KUTAWIRWA KWA MIBVUNDZO YA BHIBHLYA

Mphyakukwanisika Kukhala N’dziko Yakusowa Utcerengi?

Kunjipa kwa utcerengi kusapha pikwi pya anthu caka consene na kusoweka kwa cakudya, pontho utenda. Maseze madziko anango ndi akuthambaruka, anthu azinji akupitiriza na utcerengi wa bwerani mudzaone. Bhibhlya isapangiza kuti utcerengi ndi nyatwa yakuti yatoma kale kakamwe.​—Lerini Jwau 12:8.

Toera kumalisa utcerengi, pasafunika utongi wa pa dziko yonsene.Utongi unoyu usafunika kukhala na mphambvu zakugawira mpfuma na zakumalisa nkhondo, yakuti ndi phata ikulu inacitisa utcerengi. Mulungu asapikira utongi unoyu wa dziko yonsene.​—Lerini Danyele 2:44.

Mbani Anakwanisa Kumalisa Utcerengi?

Mulungu asankhula Mwanace, Yezu, toera kutonga anthu onsene. (Masalmo 2:4-8) Yezu anadzapulumusa anyakutcerenga mbamalisa kupondererwa na uphanga.​—Lerini Masalmo 72:8, 12-14.

Ninga “Ntongi wa Ntendere,” Yezu anadzakhazikisa ntendere na citsidzikizo pa dziko yonsene yapantsi. Buluka penepo anthu onsene pa dziko yapantsi anadzakhala na nyumba zawo zene, basa yakutsandzayisa na cakudya cakuinjipa.​—Lerini Izaiya 9:6, 7; 65:21-23.

Toera kudziwa pizinji, onani nsolo 8 wa bukhu iyi, yakubuluswa na Mboni za Yahova

Isagumanikambo mu www.jw.org/seh