Khalani Wakukhulupirika Ku Umambo Wa Mulungu

“Iwo nkhabe kucita khundu ya dziko”​—JWAU 17:16.

NYIMBO: 63, 129

MUNAKWANISA KUTAWIRA?

Thangwi yanji Yezu nee aona nsoka unango wa anthu kukhala wakufunika kakamwe kupiringana unango?

Kodi Akristu asafunika kuphedzera khundu ya ani?

Munapfundzisika tani toera kukhala wakukhulupirika kwa Yahova na Umambo wace?

1, 2. (a) Thangwi yanji kukhala wakukhulupirika kwa Mulungu ndi kwakufunika kwa Akristu? Kodi pyenepi pisabverana tani na unakatinakati? (Onani cithundzithundzi cakutoma.) (b) Ndi pinthu pipi pinalemedza anthu azinji, na pyenepi pisabweresanji?

KUKHULUPIRIKA na unakatinakati ndi pinthu pyakuti Akristu asapipangiza ndzidzi onsene, tayu basi m’midzidzi ya nkhondo. Thangwi yanji? Thangwi atumiki onsene a Yahova apikira kuti anapangiza ufuni, kukhulupirika kwa iye na kumbvera. (1 Jwau 5:3) Ife tisafuna kuphatisira midida yakulungama ya Mulungu konsene kunakhala ife, mwakukhonda tsalakana makuziro athu, dziko idabalwa ife peno makhaliro athu. Kukhala akukhulupirika kwa Yahova na Umambo wace kusapiringana pinthu pyonsene pyakuti tisakwanisa kukhala napyo. (Mat. 6:33) Kukhulupirika kweneku kusaphemba kuti Akristu akhonde kucita khundu mu uviyaviya wa dziko na kusankhulana kwa anthu.​—Iza. 2:4; lerini Jwau 17:11, 15, 16.

² Anthu azinji pa dziko asalemedza kakamwe dziko idabalwa iwo, dzindza yawo, makhaliro awo peno kuphedzera kakamwe nsoka wa masendzekero wa dziko yawo. Pyenepi pisabweresa mapika peno kuidana, m’midzidzi inango anthu asaphana. Njira inatsalakanira anthu pinthu pyenepi, inakwanisa kukhuya ife peno acibale athu, munjira yadidi peno yakuipa. Nakuti Mulungu acita munthu na manyerezero aulungami, pisankhulo pisacitwa na mautongi a anthu pinakwanisa kukhuya maonero athu thangwi ya pinanyerezera ife kukhala pyadidi na pyakuipa. (Gen. 1:27; Deut. 32:4) Kodi tisacitanji tingathimbana na makhaliro anewa? Mphyakukhonda nentsa kucita khundu mu pinthu pya dziko na mu nkhani zakuketesana.

3, 4. (a) Thangwi yanji Akristu asafunika kupangiza unakatinakati mu uviyaviya wa dziko? (b) Kodi nsolo uno unadzadinganji?

³ Pangaoneka uviyaviya, panango misoka ya utongi inakakamiza anthu awo toera kuaphedzera. Akristu andimomwene nkhabe kucita pyenepi. Ife nkhabe cita khundu mu pinthu pyandale za dziko ino peno kuenda kunkhondo. (Mat. 26:52) Dziko ya Sathani isatiyesera toera kutawira kuti khundu inango ya dziko ndi yakufunika kakamwe kupiringana inango, mbwenye ife nkhabe kunyengezwa na maonero anewa. (2 Akor. 2:11) Nakuti nee tisacita khundu ya dziko, ife nkhabe kuphedzera uviyaviya wayo.​—Lerini Jwau 15:18, 19.

⁴ Mbwenye nakuti ndife anthu akusowa ungwiro, anango a ife ananentseka toera kumalisa maonero akusankhulana akhali na ife kale. (Yer. 17:9; Aef. 4:22-24) Natenepa, nsolo uno unadzadinga midida mingasi yakuti inatiphedza toera kukunda pipendamiro pyenepi. Tinadzadingambo kuti tinapfundzisa tani manyerezero athu na cikumbuntima cathu toera kukhala akukhulupirika ku Umambo wa Mulungu.

THANGWI YANJI NEE TISACITA KHUNDU MU PINTHU PYA DZIKO?

5, 6. Pikhali Yezu pa dziko yapantsi, kodi iye aona tani kusankhulana kwa anthu, thangwi yanji?

