NSOLO WA REVISTA | MUNAKWANISA KUKHALA NA UXAMWALI NA MULUNGU

Kodi Musacita Pinaphemba Mulungu?

“Pyonsene pinafuna imwe, ndipangeni, ine ndinadzapicita na ntima onsene.” Panango imwe munanyinyirika toera kulonga mafala anewa kuna munthu anadziwa imwe pang’ono, peno anakhonda imwe kudziwa. Mbwenye panango nee mbamudanentseka kulonga mafala anewa kuna xamwali wanu wakufunika. Xamwali wapantima ali dzololo toera kucita cinthu angaphembwa na xamwali wace.

Bhibhlya isapangiza kuti Yahova ndzidzi onsene asacita pinadziwa iye kuti pinadzatsandzayisa alambiri ace. Mwacitsandzo, Mambo Dhavidhi akhali na uxamwali wapantima na Mulungu. Iye alonga: ‘Yahova Mulungu wanga, mwaticitira pyakudzumisa pizinji; nkhabe munthu wakulandana na Imwe pa kutisakira pyadidi. . . . Thangwi ipyo mphyakukhonda kulengeseka!’ (Masalmo 40:5) Kusiyapo pyenepi, Yahova asacitambo pinthu pyakutsandzayisa kwa ale akuti adzati kundziwa, ‘mbaapasa cakudya na kudzalisa mitima yawo na kusekera.’​—Machitiro 14:17.

Nakuti Yahova asakomerwa kucita pinthu pinatsandzayisa anango, mphyakulinganira kudikhira kuti ale anafuna kukhala axamwali a Mulungu acite pinthu ‘pinakomeresa ntima wace.’ (Misangani 27:11) Mphapo ndi pinthu pipi pinafunika imwe kucita toera kukomeresa Mulungu? Bhibhlya isatawira: ‘Lekani kuduwala kuphedza andzanu, mbamuagawira pinthu thangwi Mulungu asakomerwa na ntsembe zenezi.’ (Ahebere 13:16) Kodi pyenepi pisabveka kuti kucita pinthu pyadidi na kugawira pinthu anango ndi pyonsene pinafunika toera kukomeresa Yahova?

Bhibhlya isalonga: “Mwakusowa cikhulupiro nkhabe kwanisika kukomeresa mwadidi Mulungu.” (Ahebere 11:6, Tradução do Novo Mundo) Mwandimomwene, ‘Abrahamu adzathulwa xamwali wa Yahova’ pidamala iye ‘kupangiza cikhulupiro kwa Yahova.’ (Tyago 2:23) Yezu agomezerambo kufunika kwa ‘kukhulupira Mulungu’ toera titambire nkhombo za Mulungu. (Jwau 14:1) Mphapo munakwanisa tani kukhala na cikhulupiro cinasaka Mulungu mwa ale anakwewera iye kuna iye? Tomani na kupfundza Bhibhlya mwakukhonda phonya. Mungacita tenepo, munadzakhala na ‘cidziwiso candimomwene ca pire pinafuna Mulungu,’ natenepa, munakwanisa kudziwa kuti ‘munankomeresa tani mwakukwana.’ Buluka penepo, munapitiriza imwe kuthimizira cidziwiso canu candimomwene thangwi ya Yahova na kuphatisira pinapfundza imwe m’mitemo yace yakulungama, cikhulupiro canu kwa iye cinadzakula, pontho iye anadzafendedzera cifupi kuna imwe.​—Akolose 1:9, 10.