‘Kulonda Manyalo Ache Mwapaduzi’
1 Yezu hadapfunza ku maxikola akupfunzisa uphemberi Aciyuda tayu, mbwenye iye akhali Ntumiki wankulu kakamwe m’mbiri. Pyakukomeresa ndi pyakuti alembwa mafala akulonga pya utumiki wa Yezu towera atiphedze. Towera tikhale atumiki akubala misapo, tisafunika ‘kulonda manyalo ache mwapaduzi.’—1 Ped. 2:21.
1. Kodi tinakwanisa tani kukhala atumiki akubala misapo?
2 Pangizani Ufuni Kwa Anthu: Kutsalakana anthu mwakufuna kuakulumiza Yezu. (Mko. 6:30-34) Anthu azinji mu cisa cathu asatamba “nyatwa” na asafunika kupfunziswa undimomwene. (Arom. 8:22) Kunyerezera kwathu n’khaliro wawo wakusowa cidikhiro na citsalakano cakufuna ca Yahova kwa iwo kunadzatikulumiza kupitiriza kumwaza mphangwa. (2 Ped. 3:9) Kusiyapo pyenepi, anthu anadzafuna kakamwe kubvesera mphangwa zathu angaona kuti ife tisaatsalakanadi.
2. Kodi ndi ninji cinafuna kudzatiphedza kukulisa ufuni ninga ukhali na Kristu kwa anthu?
3 Longani Pa Miyai Yonsene: Yezu akhabanza miyai yonsene towera kugawana mphangwa zadidi na anango. (Mat. 4:23; 9:9; Jwau 4:7-10) Mu njira ibodzibodzi, ife tisafunika kukhala akukhunganyika towera kulonga pya undimomwene munacita ife mabasa athu a ntsiku na ntsiku. Anango asafamba na Biblya na mabukhu towera akwanise kupereka umboni kubasa, kuxikola, pakucita ulendo na pakuenda kagula, na pakucita pinango.
3. Kodi Yezu amwaza mphangwa kwa anango m’midzidzi ipi?
4 Kugomezera Umambo: Mphangwa zadidi za Umambo zikhali nsolo wa kumwaza mphangwa kwa Yezu. (Luka 4:43) Maseze maperekero athu umboni angakwanise kukhonda kulongeratu peno kutculula Umambo, ife tisafunika kuphedza mwanaciro nyumba kuona kufunika kwa umambo unoyu. Ngakhale munalonga ife makhaliro akuipa a dziko anapangiza kuti tikukhala mu ntsiku zakumalisa, pakutoma ife tisamwaza ‘mphangwa zadidi za pinthu pyadidi.’—Arom. 10:15.
4. Kodi tinakwanisa tani kucita Umambo kukhala nsolo wa kumwaza kwathu mphangwa?
5 Nyindirani Mafala A Mulungu: Mu utumiki onsene wa Yezu, iye akhanyindira Malemba. Iye hadapfunzisa tayu pinthu kubulukira mwa iye ene. (Jwau 7:16, 18) Iye apfunza Mafala a Mulungu na aaphatisira kwa iye ninga citsidzikizo ku manyengerero a Sathani. (Mat. 4:1-4) Towera tipfunzise anango mu njira yakuphindulisa, ife tisafunika kuleri Biblya ntsiku na ntsiku na kuphatisira pinapfunza ife. (Arom. 2:21) Munatawira ife mibvunzo mu utumiki, tisafunika kutculula Lemba towera kuphedzera ntawiro na kuleri m’Biblya mwene ndzidzi onsene unakwanisika ipyo. Tisafunika kuphedza mwanaciro nyumba kuona kuti ife nee tikulonga manyerezero athu tayu mbwenye manyerezero a Mulungu.
5. Towera utumiki wathu ukhale wakuphindulisa, kodi tisafunika kuphatisira tani Biblya?
6 Khuyani Ntima Mu Kupfunzisa Kwanu: “Chipo na chipo munthu alonga ninga munalonga munthu uyu.” (Jwau 7:46) Alonga tenepo atsacikunda pya Yezu mu ndzidzi udabvunzwa iwo na akulu a anyantsembe na Afarisi kuti thangwi yanji akhonda kummanga. Mbuto mwa kulonga kwene basi pinthu, Yezu apfunzisa mu njira yakuti yakhuya mitima ya ale akhapfunzisa iye. (Luka 24:32) Iye aphatisira misangani ya umaso wa ntsiku na ntsiku wa anthu towera kuaphedza kubvesesa mphangwa zace. (Mat. 13:34) Yezu nee alonga mphangwa zizinji kwa anyakubveserace mu ndzidzi ubodzi ene tayu. (Jwau 16:12) Iye agomezera Yahova mbuto mwa iye ene. Ninga Yezu, ife tingakwanise kukhala apfunzisi adidi tingadinga mwadidi ‘mapfunzisiro athu.’—1 Tim. 4:16.
6. Kodi Yezu acitanji towera kukhuya mitima ya anyakubveserace?
7 Pirirani Maseze Mukhonde Kubveserwa Na Mupingizwe: Maseze Yezu acite pinthu pyakudzumisa, anthu azinji hadambvesera tayu. (Luka 10:13) Ngakhale piwalo pya banja ene ya Yezu pyanyerezera kuti iye “ana nsala.” (Mko. 3:21) Ngakhale tenepo, Yezu apitiriza. Iye apitiriza na maonero ace adidi thangwi akhakhulupira kuti akhali na undimomwene wakuti mbudacitisa anthu kukhala akusudzuka. (Jwau 8:32) Na ciphedzo ca Yahova, ifembo tiri akudzitonga kuti tikhonde kufewa peno kubwerera nduli.—2 Akor. 4:1.
7. Thangwi yanji Yezu apirira mu utumiki?
8 Citani Pyonsene Towera Mucite Khundu Mwakukwana: Yezu asiya mpfuma zakumanungo thangwi ya utumiki. (Mat. 8:20) Iye amwaza mphangwa mwakukhonda neta, m’midzidzi inango mpaka namasiku. (Mko. 6:35, 36) Yezu akhadziwa kuti akhali na ndzidzi wakucepa towera acite basa. Nakuti ‘ndzidzi udasala ngung’ono,’ ifembo tisafunika kuphatisira mwadidi ndzidzi wathu, mphambvu zathu na mpfuma zathu mu kusangizira Yezu.—1 Akor. 7:29-31.
9 Akristu a piaka dzana yakutoma akhali akubala misapo mu utumiki thangwi iwo apfunza kubulukira kwa Yezu. (Mach. 4:13) Ifembo tingakwanise kukwanirisa mwadidi utumiki wathu tingasangizira Ntumiki wankulu kakamwe m’mbiri.—2 Tim. 4:5.
8, 9. Kodi tinakwanisa tani kusangizira Yezu mu kusiya pinthu pinango thangwi ya mphangwa zadidi?