Despertai! Yakupambulika Inafuna Kugawirwa Mu Nthanda Ya Bingu!

¹ Anthu azinji ali na mabvunzo adidi akulonga pya kufunika kwa Biblya. Khala ndi anthu adailemba, thangwi yanji isalongwa kuti ndi Mafala a Mulungu? Thangwi yanji ndisafunika kunyindira Biblya towera kutsogolera njira zanga? Kodi ndi api maphindu akubvunga ndzidzi towera kuleri na kupfunza Biblya? Kodi ndi mathumburuziro api a Biblya anafuna ine kuaphatisira? Anewa ndi mangasi a mabvunzo anafuna kudzatawirwa mu Despertai! yakupambulika ya nthanda ya Bingu ya nsolo wakuti “Será que você pode confiar na Bíblia?”

² Ife tinadzafuna kugawira Despertai! ineyi yakupambulika mu cisa cathu consene. Pingakwanisika, phatani basa pabodzi na mpingo mu utumiki wa nyumba na nyumba m’Masabudu onsene a nthanda ya Bingu towera kugawira revista ineyi. Gawirani Despertai! ineyi kwa acibale anu, anyakuendekana anu, anzanu a kubasa, apfunzisi, anzanu a kuxikola na pakucita maulendo akubwereza. Kwatani marevista anewa pa kuenda kunsika na pakucita ulendo. Akulu a mpingo angakwanise kuphemba marevista akuthimizirika towera kuti mpingo ukhale nawo akukwana.

³ Tomesani Pfunziro Ya Biblya: Mungasiya revista, mungakwanise kuikha phata towera kutomesa pfunziro ya Biblya mbamusati kumalisa makani anu. Mwacitsanzo, mungakwanise kulonga tenepa: “Ntsiku inango, ndinadzakupangisani ntawiro wa Biblya wa mbvunzo uyu: ‘Thangwi yanji Mulungu acita dziko yapantsi?’” Pa ulendo wakubwereza bwerani na bukhu yakuti Biblya Isapfunzisanji na pangizani mwanaciro nyumba tsamba 4-5, peno dingani ndima 1-3 ya nsolo 3. Njira inango ndi kulonga tenepa: “Ntsiku inango, ndinadzadinga na imwe profesiya ya Biblya yakuti iri kukwanirisika cincino.” Pakubwerera, pangizani mwanaciro nyumba nsolo 9 wa bukhu na dingani naye ndima 1-3. Panango mungakwanise kupanga mwanaciro nyumba tenepa: “Azinji asaona kukhala kwakunensa kubvesesa pinaleri iwo m’Biblya. Ntsiku inango, ndinadzakupangisani kuti munakwanisa tani kubvesesa pyadidi Biblya yanu.” Pa ulendo wakubwereza, pangizani bukhu yakuti Biblya Isapfunzisanji pabodzi na macitiro a pfunziro.

⁴ Biblya basi ndi iri na ‘pyakulembwa pyakucena,’ pyakuti pinakwanisa kuticitisa kukhala a ‘nzeru towera kupulumuka.’ (2 Tim. 3:15) Natenepa, tendeni tonsene tikhale a phinga mu kugawira Despertai! ineyi yakupambulika towera kuphedza anthu kuti apitirize kunyindira Biblya!