Kulambira Yahova Ninga Banja
1 M’midzidzi ya Biblya, piwalo pya banja pikhacita pinthu pizinji pabodzi. Iwo akhacita mabasa awo a ntsiku na ntsiku na kupiringana pyonsene iwo akhalambira Yahova ninga banja. (Lev. 10:12-14; Deut. 31:12) Lero, m’mbuto zizinji, piwalo pya banja nkhabe kucita pizinji pabodzi. Mbwenye Akristu asadziwa kufunika kwa kucita pinthu pabodzi ninga banja, makamaka pingakhala pya ulambiri. Pisakhala pyakukomeresa tani kwa Ntomesi wa banja kuona mabanja mbakamulambira mu ubodzi!
2 Kumwaza Mphangwa Pabodzi: Kuphata basa pabodzi pa kumwaza mphangwa zadidi kusawangisa uxamwali wa banja. Natenepa, mwakuthimizira towera kuperekera anango a m’mpingo kuenda kamwaza mphangwa, nkulu wa mpingo asafunikambo nzidzi onsene kuphata basa pabodzi na nkazace na anace. (1 Tim. 3:4, 5) Ngakhale ayang’aniri akufamba-famba akhale na basa ikulu, iwo asasakambo nzidzi towera kuphata basa pabodzi na akazawo mu utumiki.
3 Anyakubala anaphata basa na anawo asakwanisa kuaphedza kukhala akuthambaruka ninga amwazi mphangwa. Ana nee anadzaona kutsanzaya na kukomerwa kwa anyakubalawo mu utumiki basi tayu mbwenyembo anadzaona anyakubalawo mbakapangiza kufuna kwawo Yahova na anthu anzawo. (Deut. 6:5-7) Kufunika kwa anyakubala kumwaza mphangwa na anawo anakhala panyumba nee kusafunika kuti kupunguke iwo angakula tayu. Banja inango yakukhala na ana atatu a piaka pakati pa 15 na 21 isapitiriza kuperekera anawo mu utumiki mwakukhonda phonya. Baba alonga: “Ife tisaapfunzisa cinthu cipswa nzidzi onsene. Na ife tisawangisira kuti nzidzi unoyu ukhale wakukomeresa na wakuwangisa.”
4 Kukhunganyika Pabodzi: Mabanja asaona kukhala kwakuphindulisa kukhunganyika towera kuenda mu utumiki pabodzi. Ana kazinji kene asakomerwa kuyesera mwanyapantsi uperekero umboni na piwalo pya pabanja, mbakhala mwazi mphangwa peno mwanaciro nyumba. Anango asaphatisira mphindi zingasi pakumala pfunziro ya banja towera kucita pyenepi.
5 Kukomerwa kwathu kusathimizirika munacita ife mabasa akufunika na akuphindulisa kakamwe na anthu ale anafuna ife. Ndi pyakukomeresa tani kwa piwalo pya banja kuphata basa pabodzi mu utumiki wa m’munda wa nyumba na nyumba pabodzi na kucita maulendo akubwereza na kucitisa mapfunziro a Biblya! Munalambira imwe natenepa Yahova pabodzi na banja yanu, mungakwanise kulonga mwakukomerwa: “Mbwenye ine na nyumba yanga tinaphatira Mbuya.”—Yoswa 24:15.