Pitirizani Kukhala Waphinga Mu Utumiki

KUMWAZA mphangwa zadidi ndi basa yakufunika kakamwe yakuti ikucitwa pa dziko yapantsi lero. Ninga ntumiki wa Yahova, imwe musaona kuti ndi mwai ukulu kakamwe kucita khundu m’basa yakucita anyakupfundza. Mbwenye mwakukhonda penula, imwe musatawira kuti midzidzi inango, apainiya na amwazi mphangwa asathimbana na pinentso toera kupitiriza kukhala aphinga mu utumiki.

Kwa amwazi mphangwa anango, pisanentsa kakamwe kugumana munthu toera kucedza naye mu utumiki wa nyumba na nyumba. Mwandimomwene, anaciro nyumba azinji nee asagumanika panyumba. Angamwazirwa mphangwa za Umambo, panango iwo nee asapangiza cifuno, peno kupangiza ukali. Amwazi mphangwa anango asaona kuti aphatika kakamwe thangwi ali na cisa cikulu cakuti anthu asatawira mwadidi, ngakhale tenepo asaona kuti nee anakwanirisa basa yawo. Anango m’mipingo atoma kale kakamwe kumwaza mphangwa​—kupiringana ndzidzi ukhadikhira iwo, natenepa iwo afewa manungo.

Kodi mphyakudzumisa kudziwa kuti atumiki onsene a Yahova asathimbana na nyatwa zakuti zinakwanisa kupungula phinga yawo m’basa yakumwaza mphangwa? Nkhabe. Kusiyapo pyenepi, tisatawira kuti mu dziko ino yakutongwa na ‘nyakuipa’ Sathani Dyabo, pisanentsa kumwaza mphangwa za Mulungu za undimomwene wakupulumusa umaso.​—1 Jwau 5:19.

Mwakukhonda tsalakana pinentso pinathimbana na imwe pakumwaza mphangwa zadidi, khalani na cinyindiro cakuti Yahova anakwanisa kukuphedzani toera kupikunda. Mphapo munacitanji toera kuthimizira phinga yanu mu utumiki? Tendeni tidinge njira zingasi.

PHEDZANI AMWAZI MPHANGWA A MALUSO AKUCEPA

Pyaka pyonsene, pikwi na pikwi pya anthu asabatizwa ninga Mboni za Yahova. Khala imwe mwabatizwa cincino ninga cipangizo cakuperekeka kwanu kuna Mulungu, mwakukhonda penula imwe munapereka takhuta kakamwe na ciphedzo ca ale akuti ali na ndzidzi uzinji m’basa yakumwaza mphangwa. Khala mwatoma kale kakamwe kumwaza mphangwa, mphyadidi kakamwe kuphedza amwazi mphangwa apswa.

Yezu akhadziwa kuti anyakupfundzace akhafuna pitsogolero toera kukhala amwazi mphangwa aluso. Iye apangiza anyakupfundzace kuti akhafunika kucita tani basa ineyi. (Luka 8:1) Lero, mphyakufunika kakamwe kuphedza anango toera kukhala amwazi mphangwa aluso.

Ife nee tisafunika kunyerezera kuti amwazi mphangwa apswa anadzakhala aluso basi ene thangwi asaenda mu utumiki. M’mwazi mphangwa asafuna citsogolero cadidi ca mpfundzisi waufuni. Cipfundziso ceneci cisaphataniza kupangiza amwazi mphangwa a maluso akucepa kuti (1) anakhunganyika tani na kuyesera maperekero aumboni, (2) anacita tani utumiki wa nyumba na nyumba peno kucedza na munthu anapita na njira, (3) anagawira tani mabukhu, (4) anatsalakana tani munthu adapangiza cifuno, na (5) anatomesa tani pfundziro ya Bhibhlya. Mwakukhonda penula, ule anapfundziswa anadzaphindula kakamwe angaonesesa mbatowezera maluso a ule anamphedza. (Luka 6:40) M’mwazi mphangwa mupswa anadzafuna kakamwe kukhala na munthu wakuti anakwanisa kubva maonero ace na kumphedza. Amwazi mphangwa a maluso akucepa, anadzaphindulambo angasimbwa mbapaswa maonero akuthema.​—Koel. 4:9, 10.

CEDZANI NA NDZANU ANABULUKA NA IMWE MU UTUMIKI

Ngakhale musacita pyonsene toera kucedza na anaciro nyumba, mu ntsiku zinango, makani adidi anakhala na imwe m’basa ya m’munda asabulukira mu kucedza na ndzanu anaphata na imwe. Kumbukani kuti Yezu atuma anyakupfundzace “awiri awiri” toera kumwaza mphangwa. (Luka 10:1) Pikhaphata iwo pabodzi pene, iwo mbadakwanisa kuwangisana na kupasana cipapo unango na ndzace. Natenepa, ndzidzi unakhala ife mu utumiki na m’mwazi mphangwa ndzathu, usatipasa mwai wadidi toera ‘kuwangisana unango na ndzace.’​—Rom. 1:12.

