Mathangwi Khumi Na Mawiri Toera Kumwaza Mphangwa

Thangwi yanji tisamwaza mphangwa zadidi na kupfundzisa? Makamaka ndi toera kuphedza anthu a mitima yadidi kuti apite mu njira ya umaso? (Mat. 7:14) Ineyi ndi thangwi yakutoma, mbwenye nee ndi thangwi yakufunika kakamwe inaticitisa kumwaza mphangwa na kupfundzisa anthu. Ndi thangwi ipi m’mathangwi 12 anatowerera inaona imwe kuti ndi yakufunika kakamwe toera kucita utumiki?

1. Usaphedza toera kupulumusa umaso.—Jwau 17:3.

2. Usacenjeza anthu akuipa.—Ezek. 3:18, 19.

3. Usacita khundu mu kukwanirisika kwa profesiya ya Bhibhlya.—Mat. 24:14.

4. Ndi cipangizo ca ulungami wa Mulungu. Natenepa, nee munthu m’bodzi anakwanisa kulonga kuti Yahova nee apasa mwai anthu akuipa toera kutcinyuka mbadzati kufudzwa.—Mach. 17:30, 31; 1 Tim. 2:3, 4.

5. Usatitawirisa toera kulipa mangawa athu akuphedza anthu mwauzimu adagulwa na ciropa ca Yezu.—Arom. 1:14, 15.

6. Usaticitisa kucalira kukhala na mulando wa ciropa.—Mach. 20:26, 27.

7. Ndi wakufunika toera kupulumuswa kwathu.—Ezek. 3:19; Arom. 10:9, 10.

8. Usapangiza ufuni kuna anyakuendekana athu.—Mat. 22:39.

9. Usapangiza kubvera Yahova pabodzi na Mwanace.—Mat. 28:18, 19.

10. Usacita khundu ya ulambiri wathu.—Aheb. 13:15.

11. Usapangiza kuti tisafuna Mulungu.—1 Jwau 5:3.

12. Usaphedza kucenesa dzina ya Yahova.—Iza. 43:10-12; Mat. 6:9.

Mwandimomwene, anewa nee ndi mathangwi onsene anaticitisa toera kucita utumiki. Mwacitsandzo, kumwaza mphangwa kusawangisa cikhulupiro cathu, pontho kusatipasa mwai wakupambulika toera kukhala anyakuphedza a Mulungu. (1 Akor. 3:9) Natenepa, thangwi yakufunika kakamwe toera kucita khundu mu utumiki ndi ya numero 12. Khala anthu asabvesera peno nkhabe, utumiki usaphedza kucenesa dzina ya Mulungu na usacitisa Yahova kutawira ule ananxola. (Mis. 27:11) Mwandimomwene, ife tiri na mathangwi adidi toera kupitiriza ‘kupfundzisa na kumwaza mphangwa zadidi nee kupuma.’—Mach. 5:42.