⁵ Mungathimbana na makhaliro akunentsa mbamukhonda kudziwa kuti munacitanji, mphyadidi kubvundzika: ‘Kodi Yezu mbadacitanji pa nkhani ineyi?’ Pikhali Yezu pa dziko yapantsi, anthu a ku Yudeya, Galileya, Samariya na mbuto zinango nee akhabverana. (Jwau 4:9) Kukhonda bverana kukhalipombo pakati pa Afarisi na Asaduki (Mach. 23:6-9); pakati pa anthu na anyakulipisa misonkho (Mat. 9:11); na pakati pa ale adatambira cipfundziso ca Ayuda na ale adakhonda kucitambira. (Jwau 7:48) Mu pyaka dzana yakutoma, Aisraele akhatongwa na Aroma, mbwenye Aisraele akhaaida. Maseze Yezu atsidzikiza undimomwene wa Mulungu mbatawira kuti cipulumuso cabukulukira kwa Ayuda, iye cipo akulumiza anyakupfundzace toera kuida andzawo. (Jwau 4:22) Mbuto mwace, aakulumiza toera kufuna anthu onsene ninga andzawo.​—Luka 10:27.

⁶ Thangwi yanji Yezu nee aphedzera kusankhulana kwa anthu ninga pikhacita Ayuda? Thangwi iye na Babace nkhabe kucita khundu mu pinthu pyenepi pya dziko. Pidacita Yahova mamuna na nkazi kubulukira mwa Mwanace, iye akhafuna kuti iwo adzadze dziko yonsene. (Gen. 1:27, 28) Mulungu aacita munjira yakuti mbadakwanisa kubala anthu a mitundu yakusiyana-siyana. Yahova na Yezu nkhabe kuona dzindza ya munthu, dziko peno cilongero kukhala pyapadzulu kupiringana pya anango. (Mach. 10:34, 35; Apok. 7:9, 13, 14) Natenepa tisafunika kutowezera citsandzo cawo.​—Mat. 5:43-48.

7, 8. (a) Kodi Akristu asafunika kuphedzera khundu ya ani? (b) Kodi Akristu asafunika kudziwanji pa nkhani yakumalisa nyatwa za anthu?

⁷ Mbwenye pana cinthu cibodzi cisafunika ife kucita khundu​—kuphedzera Utongi Ukulu wa Yahova. Kukhonda bverana kwatoma mu Edheni pidapingiza Sathani utongi wa Yahova. Natenepa, anthu onsene asafunika kusankhula khala anakhulupira kuti njira inacitira Mulungu pinthu ndi yadidi kakamwe kupiringana ya Sathani peno nkhabe. Kodi mwandimomwene imwe musacita khundu ya Yahova mbamusankhula kubvera matongero na midida yace mbuto mwakucita pinthu m’maonero anu? Kodi musakhulupira kuti Umambo wace ndiwo basi unafuna kumalisa nyatwa za anthu? Peno musanyerezera kuti anthu anakwanisa kutongeka okhene?​—Gen. 3:4, 5.

⁸ Matawiro anu ku mibvundzo ineyi anadzapangiza kuti mbamudatawira tani khala anthu aphemba maonero anu mu pinthu pya dziko. Anyandale, anyakupereka uphungu na anyakucinja pinthu atoma kale kuyesera kugumana njira zakumalisa kusankhulana kwa anthu. Pinacita iwo pisaoneka ninga ali na cifuno cadidi. Mbwenye Akristu asadziwa kuti Umambo wa Mulungu ndiwo basi unafuna kumalisa nyatwa za anthu na kubweresa ulungami wandimomwene. Ife tisafunika kusiya pinthu pyenepi m’manja mwa Yahova. M’mpingo, mbuto mwakucita pinthu ninga munaonera munthu kukhala pyadidi, ife tisatowezera pitsogolero pya Yahova. Natenepa, mipingo isakhala yakuphatana.

9. Ndi mpingizo upi udaona Paulu pakati pa Akristu a pyaka dzana yakutoma? Mbwenye Paulu aaphemba toera kucitanji?

⁹ Mu pyaka dzana yakutoma, Akristu anango a ku Korinto akhaketesana unango na ndzace, mbalonga: ‘Ine ndine wa Paulu,’ ‘mbwenye ine ndine wa Apolo,’ ‘mbwenye ine ndine wa Pedhro,’ ‘mbwenye ine ndine wa Kristu.’ Mudadzindikira Paulu pinthu pyenepi, aipirwa kakamwe. Natenepa, iye abvundza: Kodi ‘Kristu ndi wakugawika?’ Paulu apereka uphungu: ‘Abale anga, ndinakuphembani na dzina ya Mbuyathu Yezu Kristu kuti imwe monsene mukhale na mafala mabodzi ene mbikhonda kusiyana mitima yanu, mbamulungama, mbamukhala na ndzeru zakubverana.’ Natenepa, lero nkhabe funika kugawana m’mpingo Wacikristu.​—1 Akor. 1:10-13; lerini Aroma 16:17, 18.

