Programu Ipswa Ya Ntsiku Ya Nsonkhano Wakupambulika

Nsolo wa programu ya ntsiku ya nsonkhano wakupambulika wa caka ca basa ca 2009 ndi wakuti “Pitirizani Kuonera Utumiki . . . , Towera Muukwanirise,” wakubuluswa m’bukhu ya Akolose 4:​17, Tradução do Novo Mundo. Ninga Akristu, tisaona kuti cenjezo ineyi si ya dzenda tayu. Cifuno cathu ndi cakukwanirisa utumiki wathu mwakukhulupirika, tenepa ninga pidacita Yezu. (Jwau 17:​4) Mpostolo Paulu aperekambo citsanzo cadidi kakamwe kwa ife ku khundu ineyi. Iye akhali wakudzitonga towera kumalisa basa yace mu utumiki.​​—⁠Mach. 20:⁠24.

Nkhani ya muyang’aniri wa cisa inadzapangiza kuti amwazi mphangwa akusiyana-siyana asakunda tani pinenso mu utumiki wawo. Buluka penepo nkhani yakuti “Sakulirani Pidadzwala Imwe” inadzagomezera kuti tinakwanisa tani kuphedza mwandimomwene ale “adasankhulirwa moyo wakukhonda kumala.” (Mach. 13:​48) Nyakukamba nkhani wamulendo anadzadinga pakutoma vesi na vesi ya 2 Akorinto 6:​1-​10, mu nkhani yakuti “Tinaoneka Tani Ninga Atumiki.” Namaulo, iye anadzakamba nsolo wakuti “Lemedzani Kakamwe Utumiki Wanu.” Mwakukhonda kupenula imwe munadzatambira ciwangiso mu nkhani yakuti “Aphale Na Atsikana Pabodzi Na Akulu Tsanzayani Na Utumiki” pontho na nkhani yakuti “Aphale Na Atsikana Anakwanirisa Utumiki Wawo.” Ale anafuna kupangiza kuperekeka kwawo mu kubatizwa m’madzi pa nsonkhano wa cisa peno wa ntsiku yakupambulika unafuna kudza, asafunika mwakukhonda dembuka kudziwisa muyang’aniri wakutsogolera. Khundu yakufunika kakamwe ya misonkhano yonsene ya cisa, yakupambulika na ya gawo ndi kudingwa kwa pfunziro ya A Sentinela. Kwatani revista yanu inafuna kupfunzwa sumana ya ntsiku ya nsonkhano wakupambulika.

Mu kuonera khala tiri kukwanirisa utumiki wathu, tisawangisira kudinga mwadidi kuti pifuno na mabasa anango akhonde kubvunga ndzidzi udatipasa Yahova towera kucita basa yace. Ciwangiso ca Malemba cinaperekwa kubulukira ku programu ipswa ya ntsiku ya nsonkhano wakupambulika unoyu cisafunika kutiphedza ife tonsene towera kudziwa pinafunika ife kucita towera kupitiriza kucita pinthu pyadidi na kunyerezera pinacita ife mu utumiki towera tiukwanirise mwadidi.