Mwazani Mphangwa Mbamukhonda Kubwerera Nduli
1 M’midzidzi inango, tinakwanisa kunyerezera kuti cisa cathu caphatwa basa kazinji kene mbwenye anthu hadapangiza maka kufuna tayu. Ngakhale tenepo, pana mathangwi adidi akupitiriza kumwaza mphangwa.—Mat. 28:19, 20.
2 Towera Kupereka Umboni: Yezu alongeratu kuti kumwaza mphangwa za Umambo kunadzacita khundu yakufunika ya cidzindikiro ca “kumala kwa pantsi pano [peno kwa makhaliro a pinthu]” na pyenepi pinadzacitwa ‘towera kupereka umboni kwa anthu a mitundu yonsene.’ (Mat. 24:3, 14) Munationa anthu mbitikacita khundu mu kumwaza mphangwa zadidi za Umambo, umboni wamphambvu usaperekwa. Pakubuluka pa cisa, anthu anango anakwanisa kulonga pya ife mu ndzidzi peno ntsiku zizinji, ngakhale kuti iwo hadabvesera tayu mphangwa. Kudziwa mathangwi a utumiki wathu kusatiphedza kupirira. Ife tisakomeresa Yahova mu kucita khundu ya kukwanirisa profesiya ya Biblya mu kupereka umboni na kudziwisa mphangwa za cenjezo.—2 Ates. 1:6-9.
3 Kupirira Ndi Kwakufunika: Nakuti anthu ali na pidzudzumiso pabodzi na pinthu pizinji pinaabvungira ndzidzi, ife tisafunika kukhala akupirira munawangisira ife kukulisa cifuno cawo. Nkazi unango amala caka camumphu mbakacedzerwa masumana onsene mbasati kutawirisa Amboni kupita n’nyumba mwace towera kudinga Biblya. Mbwenye ntsiku inango aatawirisa na afuna kakamwe pidabva iye kwakuti atawira pfunziro ya Biblya, atoma kuenda ku misonkhano na mwakukhonda dembuka apangiza cifuno ca kubatizwa.
4 Makhaliro a dziko na a anthu ali kucinja mwakucimbiza. Azinji adakhonda kutitambira ndulimu, panango cincino anakwanisa kukhala akufuna kakamwe kubvesera mphangwa za cidikhiro zinalonga ife. Munthu ene m’bodzi basi angatawira mphangwa za Umambo, kupirira kwathu kunadzakhala kwakuphindulisa.
5 Pa dziko yonsene yapantsi, anthu azinji kakamwe ali ‘akutsukwala thangwi ya pinthu pyakuipa pinachitika.’ (Ezek. 9:4) Maphindu a kumwaza kwathu mphangwa asapangiza kuti ale anafuna asatawira mphangwa za Umambo. (Iza. 2:2, 3) Natenepa, tendeni tipitirize kumwaza “mphangwa zadidi” za pinthu pyadidi mwakupirira.—Iza. 52:7; Mach. 5:42.