Ndi pinthu pipi pyakuti munakwanisa kupicedza na ndzanu? Munakwanisa kulonga cakugumana naco cakuwangisa cidakhala na imwe? Munakwanisa kulonga pya ntsonga yakuwangisa idakhala na imwe pa pfundziro yanu peno pakulambira kwanu kwa banja? Munakwanisa kulonga pya ntsonga idakuwangisani pa nsonkhano? Midzidzi inango, m’mwazi mphangwa ali na imwe nee musabuluka naye kazinji kene. Kodi musadziwa kuti iye apita tani mu undimomwene? Ninji pidancitisa kunyindira kuti iyi ndi gulu ya Yahova? Ndi miyai ipi peno pyakugumana napyo pidakhala na iye? Panango munakwanisa kulonga pyakugumana napyo pyanu. Mwakukhonda tsalakana maphindu a utumiki wathu, kuphata basa na andzathu mu utumiki kusatipasa mwai wadidi toera ‘kuwangisana unango na ndzace.’​—1 Ates. 5:11.

PITIRIZANI KUKHALA NA NDANDANDA YADIDI YA PFUNDZIRO

Cinthu cakufunika kakamwe toera kupitiriza kukhala aphinga mu utumiki ndi kukhazikisa na kupitiriza na ndandanda yadidi ya pfundziro. ‘M’bandazi wakukhulupirika na wandzeru’ asabulusa mphangwa zinalonga pinthu pyakusiyana-siyana. (Mat. 24:45) Natenepa, muli na mphangwa zizinji zakuti munakwanisa kuzipfundza toera kudya cakudya cauzimu. Tendeni tidinge citsandzo ca ntsonga ibodzi yakuti munakwanisa kuiphatisira pa pfundziro yanu: Thangwi yanji basa yakumwaza mphangwa za Umambo ndi yakufunika kakamwe? Bokosi inagumanika pa tsamba 16 isapangiza mathangwi mangasi.

Kudinga ntsonga zinagumanika m’bokosi ineyi kunakukulumizani toera kupitiriza kumwaza mphangwa mwaphinga. Thangwi yanji nkhabe kusaka mathangwi anango toera kuathimizira pa ndandanda unoyu? Buluka penepo, nyerezerani mwacidikhodikho pya mathangwi anewa na malemba anaaphedzera. Mwakukhonda penula, kucita pyenepi kunawangisa phinga yanu mu utumiki.

KHALANI DZOLOLO TOERA KUPHATISIRA MAONERO

Gulu ya Yahova isapereka maonero mwakukhonda phonya toera kuthimizira utumiki wathu. Mwacitsandzo, kusiyapo basa ya nyumba na nyumba, ife tinakwanisa kupereka umboni mu kuphatisira matsamba, ntokodzi, kumwaza mphangwa mu nseu peno m’mbuto zinango zapakweca, na kumwaza mphangwa zadidi mwantsusukano na m’mbuto zamalonda. Tinakwanisambo kucita masasanyiro toera kumwaza mphangwa mu pisa pyakuti nee pisamwazwa mphangwa kazinji kene.

Imwe muli dzololo toera kuphatisira maonero anewa? Mwayesera kale kuphatisira mangasi mwa maonero anewa? Azinji anacita pyenepi asakhala na maphindu akutsandzayisa kakamwe. Onani pitsandzo pitatu.

Citsandzo cakutoma cisaphataniza ntsonga ibodzi ya misolo idabuluswa mu Utumiki Wathu Wa Umambo inalonga kuti tinatomesa tani pfundziro ya Bhibhlya. Pyenepi pyakulumiza mulongo unango anacemerwa April toera kugawira pfundziro ya Bhibhlya kwa andzace atatu akubasa. Iye adzumatirwa mbakomerwa kakamwe pa ndzidzi udatawira iwo kupfundza Bhibhlya mbatoma kugumanika pa misonkhano ya mpingo.

Citsandzo caciwiri cisaphataniza kugawira marevista athu. Tonsene tisawangiswa toera kusaka anthu akuti anakomerwa na misolo ya marevista athu. Muyang’aniri unango wa cisa ku Estados Unidos alonga kuti agawira revista ya Despertai! idalonga pya mapineu a motokala kuna atsogoleri onsene a mbuto zinakoyerwa mapineu mu cisa cinango. Iye na nkazace agawirambo nsolo wakuti “Os Desafios de Ser Médico” m’maofesi a madotoro akupiringana 100 mu cisa cinacedzera iwo. Iye alonga: “Maulendo anewa atiphedza kakamwe toera kulonga na anthu na kugawira mabukhu athu. Pidamala ife kudzolowerana na anthu a mbuto zenezi, takwanisa kuthimizira maulendo athu akucedza nawo.”

Citsandzo cacitatu cisaphataniza kupereka umboni mu kuphatisira ntokodzi. Mulongo anacemerwa Judy alembera ofesi yathu ikulu toera kupereka takhuta thangwi ya maonero adatiwangisa toera kumwaza mphangwa mu kuphatisira ntokodzi. Iye alonga kuti mai wace wa pyaka 86 pyakubalwa wakuti akhathimbana na nyatwa zizinji za ungumi, mwakukhonda phonya akhakwanisa kucita khundu mu ntundu unoyu wa basa yakucena, pontho akhali wakutsandzaya thangwi akhacitisa pfundziro ya Bhibhlya na nkazi wa pyaka 92 pyakubalwa mu kuphatisira ntokodzi!

