KUKHALA MASO NINGA AKRISTU
‘Paulu Apereka Takhuta Kuna Mulungu Mbakhala na Cipapo’
Pidadziwa abale a ku Roma kuti Paulu akhaenda kweneku, nsoka wa abale wacita ulendo wa makilometru 64 toera kuenda kantambira. Kodi Paulu apibva tani pidaona iye kuwangisira kudacita abale toera kudzantambira? Bhibhlya isalonga: ‘Pidaaona iye, apereka takhuta kuna Mulungu mbakhala na cipapo.’ (Mabasa 28:15) Maseze Paulu akhadziwika ninga munthu wakuti akhawangisa mipingo ikhacedzera iye, mbwenye pikhali iye nkaidi, iye ndiye atambira ciwangiso.—2 Akor. 13:10.
Lero, ayang’aniri a cisa asacedzera mipingo toera kuwangisa abale na alongo. Mbwenye ninga pinacitikirambo atumiki a Mulungu onsene, m’midzidzi inango iwo asakhalambo akuneta, akupswipa ntima na akufewa manungo. Natenepa, muyang’aniri wa cisa na nkazace angabwera kudzacedzera mpingo wanu, kodi munacitanji toera iwo ‘awangise cikhulupiro canu, imwembo muwangise cawo’?—Aroma 1:11, 12.
Gumanikani pa misonkhano ya basa ya m’munda. Muyang’aniri wa cisa asawanga manungo angaona kuwangisira kwa amwazi mphangwa toera kuphedzera sumana yakupambulika. (1 Ates. 1:2, 3; 2:20) Pontho pinakhala pyadidi kakamwe mungatumikira ninga mpainiya wakuphedza m’mwezi wakucedzerwa. Kodi muli dzololo toera kuenda kamwaza mphangwa peno kacitisa mapfundziro a Bhibhlya na muyang’aniri wa cisa peno na nkazace? Iwo asakomerwa kakamwe kuphata basa na amwazi mphangwa akusiyana-siyana kuphatanizambo apswa peno ale akuti nee ali na maluso mazinji akumwaza mphangwa.
Khalani akutambira alendo. Kodi imwe munakwanisa kutambira muyang’aniri wa cisa na nkazace kunyumba kwanu peno kuacemera kuti abwere kudzadya? Mungacita pyenepi, munapangiza kuti musaafuna kakamwe. Iwo nkhabe dikhira kuti mucite pinakhonda imwe kukwanisa.—Luka 10:38-42.
Mbvereni, pontho phatisirani pitsogolero na uphungu wace. Mwaufuni muyang’aniri wa cisa asatiphedza toera kuona kuti tinatumikira tani Yahova munjira yadidi. M’midzidzi inango, iye asatipasa uphungu. (1 Akor. 5:1-5) Pontho iye asakomerwa tingabvera na kutawira na ntima onsene citsogolero cace.—Aheb. 13:17.
Perekani takhuta. Pangani muyang’aniri wa cisa na nkazace kuti kuwangisira kwawo kusakuphedzani tani. Imwe munakwanisa kuapanga mabvero anu nkhope na nkhope peno kuatumizira tsamba.—Akol. 3:15.