Thangwi Yanji Tisabwerera Mwakubwereza-bwereza
1 M’mbuto zizinji, tisakwanisa kumalisa cisa cathu m’maulendo mazinji. Mbwenye tisapitiriza kubwerera ku zinyumba zibodzi zene mwakubwereza-bwereza, mbitidziwa kuti mwanaciro nyumba atipanga kuti iye nkhabe funa. Thangwi yanji tisapitiriza basi kulonga na ale akuti nee apangiza kufuna pa ulendo wakutoma?
2 Kufuna Yahova Na Anthu: Thangwi yakutoma inaticitisa kupirira mu utumiki ndi kufuna kwathu Yahova. Ntima wathu usatikulumiza kupitiriza kupanga anango pya Mulungu wathu wankulu. (Luka 6:45) Kufuna kwathu Yahova kusatikulumiza kubvera matongero ace na kuphedza anango kuti acitembo cibodzibodzi. (Mis. 27:11; 1 Jwau 5:3) Kupirira kwathu mwakukhulupirika m’basa ineyi nee kusanyindira matawiro a anthu tayu. Ngakhale mu nzidzi ukhatcingwa Akristu a piaka dzana yakutoma, iwo apitiriza kumwaza mphangwa “nee kupuma.” (Mach. 5:42) Anthu angakhonda kutibvesera, mbuto mwa kusiya kuti pyenepi pipungule mphinga yathu, ife tisapitiriza kukhala akukhulupirika, mbitipangiza kukula kwa kufuna kwathu na kuperekeka kwathu kwa Yahova.
3 Pontho ife tisapirira thangwi ya kufuna anyakuendekana athu. (Luka 10:27) Yahova nkhabe funa kuti munthu atayike peno afudzwe. (2 Ped. 3:9) Ngakhale mu cisa cakuphatwa basa m’maulendo mazinji, ife tisagumana basi ale anafuna kutumikira Yahova. Mwacitsanzo, ku Guadalupe, munthu 1 mwa anthu 56 ndi Mboni ya Yahova na 214 abatizwa caka cidamala. Nkhubveka kuti cifupi na anthu 20.000 agumanika pa Cikumbuso, cifupi na munthu 1 mwa anthu 22 a ku Guadalupe!
4 Macinjo Mu Cisa: Makhaliro mu cisa cathu asacinja ntsiku na ntsiku. Panango pa nyumba idaenda ife mbitikhonda kugumana anthu akufuna kubva—pa ulenda unango m’bodzi wa pabanja wakuti cipo adzati kubva mphangwa—angakwanise kufungula nsuwo mbabvesera. Panango tingakwanise kugumana akhali anango akuti asafuna kubva mphangwa. Anapiana akuti ali na anyakubala akupingiza asakula na asabuluka panyumba. Anthu anewa angakwanise kufuna kubva mphangwa za Umambo.
5 Pontho anthu asacinja. Mu nzidzi unango mpostolo Paulu akhali “nyakuxola, nyakutchinga na nyakunyoza.” (1 Tim. 1:13) Mu njira ibodzibodzi, azinji anatumikira Yahova lero kalene nee akhafuna undimomwene tayu. Ngakhale anango mu nzidzi wakale akhali apingizi a mphangwa zadidi. Munacinja makhaliro a dziko, apingizi anango peno ale akuti nee akhafuna kubva angakwanise kukhala na cipendamiro cakufuna kubva. Anango angafune kakamwe kubva pakumala kutamba cidengwa, panango kuferwa pa banja, kuluza basa, nyatwa ya kusowa kobiri, peno nyatwa ya ungumi.
6 Makhaliro ano a pinthu akufika kunkhomo, mbwenye basa yathu ya kumwaza mphangwa na kupfunzisa ndi yakucimbiza. (Iza. 60:22) Ndi thangwi yace ife tisapitiriza kumwaza mphangwa na phinga mbitipitiriza kukhala na nkhaliro wadidi. Munthu unango anafuna kulonga na ife panango anabvesera. Ife tisafunika kupitiriza na kulonga na anthu! ‘Mu kucita pyenepi tinadzapulumusika ife ene na ale anatibvera.’—1 Tim. 4:16.
[Study Questions]
1. Kodi ndi mbvunzo upi unaoneka thangwi ya basa yathu ya kumwaza mphangwa?
2. Kodi ndi ipi thangwi yakutoma inaticitisa kupirira mu utumiki?
3. Kodi kufuna anthu kusatiphedza tani kupitiriza kumwaza mphangwa?
4. Kodi pisa pisacinja mu njira zipi?
5. Kodi ndi ninji pyakuti panango pisacitisa anthu kudzakhala akufuna kakamwe kubvesera mphangwa?
6. Thangwi yanji tisafunika kupitiriza kumwaza mphangwa mwaphinga?