Tonsene Tingakwanise Kuwangisana Unango Na Nzace
1 Mpostolo Paulu alembera mpingo wa ku Roma tenepa: “Ndinafuna pikulu pyene kukuonani mbandikupasani pya muwoni udandipasa Nzimu wa Mulungu, towera kukuwangisani napyo. Makamaka ndinafuna kukhala na imwe, towera tiwangisane munthu munthu na kutawira kwache.” (Arom. 1:11, 12, Mphangwa Zadidi) Kucedzeswa m’midzidzi yathu ino na ayang’aniri akufamba-famba kusapereka miyai ineyi towera kuwangisana unango na nzace.
2 Mpingo: Kucedzesa kwa muyang’aniri wa cisa kazinji kene kusadziwiswa m’mpingo cifupi na nthanda zitatu mwanyapantsi. Pyenepi pisatipasa ndzidzi towera kucinja ndandanda wathu kuti tiphindule mwadidi na kucedzesa kweneku. (Aef. 5:15, 16) Khala musaphata basa ya dziko, panango mungakwanise kuphemba maferya towera muphedze basa ya utumiki wa m’munda nkati mwa sumana ineyi. Anango asacita masasanyiro towera akhale apainiya akuphedza nkati mwa nthanda ya kucedzeswa. Khala musafuna kucita ulendo, kodi mungakwanise kuucinja towera mugumanike pa sumana ineyi?
3 Cifuniro cakutoma ca kucedzesa kwa muyang’aniri wa cisa ndi kupereka ciwangiso na kupfunzisa mu utumiki wa m’munda. Thangwi yanji imwe nkhabe kumphemba towera muphate naye basa pabodzi peno kuphata na nkazace khala ali naye? Muyang’aniri wa cisa asakomerwa kuphata basa na amwazi mphangwa akusiyanasiyana, kuphataniza ale akuti nkhabe luso izinji peno akuti asafuna kuthimizira luso yawo mu utumiki. Tonsene tingakwanise kupfunza kubulukira ku maperekero ace umboni na kuphatisira maonero akuti angakwanise kuapereka mu njira yadidi. (1 Akor. 4:16, 17) Kumphemba kuti mukadye padodzi kunyumba kwanu kungakwanisembo kufungula mwai unango wa kuwangisana unango na nzace. (Aheb. 13:2) Nakuti nkhani zace asazicita mwakubverana na pyakufuna pyapampingo, zibvesereni mwacidikhodikho.
4 Muyang’aniri Wa Cisa: Mpostolo Paulu akhali sawasawa na abale m’mipingo. Iye atambambo nyatwa na pinenso, ndi thangwi yace akhafuna na akhapereka takhuta thangwi ya ciwangiso cikhapaswa iye. (2 Akor. 11:26-28) Pidadziwa mpingo wa ku Roma kuti Paulu akhali nkalaboxo, iwo wabwera kudzamuona, anango aenda ku Nsika wa Apio towera kagumana naye—nsinzo wa makilometru 74! “Paulu na kuaona, achita Mulungu takhuta mbakhala na chipapo.” (Mach. 28:15, MZ) Imwembo mungakwanise kuwangisa muyang’aniri wanu wa cisa. Pangizani kuti ‘musamulemedza’ kakamwe mukuphedza mwaphinga kucedzesa kwace. (1 Tim. 5:17) Longani na pangizani kupereka kwanu takhuta thangwi ya kuwangisira kwace towera kukuphedzani. Iye na nkazace anadzakomerwa angaona cikhulupiro canu, kufuna kwanu na kupirira kwanu.—2 Ates. 1:3, 4.
5 ‘M’midzidzi ino yakugopswa,’ kodi mbani mwa ife anakhonda funa ciwangiso? (2 Tim. 3:1) Khalani wakuzitonga cincino kucita khundu mwakukwana m’mabasa a sumana yakupambulika ya kucedzesa kwa muyang’aniri wa cisa. Ife tonsene—ayang’aniri akufamba-famba na amwazi mphangwa m’mpingo—tingakwanise kucita khundu mwakukomerwa mu kuwangisana unango na nzace. Mu njira ineyi, tinadzapitirizambo ‘kubalangazana na kuphedzana unango na nzace.’—1 Ates. 5:11.
[Study Questions]
1. Kodi ndi miyai ipi yakupambulika inaperekwa na kucedzesa kwa ayang’aniri akufamba-famba?
2. Thangwi yanji kucedzesa kwa muyang’aniri wa cisa kusadziwiswa mwanyapantsi?
3. Kodi m’bodzi na m’bodzi wa ife angakwanise kucitanji nkati mwa kucedzeswa towera akhale wakuwangiswa?
4. Kodi tinakwanisa tani kuwangisa muyang’aniri wathu wa cisa?
5. Thangwi yanji ife tonsene tisafuna ciwangiso lero?