Kodi Imwe Mukuiphatisira Mwadidi?
1 Pidamala mulongo unango kuleri A Sentinela ya 1.° de Janeiro de 2008, iye alemba: “Ine nkhabe dikhira kuiphatisira mu utumiki wa m’munda!” Kodi imwe mwadinga kale misolo inabwera mwakukhonda phonya mu revista ya edição para o público (Revista ya Anthu Onsene), na mwagumana njira zakuiphatisira mwadidi mu utumiki wanu wa m’munda?
2 “O Que Aprendemos de Jesus”: Panango imwe mwaona nsolo unoyu kukhala wakuphedza towera kutomesa mapfunziro a Biblya. Khala mudzati kupicita kale, yeserani kuleri nsolo ubodzi kwa mwanaciro nyumba na buluka penepo mpangizeni pidalonga Yezu thangwi ya ntsonga ineyi, ninga pidalongwa pa ndima yakutoma. Munthu angapangiza kufuna pa ulendo wakutoma, wangisirani towera kupitiriza na makani mukuphatisira misolo ming’ono, yakuti yaikhwa ninga mibvunzo yakucitisa kunyerezera. Phembani munthu unoyu towera atawire mbvunzo. Mwacigwagwa fokotozani pithunzithunzi pinabverana na ndima ineyi, na buluka penepo ndokoni pa ndima yakutowerera. Panango imwe munakwanisa kufokotoza khundu yakutoma ya nsolo pa ulendo wakutoma na kumalisa khundu idasala pa ulendo wakubwereza. Khalani wakukhunganyika towera kupitiriza na pfunziro m’bukhu Biblya Isapfunzisanji.
3 “Como Ter uma Família Feliz”: Nsolo unoyu, usabwera pakupita nthanda zitatu, wakuti uli na cifuno cakuphedza amuna na akazi akumanga banja, pabodzi na anyakubala towera aone kuti anaphatisira tani midida ya Biblya pakuthimbana na nyatwa zinacitisa kuti ntendere wa banja umale. Imwe munakwanisambo kuphatisira misolo ineyi towera kuphedza anthu akukhonda khala Amboni towera kuona udziwisi unagumanika m’Biblya.—2 Tim. 3:16, 17.
4 Makhundu A Anapiana: Nsolo wakuti “Para os Jovens” unabwera mu revista usapasa miyai anyakuleri towera kunyerezera piri m’Biblya na kuona kuti anakwanisa tani kupiphatisira. Imwe munakwanisa kuphatisira misolo ineyi towera kuphedza anapiana anagumana imwe mu utumiki wanu wa m’munda towera aone udidi wakupfunza Mafala a Mulungu. (Sal. 119:9, 105) Munalonga imwe na anyakubala, munakwanisa kugomezera nsolo wakuti “Ensine Seus Filhos,” unabwera pakupita nthanda ibodzi. Misolo ineyi inakwanisa kuphedza anang’ono kupfunza mapfunziro akufunika kubulukira kwa anthu analongwa m’Biblya. Kodi imwe mwatoma kale kuleri misolo ineyi na ananu?
5 Makhundu Anango: Nthanda zonsene, nsolo wakuti “Nossos Leitores Perguntam” usadinga mbvunzo wakuti anthu akukhonda khala Amboni anakwanisa kuucita. Imwe munakwanisa kugomezera nsolo unoyu munagawira imwe marevista ku nyumba na nyumba. Nsolo wakuti “Uma Carta de . . . ” ndi cipangizo cadidi ca mbiri ya umaso wa munthu paekha yakupangiza pinenso pinathimbana na amisionaryo na abale anango mu kukwanirisa utumiki wawo. Misolo ineyi inakwanisa kuphedza anthu anapangiza cifuno kuona kuti mphangwa zadidi ziri kumwazwa pa dziko yonsene yapantsi, mu kukwanirisa cidzindikiro ca kudza kwa Kristu.—Mat. 24:3, 14.
6 Nsolo wakuti “Achegue-se a Deus,” unabwera nthanda zonsene, unabuluswa mu kuleri Biblya kwa Xikola Ya Utumiki Wa Mulungu, unakwanisa kucitisa anthu a mitima yadidi kufuna kupfunza pizinji pya Yahova. Nsolo wakuti “Imite a Sua Fé,” unabwera kanai pa caka, uli na cifuno cakuphedza anthu kuona mwadidi pyakucitika pya m’Biblya, anthu analongwa m’Biblya—pyakusankhula pyawo, pinenso pyawo, cikhulupiro cawo—kukhala pyandimomwene mu umaso wa anyakuleri a lero.
7 Ndi pyakukomeresa tani kwa ife kutambira nthanda zonsene revista ya A Sentinela yakuti isacitwa towera iphatisirwe mu utumiki! Natenepa, tendeni tidziwe mwadidi pinalonga iyo na kuiphatisira mwadidi mu utumiki wathu.