BHIBHLYA ISACINJA UMASO WA ANTHU

Undimomwene Wa Bhibhlya Watawira Mibvundzo Yanga

Yakulongwa na Mayli Gündel

CAKA CAKUBALWA: 1987

DZIKO YAKUBALWA: AZERBAIJÃO

MBIRI: BABA MUSULUMANO NA MAMA MUYUDA

MBIRI YANGA: Ndabalwa ku Baku n’dziko ya Azerbaijão, ndine mwana waciwiri m’banja yathu. Baba akhali Musulumano na mama akhali Muyuda. Anyakubalanga akhafunana unango na ndzace, maseze akhali akusiyana pikhulupiro. Mama akhatsalakana Baba mukhajejuari iye, ndzidzi wa Ramadan na Baba akhatsalakanambo Mama mu ndzidzi wa Paskwa. Pa nyumba pathu tikhali na Alcorão, Torá na Bhibhlya.

Ine ndikhadziona ninga Musulumano. Maseze ndikhatawira kuti Mulungu alipo, mbwenye pakhali pinthu pikhandidzudzumisa. Ndikhabvundzika, ‘Thangwi yanji Mulungu acita anthu, pontho ndi mathangwi api anacitisa munthu kuthabuka mu umaso wace onsene n’djenje ya moto?’ Ngakhale anthu alonga kuti pinthu pyonsene pisacitika na cifuno ca Mulungu, ndikhabvundzika, ‘Mulungu asakomerwa kuona anthu mbakathabuka?’

Mukhali ine na pyaka 12 pyakubalwa, ndatoma kuphembera namaz, mwambo wa Mamusulumano wakuphembera kaxanu pa ntsiku. Mu ndzidzi unoyu, Babathu alembesa m’bale wanga wankulu pabodzi na ine kuxikola Yaciyuda. Kusiyapo mapfundziro anango, tikhapfundziswambo miyambo ya Torá na cilongero ca Cihebhere. Mbitidzati kutoma mapfundziro a ntsiku na ntsiku, tikhafunika kucita phembero mwakubverana na mwambo Waciyuda. Natenepa, namacibese ndikhaphembera namaz kunyumba, namaulo ndikhacita maphembero Aciyuda kuxikola.

Nee ndakwanisa kugumana matawiro andimomwene a mibvundzo yanga. Mwakubwereza-bwereza ndikhabvundza atsogoleri auphemberi Waciyuda kuxikola: “Thangwi yanji Mulungu acita anthu? Kodi Mulungu asaona tani Babanga wakuti ndi Musulumano? Iye ndi munthu wadidi, mphapo thangwi yanji asaoniwa wakukhonda cena? Thangwi yanji Mulungu ancita?” Matawiro akucepa adapangwa ine nee andiphata ntima.

BHIBHLYA YACINJA TANI UMASO WANGA: Mu caka 2002 nee ndikhakhulupirabve Mulungu. Mu ndzidzi udafulukira ife ku Alemanya, basi ene pakumala sumana, babanga aphatwa na utenda mbakomoka. Ndaphembera mu pyaka pizinji thangwi ya ungumi na udidi wa banja yathu. Na cinyindiro cakuti Mulungu asatsalakana umaso na kukunda kufa, ndaphembera kuna iye ntsiku zonsene thangwi ya umaso wa babanga. Ndikhanyerezera kuti ‘Mulungu mbadakwanirisa pifuno pya muntima mwanga.’ Ndikhanyindira kuti iye mbadatawira maphembo anga. Mbwenye babanga alowa.

Ndatsukwala kakamwe mpaka kupibva kuti Mulungu nkhabe tsalakana anthu akunentseka. Ndanyerezera kuti panango ‘ndikhaphembera mwakuipa peno kuti Mulungu nee alipo.’ Ndaipirwa kakamwe, pontho ndacimwaniratu kuphembera namaz. Mauphemberi anango akhali akusowa basa kwa ine, mbandinyerezera kuti nkhabeko Mulungu.