Mwandimomwene, maonero a maperekero aumboni anaperekwa m’mabukhu athu asaphedza kakamwe. Natenepa, aphatisireni! Iwo anakwanisa kukuphedzani toera kupitiriza kukhala akutsandzaya na aphinga mu utumiki.

KHAZIKISANI PIFUNO PYAKULINGANIRA

Kupembera mu utumiki wathu nee kusapimwa na ntsama ya mabukhu anagawira ife, numero ya mapfundziro a Bhibhlya anacitisa ife, peno kunjipa kwa anthu anaphedza ife toera kutumikira Yahova. Ndi anthu angasi adaphedza Nowa toera kukhala alambiri a Yahova, kusiyapo anthu a panyumba yace? Ngakhale tenepo, iye akhali m’mwazi mphangwa wakupembera. Cinthu cakufunika kakamwe ndi kutumikira Yahova mwakukhulupirika.​—1 Akor. 4:2.

Amwazi mphangwa azinji asaona kuti toera kuthimizira kukomerwa kwawo m’basa yakumwaza mphangwa, asafunika kukhazikisa pifuno pyakulinganira. Ndi pipi pingasi mwa pifuno pyenepi? Maonero mangasi asagumanika m’bokosi iri pa tsamba ino.

Na ciphedzo ca Yahova, sakani njira toera kucitisa basa yanu kukhala yakutsandzayisa na yakuphindulisa. Mungakwanirisa pifuno pyanu, imwe munadzakomerwa na pyenepi mu kudziwa kuti mukucita pyonsene pinakwanisa imwe toera kumwaza mphangwa zadidi.

Mwandimomwene, midzidzi inango pisanentsa kumwaza mphangwa zadidi. Ngakhale tenepo, pana pinthu pyakuti munakwanisa kupicita toera kukhala m’mwazi mphangwa waphinga. Longani pinthu pyakuti pinawangisa imwe na ndzanu anabuluka na imwe mu utumiki, khazikisani na pitirizani kukhala na ndandanda yadidi ya pfundziro, phatisirani maonero anaperekwa na m’bandazi wakukhulupirika, na khazikisani pifuno pyakulinganira. Mwa pyonsene, kumbukani kuti Mulungu akupasani mwai ukulu maningi wakumwaza mphangwa zadidi ninga m’bodzi wa Mboni zace. (Iza. 43:10) Munapitiriza imwe kukhala waphinga mu utumiki, imwe munadzakhala wakutsandzaya kakamwe!

[Bokosi pa tsamba 16]

THANGWI YANJI MUSAFUNIKA KUPITIRIZA KUKHALA WAPHINGA MU UTUMIKI?

▪ Basa yakumwaza mphangwa isaphedzera kukwanirisika kwa pikiro ya Bhibhlya.​—Marko 13:10.

▪ Tisapangiza kubvera kwathu kubulukira mu kucita khundu m’basa yakucita anyakupfundza.​—Mat. 28:18, 19.

▪ Yahova asafuna kuti anyakuipa acenjezwe pya ngozwi ya macitiro awo.​—Ezek. 3:19.

▪ Tiri na mangawa na anthu toera kuamwazira mphangwa zadidi.​—Mach. 20:26, 27; Arom. 1:14, 15.

▪ Kucita khundu m’basa yakumwaza mphangwa kusatiphedza toera kucalira mulando wa ciropa.​—Ezek. 3:18.

▪ Kupfundzisa undimomwene wa Bhibhlya ndi kwakufunika toera kupulumusa umaso wathu na wa anango.​—1 Tim. 4:16.

▪ Kulonga pya Yahova na kunsimba pamaso pa anango mphyakufunika kakamwe mu ulambiri wathu.​—Aheb. 13:15.

▪ Tisapangiza kufuna kwathu Yahova na Yezu kubulukira mu kubvera kwathu toera kucita basa ineyi.—Jwau 14:15; 1 Jwau 5:3.

▪ Utumiki wathu usaphedza toera kupokanya uthambi unamwazwa na Sathani thangwi ya Yahova.​—Iza. 43:10-12; 2 Akor. 4:4.

[Bokosi pa tsamba 18]

KHAZIKISANI PIFUNO PYAKULINGANIRA

▪ Khazikisani ndandanda wakuenda mu utumiki pasumana, pontho wangisirani toera kuutowezera.

▪ Gawirani pfundziro ya Bhibhlya ndzidzi onsene unakhala imwe na mwai.

▪ Pingakwanisika, lerini lemba ibodzi pakucedza na mwanaciro nyumba onsene.

▪ Thimizirani numero ya marevista anagawira imwe.

▪ Citani maulendo akubwereza kwa onsene anapangiza cifuno ku mphangwa za Umambo.

▪ Citani khundu munjira zakusiyana-siyana za utumiki.

▪ Khazikisani miyai mizinji toera kupereka umboni mwantsusukano.