Citsanzo Kuli Mathunga Onsene
Noa akhali na uxamwali wapantima na Mulungu. Iye apereka umaso wace towera kucita cifuno ca Yahova. Iye ‘atawira [peno afamba na] Mulungu’ wandimomwene na apaswa nkhombo m’kucita pyenepi. Noa ndi citsanzo cakuthema towera kusangizirwa na ana pabodzi na akulu. (Gen. 6:9) Vidiyu yakuti Noé—Um Homem Que Andou com Deus peno mbiri inagumanika m’Bukhu Yanga Ya Mbiri Za Bibilya inadzakuphedzani kunyerezera ntundu wa umaso ukhali na Noa, thangwi yanji iye athema nkhombo za Yahova, na munakwanisa tani kunsangizira makhaliro ace adidi.
Onani vidiyu peno lerini mbiri inagumanika m’Bukhu Yanga Ya Mbiri Za Bibilya, na buluka penepo bvunzikani: (1) Kodi ndi ninji pidacita aanju anango pyakuti pikhali pyakuipa, na anyangume peno pimphona akhali ani? (Gen. 6:1, 2, 4) (2) Thangwi yanji anthu adzakhala akuipa kakamwe, na Mulungu apibva tani pyenepi? (Gen. 6:4-6) (3) Kodi Noa akhali wakusiyana m’njira ipi? (Gen. 6:22) (4) Kodi anthu akuipa afudzwa tani? (Gen. 6:17) (5) Kodi cimwadiya cikhali cikulu tani? (Gen. 6:15) (6) Kodi Noa acitanji pontho, na anthu atawira tani? (Mat. 24:38, 39; 2 Ped. 2:5) (7) Kodi ndi pinyama pingasi pa ntundu ubodzi na ubodzi pikhali m’cimwadiya? (Gen. 7:2, 3, 8, 9) (8) Kodi mbvula yabvumba ntsiku zingasi, na dziko yapantsi yakhala yakumedzwa na madzi m’ntsiku zingasi? (Gen. 7:11, 12; 8:3, 4) (9) Thangwi yanji Noa na banja yace apulumuka? (Gen. 6:18, 22; 7:5) (10) Kodi cimwadiya catsama papi? (Gen. 8:4) (11) Kodi Noa adziwa tani kuti kukhali kwakutsidzikizika kubuluka m’cimwadiya? (Gen. 8:6-12) (12) Kodi Noa acitanji mudabuluka iye m’cimwadiya? (Gen. 8:20-22) (13) Kodi uta waleza usaphipirisanji? (Gen. 9:8-16) (14) Kodi ‘kutawira [peno kufamba na] Mulungu’ kusabvekanji? (Gen. 6:9, 22; 7:5) (15) Kodi tisafunika kucitanji towera tione Noa m’Paradizu? (Mat. 28:19, 20, MZ; 1 Ped. 2:21)
Kodi mbiri ya Biblya inalonga pya kukhulupirika na kubvera kwa Noa yakupfunzisaninji towera mukwanisembo ‘kutawira [peno kufamba na] Mulungu’ na kunyindira luso ya Yahova yakupulumusa mbumba yace lero?—Gen. 7:1; Mis. 10:16; Aeb. 11:7; 2 Ped. 2:9.