10. Kodi mpostolo Paulu apangiza tani kuti Akristu nee asafunika kucita khundu mu uviyaviya wa dziko?

¹⁰ Paulu akulumiza Akristu akudzodzwa toera kuikha manyerezero awo ku cidikhiro cawo cakudzulu mbuto mwa pinthu pya dziko yapantsi. (Afil. 3:17-20)a Iwo akhafunika kuphata basa ninga aimiriri a Kristu. Aimiriri nee asacita khundu mu uviyaviya na ndale za madziko anatumizwa iwo. Munjira ibodzi ene, nee mbipidakhala pyakuthema kwa Akristu akudzodzwa kucita khundu mu uviyaviya na ndale za dziko. (2 Akor. 5:20) Akristu anadikhira kukhala pa dziko yapantsi ndi anthu akukhulupirika ku Umambo wa Mulungu, natenepa iwo nkhabe kucita khundu mu uviyaviya wa dziko.

PFUNDZISIKANI TOERA KUKHALA WAKUKHULUPIRIKA KWA YAHOVA

11, 12. (a) Ndi maonero api asafunika ife kucalira khala tisafuna kupitiriza kukhala akukhulupirika ku Umambo wa Mulungu? (b) Ndi mabvero api akhali na mulongo Mirjeta thangwi ya anthu anango, mphapo ninji cidamphedza toera kucinja?

¹¹ M’madziko mazinji, anthu ndi akuphatana kakamwe na ale akuti ali na mbiri, makhaliro na cilongero cibodzi cene na cawo. Kazinji kene iwo asadzikuza thangwi ya mbuto idabalwa iwo. M’makhaliro anewa, Akristu asafunika kupfundzisa manyerezero awo na cikumbuntima cawo toera kucalira kupangiza kusankhulana kweneku. Tinacita tani pyenepi?

¹² Onani citsandzo ca Mirjetab adabalwa mu dziko ikhacemerwa Yugoslavia. Mu cisa cidakula iye, azinji akhaida anthu a ku Sérvia. Iye apfundza kuti Yahova nkhabe kusankhula anthu, mbwenye Sathani ndiye anacitisa anthu kuida anthu a madzindza anango. Natenepa, iye awangisira toera kumalisa mabvero ace akuida anthu a dzindza inango. Mbwenye mudatoma nkhondo za madzindza akusiyana-siyana mu cisa cace, Mirjeta atoma pontho kukhala na mabvero akuphonyeka. Iye akhanentseka toera kumwazira mphangwa anthu a ku Sérvia. Mbwenye iye adzindikira kuti pyenepi pikhali pyakuipa, mbaphemba Yahova toera kumphedza kukunda mabvero anewa. Iye athimizira utumiki wace mu kutumikira ninga mpainiya. Iye alonga: “Ndaona kuti kuikha utumiki pa mbuto yakutoma ndi ciphedzo cikulu kakamwe. Mu utumiki ndisayesera kutowezera makhaliro aufuni wa Yahova, natenepa, ndisaona kuti mabvero anga akuphonyeka akumala.”

13. (a) Ndi makhaliro api adathimbana na Zoila, mphapo aatsalakana tani? (b) Tinapfundzanji kubulukira mu citsandzo ca Zoila?

¹³ Dinganimbo citsandzo ca Zoila. Iye abuluka ku Méxiko mbaenda ku Europa. Kweneku iye ali m’mpingo wakuti muli na abale na alongo a cisa cinango ca ku América Latina. Zoila aona kuti iwo akhapwaza dziko idabalwa iye, misambo na nyimbo za dziko ineyi. Mbidakhala ndimwe, mbamudacitanji? Mwandimomwene Zoila atsukwala na mafala anewa. Mbwenye iye asaka ciphedzo ca Yahova toera kumalisa mabvero anewa akuphonyeka muntima mwace. Tisadziwa kuti anango a ife asapitiriza kuthimbana na mabvero mabodzi ene. Natenepa, cipo tisafunika kulonga peno kucita cinthu cakuti mbacidatomesa kugawana peno kupangiza maonero akuti anthu anango ndi adidi kakamwe kupiringana anango pakati pa abale athu peno pakati pa anthu anango.​—Arom. 14:19; 2 Akor. 6:3.

