Revista Yakupambulika Ya Despertai! Inafuna Kugawirwa M’nthanda Ya Nyenzi

¹ Cifupi na anthu onsene asakomerwa na kuimba kwa mbalame na kuona kubira kwa dzuwa. Mbwenye, anthu azinji asadodoma m’kukhonda dziwa kuti adacita pinthu pyenepi ndi Baba wakufuna wakudzulu. Tinadzakhala na mwai wakupambulika towera kucitira umboni wa mphambvu yakucita ya Yahova m’kugawira revista yakupambulika ya Despertai! (Iza. 40:28; 43:10) Despertai! ya Setembro yacitwa towera kulonga kakamwe nsolo wakuti: “Existe um Criador?”

² M’cisa: Pingakwanisika citani masasanyiro towera kumwaza mphangwa nyumba na nyumba pabodzi na mpingo Masabudu onsene. Ngakhale tenepa, khalani a ufulu towera kugawira revista yakupambulika m’ntsiku zinango za Sumana. Apfunzisi na anango anacita khundu ya basa ya xikola panango anadzafuna kakamwe revista ineyi. Natenepa, masasanyiro akupambulika angakwanise kucitwa towera kucezera anthu anewa ali m’cisa canu.

³ Pangaoneka kufuna, siyani mbvunzo kwa munthu unafuna imwe kudzatawira pa ulendo wakutowerera. Mwacitsanzo, mungakwanise kubvunza thangwi yanji Nciti wakufuna asalekerera pinenso pizinji. Natenepa, pa ulendo wakubwerezera, mungakwanise kugomezera nsolo 1 peno nsolo 11 wa bukhu yakuti Biblya Isapfunzisanji. Peno mungakwanise kubvunza pya cifuniro ca Nciti na dziko yapantsi na buluka penepo dingani nsolo 3 pa ulendo wakubwerezera.

⁴ Ku Xikola: Khala muli ku xikola, thangwi yanji nkhabe kugawira Despertai! yakupambulika ninga muoni kwa apfunzisi anu na anyakupfunza anzanu? Kusiya basi Despertai! ibodzi pa meza yanu ya xikola kungakwanise kusosa mabvunzo a pikhulupiro pyanu. Panango munadzakhala na mwai wa kuphatisira mphangwa zinagumanika mwenemo munatsidzikiza imwe cikhulupiro canu mungaphebwa kulonga pya cinthu consene m’sala ya xikola. Towera kukuphedzani, Despertai! ineyi iri na mphangwa za “Os Jovens Perguntam” na nsolo wakuti: “Como posso defender minha fé na criação?”

⁵ Yahova athema kutambira mbiri na kulemedzwa kubulukira ku pidacita iye. (Apok. 4:11) Tingakwanise kulemedza Nciti wathu na kuphedza anango kucita cibodzibodzi m’kugawira mwaphinga revista ya Despertai! ya nthanda ya Nyenzi.