Munakwanisa Kukhala Na Uxamwali Na Mulungu? — BHIBHLIYOTEKA MU INTERNETI ya Torre de Vigia

NSOLO WA REVISTA | MUNAKWANISA KUKHALA NA UXAMWALI NA MULUNGU

Munakwanisa Kukhala Na Uxamwali Na Mulungu?

“Kukhala na uxamwali wapantima na Mulungu kusacitisa munthu kubva kuti ali wakutsidzikizika, wakukwana, na wakuwanga. Pisakhala ninga Mulungu akusaka kucita pinthu pyadidi kuna iwe ndzidzi onsene.”—CHRISTOPHER, MPHALE ANAKHALA KU GANA.

“Mulungu asakuonani mu nyatwa zanu zonsene, mbapangiza ufuni wace ukulu kwa imwe na citsalakano, kupiringana pire pyakuti mbamudakwanisa kupiphemba.”—HANNAH, NTSIKANA WA PYAKA 13 PYAKUBALWA, KU ALASKA, E.U.A.

“Ndi mabvero akufunika kakamwe na akutsandzayisa kudziwa kuti unakwanisa kukhala na uxamwali na Mulungu!”—GINA, NKAZI WA KU JAMAIKA ALI NKATI MWA PYAKA 40.

Christopher, Hannah, na Gina, siwo basi tayu ali na mabvero anewa. Anthu azinji pa dziko yonsene yapantsi ali na cinyindiro cakuti Mulungu asaaona ninga axamwali. Ndiye tani kwa imwe? Musaona kuti muli na uxamwali na Mulungu? Peno musafuna kukhala na uxamwali na Mulungu? Panango munabvundza: ‘Pinakwanisikadi kuti munthu pyace akhale na uxamwali na Mulungu Wamphambvu Zonsene? Khala pinakwanisika, munjira yanji?’

MPHYAKUKWANISIKA KUKHALA NA UXAMWALI NA MULUNGU

Mwakubverana na Bhibhlya, mphyakukwanisika kukhala na uxamwali wapantima na Mulungu. Bhibhlya isalonga kuti Mulungu acemera Abrahamu ninga “xamwali wanga.” (Izaiya 41:8) Onanimbo ncemerero waufuni udalembwa pa Tyago 4:8: “Fendedzerani Mulungu, tenepa Mulungu anadzakufendezeranimbo.” Natenepa, pisaoneka pakweca kuti mphyakukwanisika kukhala na uxamwali wapantima na Mulungu. Mbwenye nakuti Mulungu nkhabe kuoneka, munakwanisa tani “kufendedzera” kuna iye mbamukhala na uxamwali wadidi na iye?

Toera kutawira mbvundzo unoyu, onani njira zingasi zinaphatisira anthu toera kukulisa uxamwali. Kazinji kene uxamwali usatoma na kudziwana madzina kwa anthu awiri. Buluka penepo, munapitiriza iwo kucedza mwakukhonda phonya, mbapasirana maonero na mabvero, uxamwali wawo usakula. Munawangisira iwo toera kucita pinthu pabodzi pene, kuwanga kwa uxamwali wawo kusathimizirika. Pyenepi ndi sawasawa na kukulisa uxamwali wapantima na Mulungu. Tendeni tidinge pyenepi.