Pakupita nthanda zitanthatu, Mboni za Yahova zafika pa nyumba pathu. Nakuti nee tikhanyerezera kakamwe pya Cikristu, ine na m’bale wanga tikhafuna kuwapangiza mwacilemedzo kuti iwo akhali akudodomeka. Natenepa taabvundza: “Kodi Akristu anakwanisa tani kulambira Yezu, kurusu, Mariya na adzimunthu anango akuti nee asabverana na Matongero Khumi?” Kubulukira m’Bhibhlya, Mboni za Yahova zatitawira mwadidi kuti ulambiri wa adzimunthu ndi wakukhondeswa kwa Akristu andimomwene na maphembero asafunika kucitwa basi ene kuna Mulungu. Pyenepi pyandidzumatirisa kakamwe.

Buluka penepo taabvundza: “Ndiye tani pya Utatu? Khala Yezu ndi Mulungu, mbadakwanisa tani kukhala pa dziko yapantsi mbaphiwa na anthu?” Iwo atitawira pontho kubulukira m’Bhibhlya na kufokotoza kuti Yezu nee ndi Mulungu, nee wakulandana na Iye. Iwo afokotoza kuti ndi thangwi yace nkhabe kukhulupira Utatu. Ndadzumatirwa mbandinyerezera, ‘Mwandimomwene awa ndi Akristu acilendo.’

Ngakhale tenepa, ndapitiriza kusaka kudziwa thangwi yanji anthu asafa na thangwi yanji Mulungu asalekerera nyatwa. Mboni za Yahova zandipangiza bukhu Conhecimento Que Conduz à Vida Eterna,a yakuti iri na misolo idatawira mibvundzo yanga. Mwakukhonda dembuka ndatoma kupfundza Bhibhlya na iwo.

Mu pfundziro ibodzi na ibodzi, ndagumana matawiro a Bhibhlya akuphata ntima a mibvundzo yanga. Ndafika pakudziwa kuti dzina ya Mulungu ndi Yahova. (Masalmo 83:18, Tradução do Novo Mundo) N’khaliro wace ukulu ndi ufuni wakusowa umbirimi. (1 Jwau 4:8) Iye acita anthu thangwi akhafuna kuti iwo atsandzaye na umaso. Ndadzabvesesa kuti ngakhale Mulungu asalekerera kusowa ulungami, iye asaida n’khaliro unoyu, pontho mwakukhonda dembuka anadzaumalisa kwenda na kwenda. Ndapfundza kuti kupanduka kwa Adhamu na Eva kwabweresa nyatwa kwa anthu. (Aroma 5:12) Pakati pa nyatwa zenezi zakutsukwalisa ndi kufa kwa anyakufunika athu ninga babanga. Mbwenye, Mulungu anadzamalisa nyatwa zenezi n’dziko ipswa yakuti akufa anadzalamuswa.​—Machitiro 24:15.

Undimomwene wa Bhibhlya watawira mibvundzo yanga. Ndatoma pontho kukhulupira Mulungu. Nakuti ndafika pakudziwa mwadidi Mboni za Yahova, ndadzindikira kuti ndi abale pa dziko yonsene yapantsi. Kuphatana na ufuni wawo pyandidzumatirisa kakamwe. (Jwau 13:34, 35) Pinthu pya Yahova pidapfundza ine pyandikulumiza toera kuntumikira, mbandisankhula kukhala m’bodzi wa Mboni za Yahova. Ndabatizwa ntsiku 8 ya Thongwe, 2005.

NDAPHINDULA TANI: Undimomwene wa Bhibhlya wacinja maonero anga onsene thangwi ya umaso. Mafokotozero akunyindirika anagumana ine m’Mafala a Mulungu asandipasa ntendere wa muntima. Ndiri wakutsandzaya kakamwe na pikiro ya m’Mafala a Mulungu yakulamusa anthu muli akufa, thangwi ndinadzaona pontho babanga.​—Jwau 5:28, 29.

Mu pyaka pitanthatu, ndiri wakutsandzaya pabodzi na mamunanga wakugopa Mulungu, Jonathan. Uwiri wathu tapfundza kuti undimomwene wa Mulungu ndi wakunyindirika, wakukhonda nentsa, pontho ndi mpfuma ya ntengo ukulu kakamwe. Na thangwi ineyi tisakomerwa kupanga anango pya cikhulupiro na cidikhiro cathu cakudzumatirisa. Lero, ndisadziwa kuti Mboni za Yahova nee ndi “Akristu acilendo,” mbwenye ndi andimomwene.

[Cidzindikiro capantsi]