Khalani Ntumiki Wakuthambaruka
1 Babathu wakudzulu asakomerwa anzakazi ace angakula mwauzimu. Pyenepi pisaphataniza kuthambaruka ninga atumiki akukola na akubala misapo a mphangwa zadidi. Paulu adembetera munyang’aniri Timoti kuti apitirize kuwangisira towera kuthambaruka kwace kuonekere. (1 Tim. 4:13-15) Ife tonsene tisafunika kuwangisira towera tisasanyire utumiki wathu, ngakhale ale akuti ndi amwazi mphangwa a luso pakati pathu.
2 Khalani Na Pifuno Pyanu Pyene: Towera tithambaruke tisafunika kukhala na pifuno pyathu pyene. Kodi ndi pipi pifuno pingasi pyakuti tisafunika kukhala napyo? Ife tingakwanise kuwangisira towera tikhale a luso kakamwe pakuphatisira supada yathu yauzimu, Biblya. (Aef. 6:17) Panango pana makhundu anango a utumiki anafunika ife kuasasanyira, ninga kupereka umboni mu nseu, mu kuphatisira ntokodzi, peno kuphata basa mu cisa ca malonda. Panango tisafunika kuwangisira towera kucita maulendo akubwereza akubala misapo. Cifuno cinango cadidi kakamwe cingakwanise kukhala ca kuthimizira luso yathu yakutomesa na kucitisa mapfunziro a Biblya.
3 Masasanyiro: Misonkhano ya mpingo, makamaka Xikola Ya Utumiki Wa Mulungu na Nsonkhano Wa Basa, isacitwa towera kutiphedza kuti tithambaruke ninga atumiki. Tingawangisira kakamwe kukhunganyika mwadidi na kugumanika m’misonkhano ineyi na kuphatisira pinapfunza ife, mwandimomwene tinadzaphindula kakamwe.—2 Akor. 9:6.
4 Pontho tisafunika kuphedzana unango na nzace towera tithambaruke. (Mis. 27:17) Kubvesera mwacidikhodikho maperekero umboni a ale anaphata na ife basa mu utumiki kunadzatiphedza kuti tithambaruke. Kusiyapo pyenepi, muyang’aniri wathu wa pfunziro ya bukhu angakwanise kucita masasanyiro towera titambire ciphedzo. Ndi nkhombo tani kukhala na mpainiya waluso peno m’mwazi mphangwa unango towera atiphedze kuti tikhale akubala misapo na kukhala na citsanzayo cikulu mu utumiki! Kodi pa pfunziro yathu ya bukhu pana m’mwazi mphangwa mupswa? Panango tingakwanise kumphemba kuti aphate basa na ife.
5 Basa yakufunika kakamwe inacitwa lero ndi utumiki Wacikristu. Munapasa ife Yahova “ntsembe ya kunsimba,” tisafunika kumpasa pyonsene pinakwanisa ife. (Aheb. 13:15) Ife tingawangisira kuti tithambaruke mu utumiki, tinadzakhala ninga mamuna wakuphata basa wakuti nkhabe “manyadzo, wakudziwa kulonga na kulungama mafala a udidi.”—2 Tim. 2:15.