Kodi Mbumudatawira Tani?
1 Kodi musafuna mafala a Mulungu mbwenye musaona kukhala kwakunensa kukumbuka unyomonyomo wa nkhani za Biblya peno kunagumanika mafala akuthonyeka adalembwa m’Malemba? Kodi musafuna kuti anapiana anu abvesese mwadidi undimomwene wakutoma wa Biblya na pipfunziso? Nsolo wakuti “Qual É a Sua Resposta?” unagumanika mu Despertai! unabuluswa pa nthanda ibodzi na ibodzi pa tsamba 31 unakwanisa kuphedza anapiana na akulu towera kudziwa mwadidi Mafala a Mulungu.—Mach. 17:11.
2 Kodi munakwanisa tani kuphatisira mwadidi nsolo unoyu? Despertai! ya Janeiro ya 2006 yapereka maonero akutowerera awa: “Khalani na nzidzi towera kudinga tsamba 31 . . . Makhundu anango a pa tsamba ineyi anadzakhala akukomeresa kwa anyakuleri aciphale na acitsikana; anango anadzanensa nzeru za anyakupfunza Biblya akuthambaruka. Khundu yakuti ‘Quando Aconteceu?’ inadzakuphedzani kulemba n’themba wa caka cinapangiza nzidzi udakhalapo anthu analongwa m’Biblya na nzidzi udacitika pinthu pizinji. Ngakhale matawiro a khundu yakuti ‘Assuntos desta Revista’ adzagumanike mu revista yonsene, matawiro a mabvunzo anango mazinji anadzagumanika pa tsamba yakuthonyeka ya revista ibodzi ene, akuti anadzadindwa na malemba akuyang’ana pantsi. Thangwi yanji nkhabe kudinga mwacidikhodikho mbamusati kuleri matawiro anewa buluka penepo mbamugawana na anango pidapfunza imwe? Munakwanisa kuphatisira nsolo uyu upswa wakuti, ‘Qual É a Sua Resposta?’ ninga phata ya makani a Biblya a pa banja peno a pa nsoka.”
3 Mwandimomwene, mabanja mazinji asakomerwa kuphatisira nsolo unoyu ninga phata ya pfunziro ya banja. Mama unango alemba: “Mamunanga na ine tanyerezera kuti mbukudakhala kwanzeru kuphataniza mu pfunziro yathu ya banja nsolo wakuti ‘Para As Crianças – Procurem As Figuras’ towera kusisimula na kucitisa kufuna kwa mwana wathu wankazi wa piaka pitatu pyakubalwa. Mphyakukomeresa kakamwe kumuona kukwata Despertai! yace mwakukomerwa na kufungula matsamba onsene mpaka kugumana pikhasaka iye.” Baba unango ku Brazil alonga: “Mwananga wamamuna wa piaka pinomwe pyakubalwa na ine tisafuna kakamwe nsolo unoyu wa Despertai! Iwo waphedza Moises kubvesesa, kugumana mabvesi a Biblya, kubvesesa mabvekero a pithunzithunzi, na kubvesesa ntsiku za nthanda.” Ntsikana unango anacemerwa Ashley wa piaka pisere alemba: “Ndikupereka takhuta thangwi ya nsolo unagumanika kunkhomo kwa Despertai! wakuti ‘Qual É a Sua Resposta?’ Ndisapfunza pizinji pya Biblya kubulukira mu nsolo unoyu.”
4 Thangwi yanji nkhabe kuphatisira nsolo wakuti “Qual É a Sua Resposta?” m’midzidzi inango ninga khundu ya pfunziro yanu ya banja? Mbamudakwanisa kuphatisira Índice peno Watchtower Library mu CD-ROM towera kusaka matawiro a mabvunzo anango akunensa kakamwe. Mu kucita pyenepi, munadzakwanisa kupfunzisa ana anu kudinga. Khala imwe muli na ana athunga, thangwi yanji nkhabe kuaphemba kusaka matawiro akunensa a misolo yakuti “Quem Sou Eu?” peno “Quando Aconteceu?” mbamusati kutoma pfunziro ya banja? Buluka penepo iwo mbadakwanisa kugawana kudinga kwawo nkati mwa pfunziro. Kuphatisira mwadidi tsamba ineyi ndi njira ibodzi yakuti anyakubala anakwanisa kukhomera Mafala a Mulungu mwa ana awo, mbaaphedza kudziwa “mabukhu [pyakulembwa] akuchena” mu uwana wawo.—2 Tim. 3:15; Deut. 6:7.
[Study Questions]
1. Kodi azinji a ife asathimbana na nyatwa zipi?
2. Kodi makhundu akusiyana-siyana a nsolo wakuti “Qual É a Sua Resposta?” anakwanisa kuphatisirwa tani?
3. Kodi mabanja anango aphindula tani na nsolo unoyu, na ndi khundu ipi inakomerwa na imwe kakamwe?
4. Kodi inakwanisa tani banja kuphatisira nsolo unoyu towera kuthimizira pfunziro yawo ya Biblya ya pa banja?