14. Kodi Akristu anapfundzisa tani manyerezero awo na cikumbuntima cawo toera kuona anthu ninga munaaonera Yahova?

¹⁴ Tonsene tisadziwa kuti atumiki a Yahova ndi akuphatana, natenepa nee tisafunika kunyerezera kuti dziko inango ndi yakufunika kakamwe kupiringana inango. Mbwenye ndiye tani mungaona kuti muli na maonero akuphonyeka kwa anthu a madziko anango, makhaliro, pilongero, peno madzindza anango? Mphyadidi kudinga mwacidikhodikho kuti Yahova asaona tani kusankhulana kwa madzindza. Pa pfundziro yanu pa mwekha peno pakulambira kwanu kwa banja, fufudzani mphangwa zizinji zinalonga pyenepi. Buluka penepo, phembani Yahova toera akuphedzeni kuti muphatisire maonero ace mu pinthu pyenepi.​—Lerini Aroma 12:2.

15, 16. (a) Tisadikhira kuti anango anatitsalakana tani thangwi yakukhala kwathu akusiyana na iwo? (b) Kodi anyakubala anaphedza tani anawo toera kukhala akukhulupirika kwa Yahova?

¹⁵ Ife tisafuna kutumikira Yahova na cikumbuntima cakucena, natenepa, m’midzidzi inango tisafunika kukhala akusiyana kakamwe na andzathu akubasa, akuxikola, anyakuendekana athu peno acibale athu. (1 Ped. 2:19) Natenepa, nee tisafunika kudzudzumika tingatcingwa na dziko thangwi ya makhaliro athu; Yezu acenjeza kuti pyenepi mbapidacitika. Anthu azinji anatitcinga, nee asadziwa pya Umambo wa Mulungu. Natenepa, iwo nkhabe kubvesesa kuti thangwi yanji mphyakufunika kakamwe kwa ife kukhala akukhulupirika ku Umambo mbuto mwa mautongi a anthu.

¹⁶ Kukhala akukhulupirika kwa Yahova pisaphemba kumbvera pakuthimbana na pinentso. (Dan. 3:16-18) Kugopa anthu kusakhuya anthu a mathunga onsene, mbwenye aphale na atsikana anaona kuti mphyakunentsa kakamwe kukhala akusiyana na andzawo. Anyakubala phedzani ananu toera akhale acipapo kuxikola. Panango iwo anagopa kukhonda kulambira bandera peno kucalira kucita khundu m’maphwando adziko. Nkati mwa kulambira kwanu kwa banja munakwanisa kuphedza ananu toera kubvesesa kuti Yahova asaona tani pyenepi. Apfundziseni toera kufokotoza pakweca pikhulupiro pyawo munjira yacilemedzo. (Arom. 1:16) Khala mphyakufunika, longani pinakhulupira imwe kuna apfundzisi awo, pyenepi pinaphedza ananu toera kukhala na cipapo.

PASANI NTENGO PYONSENE PIDACITA YAHOVA!

17. Ndi maonero api asafunika ife kucalira, thangwi yanji?

¹⁷ Kazinji kene tisatsandzaya na cakudya, cilongero, masendzekero na misambo ya mbuto idakulira ife. Mbwenye tisafunika kucalira maonero akuti pyathu ndi pyadidi kakamwe kupiringana pya anango. Yahova asafuna kuti titsandzaye na pinthu pyakusiyana-siyana pidacita iye. (Sal. 104:24; Apok. 4:11) Mphapo thangwi yanji kukakamira kuti njira ibodzi yakucita pinthu ndi yadidi kakamwe kupiringana inango?

18. Thangwi yanji mphyadidi kuona anango ninga munaaonera Yahova?

¹⁸ Mulungu asafuna kuti anthu onsene apfundze pya iye, amulambire mbakhala na umaso wakwenda na kwenda. (Jwau 3:16; 1 Timoti 2:3, 4) Natenepa, tisafunika kubvesera na ntima onsene maonero a anango na kuatawira, maseze ndi akusiyana na athu. Pyenepi pinatsidzikiza kuphatana kwathu Kwacikristu. Munapitiriza ife kukhala akukhulupirika kwa Yahova, tisafunika kucalira uviyaviya wa dziko. Pakati pathu nkhabe funika kusankhulana. Tisapereka takhuta kakamwe kuna Yahova thangwi yakutisudzula m’makhaliro akugawana, kudzikuza, macitiro a mapika pinaoneka kakamwe mu dziko ya Sathani! Tendeni tikhale akutonga kukulisa makhaliro antendere ninga adalongwa na nyamasalmo: ‘Mphyadidi na pyakukoma kakamwe kukhala pabodzi ninga abale.’​—Sal. 133:1.

[Pidzindikiro pyapantsi]