NSOLO WA REVISTA | THANGWI YANJI TISAFUNIKA KUKHALA AKUONA NTIMA?

Kukhonda Kuona Ntima Kusakukhuyani Tani?

“Ndzidzi onsene pasagumanika makhaliro akunentsa akuti anakwanisa kumaliswa na kukhonda kuona ntima pang’ono.”—Samantha, Afrika Wakubangwe.

Kodi musabverana na mafala anewa? Ninga Samantha, azinji a ife tathimbana kale na makhaliro akunentsa. Njira inatsalakanira ife makhaliro anatiyesera toera kucita pinthu mwakukhonda kuona ntima, inakwanisa kupangiza midida inalemedza ife. Mwacitsandzo, khala kukhonda pasika manyadzo tisakuona kukhala kwakufunika kakamwe, tinadzaona kukhonda kuona ntima ninga njira yadidi toera kukwanirisa pifuno pyathu. Mbwenye, anthu angadzindikira, kukhonda kuona ntima kusabweresa nyatwa. Dingani pinatowera.

KUKHONDA KUONA NTIMA KUSAFUDZA KUNYINDIRIKA

Uxamwali usawangiswa na kunyindirika. Anthu awiri anganyindirana, asapibva akutsidzikizika na akukoyeka. Mbwenye, kunyindirana nee kusakula mwakucimbiza. Anthu asanyindirana angakhala pabodzi, angalonga mwakuona ntima unango na ndzace, pontho angacita pinthu mwakusowa umbirimi. Mbwenye, kunyindirika kunakwanisa kufudzika, m’bodzi angacita pinthu mwakukhonda kuona ntima. Kunyindirika kungafudzika, pisakhala pyakunentsa kakamwe kukusasanyira papswa.

Kodi mwanyengezwa kale na munthu wakuti mukhamuona ninga xamwali wadidi? Khala ndi tenepo, mwapibva tani? Mwakukhonda penula mwatsukwala mbamupibva ninga akusandukirani. Mabvero anewa mbakubveka. Mwakukhonda penula kukhonda kuona ntima kunakwanisa kufudza uxamwali wadidi.

KUKHONDA KUONA NTIMA KUSABALA KUKHONDA KUONA NTIMA

Pakufufudza, Robert Innes, mpfundzisi wa pya mpfuma pa Universidade ya California, agumana kuti “kukhonda kuona ntima ndi kwakuthapulisa.” Natenepa, kukhonda kuona ntima mbakudalandaniswa na utenda wakuthapulisa, thangwi mungakhala ndzidzi uzinji na munthu wakunyengeza, “munathapula” kukhonda kuona ntima.

Munacalira tani nsampha wa kucita pinthu mwakukhonda kuona ntima? Bhibhlya inakwanisa kukuphedzani. Taphata miyendo onani midida mingasi ya Bhibhlya.

Mitundu ya Kukhonda Kuona Ntima

Uthambi

NDI NINJI? Ndi kulonga pinthu pyakukhonda khala ipyo mbwenye mbapioniwa ninga pyandimomwene. Uthambi usaphataniza kupambizira peno kuipisa undimomwene na cifuno ca kupeusa munthu, kubisa mphangwa zakufunika toera kupeusa munthu na kudzipisira kakamwe undimomwene na cifuno ca kutundusa munthu.

BHIBHLYA ISALONGANJI: ‘Yahova asaipirwa na anthu aciphamaso, mbwenye asacita uxamwali na anyaulinganiri.’ (Misangani 3:32, Tradução do Novo Mundo) ‘Nakuti mwasiya pyauthambi, longani undimomwene kwa unango na ndzace.’—Aefesi 4:25, NM.

Psweda

NDI NINJI? Ndi kulonga mafala authambi na akuipa akuti asapswipisa mbiri ya unango.

BHIBHLYA ISALONGANJI: “Munthu wakuipa asasosesa nthonga, nyakulonga psweda asamalisa uxamwali.” (Misangani 16:28) “Panasoweka nkhuni, moto usathima, panasowekambo mapsweda, nthonga isamalambo.”—Misangani 26:20.

Kunyengeza

NDI NINJI? Ndi kutundusa munthu toera kupereka kobiri peno pinthu pyace mbapaswa pyakukhonda kubverana na ntengo wa pidapereka iye.

BHIBHLYA ISALONGANJI: ‘Leka kunyengeza nyabasa wakutcerenga na wakusowa.’ (Deuteronomyo 24:14, 15) ‘Munthu ananyengeza nyakutcerenga asaxola Mulungu, mbwenye anambvera ntsisi ali Kumulemedza.’—Misangani 14:31.

Kuba

NDI NINJI? Ndi kukwata pinthu pya mwanaciro mwakukhonda tawiriswa.

BHIBHLYA ISALONGANJI: ‘Akhaba kale, aleke kuba pontho, aphate basa na manja awo, mbatambira maganyo toera akwanisembo kupasa pinthu anyakutcerenga.’ (Aefesi 4:28) ‘Lekani kudodomeswa. Mambava, anyakumana, anyakuledzera, afiti, anapokosera andzawo pinthu, awa onsene hanadzapita tayu mu Umambo wa Mulungu.’—1 Akorinto 6:9, 10.