Misolo Yakuti Inatiphedza Kakamwe mu Utumiki Wathu
1. Kodi misolo yakuti “Kucedza thangwi ya Bhibhlya” iri na pifuno pipi piwiri?
1 Ndzidzi na ndzidzi, revista ya Ncenjezi ya anthu onsene isabulusa misolo yakuti “Uma conversa sobre a Bíblia [Kucedza thangwi ya Bhibhlya.”] Misolo ineyi iri na pifuno piwiri, toera kupangiza pipfundziso pya Bhibhlya mu njira yakubveka mwadidi, pontho toera kutipangiza kuti tinakwanisa tani kunyerezera mwaluso mu pinthu pinango. (1 Ped. 3:15) Kodi tinaphatisira tani mwadidi misolo ineyi?
2. Tinaphatisira tani misolo ineyi ya revista mu utumiki wathu?
2 Iphatisireni mu Utumiki: Panango munakwanisa kukoya marevista a Ncenjezi analonga pya misolo ineyi. Khala mwanaciro nyumba, peno munthu adapangiza cifuno, peno nyakupfundza Bhibhlya acita mbvundzo wakuti wadingwa mu ubodzi mwa misolo ineyi, mpaseni revista idatawira mbvundzo unoyu na perekekani toera kuudinga. Khala imwe nkhabe revista ineyi, panango munakwanisa kuicita download mu jw.org.
3. Tinakwanisa tani kudinga nsolo ubodzi na mwanaciro nyumba?
3 Kodi munakwanisa tani kudinga na munthu nsolo ubodzi mwa misolo ineyi? Anango asaphemba munthu toera kuleri mwakugaluza kucedza kwa mafala a Bhibhlya, mu ndzidzi unaleri iwo mafala akupereka Umboni. Mphangwa zenezi zinakwanisa kunkhuya thangwi zisacitisa munthu toera kudinga pikhulupiro pyathu mu njira yakuti nee anaipirwa.—Deut. 32:2.
4. Tinaphatisira tani misolo ineyi toera kupfundzisika tekhene?
4 Pfundzani na Pfundzisanimbo Anango: Mu ndzidzi unaleri imwe misolo ineyi, onani malemba, misangani, na manyerezero. Onani kufunika kwa mphangwa zenezi. Buluka penepo, yeserani kuphatisira njira ibodzi ene mu utumiki wanu. (Mis. 1:5; 9:9) Mulongo m’bodzi alonga, “Kuleri misolo ineyi ndi ninga kupfundza kubulukira kwa xamwali ‘waungwiro’ wakuti ndi mpainiya anadziwa ndzidzi onsene pinthu pyadidi toera kulonga!”
5. Tinaphedza tani anyakupfundza athu a Bhibhlya toera kukhunganyika mu utumiki?
5 Munakwanisambo kuphatisira pitsandzo pinagumanika m’misolo ineyi toera kuphedza anyakupfundza anu a Bhibhlya toera kukhunganyika mu utumiki. Lerini mphangwa zenezi pabodzi, phembani anyakupfundza toera kucita khundu ya m’mwazi mphangwa. Mu njira ineyi, anyakupfundza Bhibhlya anakwanisa kulonga pikhulupiro pyawo mwaluso. (Akol. 4:6) Mwandimomwene, misolo ineyi ndi njira ibodzi mu njira zizinji zakuti zisatiphedza toera ‘kucita pyonsene’ mu utumiki wathu.—2 Tim. 4:5.