kuti: Pakucita “maphembero, pa kudembetera, pa kucitambo takhuta mudziwise Mulungu pinthu pyanu pyonsene.” (Afilipi 4:6) Caciwiri, maphembero asafunika kucitwa mu dzina ya Mwana wa Mulungu, Yezu Kristu. Yezu afokotoza: “Nkhabepo munthu m’bodzi anafika kuna Baba mbakhonda kupita pana ine.” (Jwau 14:6) Cacitatu, maphembero athu asafunika kucitwa mwakubverana na cifuno ca Mulungu. Bhibhlya isalonga: ‘Tinakhulupira Mulungu kuti iye anatibvera, tingamphemba pinthu ninga munafunira iye.’a​—1 Jwau 5:14.

Mwandimomwene, uxamwali nee mbudapitiriza kukhala wakuwanga khala ndi munthu m’bodzi basi analonga ndzidzi onsene. Ninga axamwali asatsandzaya angapasirana maonero unango na ndzace, ife tisafunika kutawirisa kuti Mulungu alonge na ife, pontho tisafunika kumbvesera angalonga. Kodi musadziwa kuti Mulungu asalonga tani na ife?

Lero, Yahova Mulungu “asalonga” na ife kubulukira m’Mafalace akulembwa, Bhibhlya. (2 Timoti 3:16, 17) Thangwi yanji tisalonga tenepo? Mwacitsandzo: Nyerezerani kuti mwatambira tsamba idabuluka kuna xamwali wanu wapantima. Pakumala kuileri, mwakukomerwa imwe musalonga kuna anango: “Ndamala kubva mphangwa za xamwali wanga!” Mbwenye xamwali wanu nee akhali pana imwe, ngakhale tenepo, imwe mwabva pya iye kubulukira m’mphangwa za kulemba. Munjira ibodzi ene, kubulukira mu kuleri Bhibhlya, imwe musatawirisa kuti Yahova alonge na imwe. Na thangwi ineyi, Gina adalongwa mu nsolo wakutoma, alonga: “Ndisaona kuti khala ndisafuna kuti Mulungu andione ninga xamwali, ndisafunika kudinga tsamba idatilembera iye​—Bhibhlya.” Iye athimiza: “Kuleri Bhibhlya ntsiku zonsene kwandicitisa kukhala cifupi na Mulungu.” Kodi musatawirisa kuti Yahova alonge na imwe ntsiku zonsene kubulukira mu kuleri Mafalace, Bhibhlya? Mungacita pyenepi, pinadzakuphedzani toera kubva kuti muli cifupi na Mulungu.

[Cidzindikiro capantsi]