Mafala a Mulungu Ndi Amphambvu

1. Kodi ndi upi nsolo wa ntsiku ya nsonkhano wakupambulika wa caka ca basa 2014?

¹ Mwakusiyana na pinthu pyonsene pinacitwa na anthu akusowa ungwiro, Bhibhlya iri na mphambvu toera kuticinja, kucinja manyerezero athu na makhaliro athu mwakubverana na cifuno ca Yahova. Kodi ndi amphambvu tani Mafala a Mulungu? Tinaphatisira tani mwakukwana mphambvu ineyi mu umaso wathu? Tinaiphatisira tani mwadidi toera kuphedza anango? Tisanyindira kuti tonsene tinadzawangiswa mwauzimu nakuti ntsonga zenezi zinadzadingwa pa ntsiku ya nsonkhano wakupambulika udakhunganywa toera kucitwa mu caka ca basa 2014. Nsolo ndi wakuti: “Mafala a Mulungu Ndi Amphambvu,” wabuluswa pa Ahebere 4:12.

2. Kodi tisafunika kubvesera matawiro a mibvundzo ipi?

² Sakani Matawiro a Mibvundzo Iyi: Mu ndzidzi unabvesera imwe nsonkhano lembani matawiro a mibvundzo inagumanika pantsi apa.

• Thangwi yanji tisafunika kunyindira Mafala a Yahova? (Sal. 29:4)

• Tinakwanisa tani kuona mphambvu ya Mafala a Mulungu mu umaso wathu? (Sal. 34:8)

• Munabvekesa tani mphambvu ya Mafala a Mulungu mu utumiki wanu? (2 Tim. 3:16, 17)

• Tinacalira tani kupeuswa na mphambvu ya dziko ya Sathani? (1 Jwau 5:19)

• Kodi imwe aphale na atsikana munakwanisa tani kupembera mwauzimu? (Yer. 17:7)

• Tinakwanisa tani kukhala amphambvu ngakhale pa ndzidzi wakuti ndife akufewa? (2 Akor. 12:10)

• Kodi ninji cinafunika toera kupitiriza kucita macinjo mu umaso wathu, ngakhale kuti tiri na misambo yakuipa na makhaliro akale? (Aef. 4:23)

3. Kusiyapo kubvesera nsonkhano, ndi pinthu pipi pinango pyakuti tinadzaphindula napyo pa ntsiku ya nsonkhano wakupambulika?

³ Tinadzaphindula kakamwe mu kubvesera mphangwa zenezi zakufunika kakamwe! Mwakuthimizira, ntsiku ya nsonkhano wakupambulika, kuphataniza nsonkhano wa cisa, na nsonkhano wa gawo, inadzatipasa miyai yakufungula mitima yathu toera kutsandzaya na abale pabodzi na alongo akubuluka ku mipingo inango. (Sal. 133:1-3; 2 Akor. 6:11-13) Natenepa, khalani na ndzidzi toera kugumanyikana na axamwali anu akale, pontho citani axamwali apswa. Khala pa ntsiku yanu ya nsonkhano wakupambulika panadzagumanika nyakucita nkhani wamulendo ninga muyang’aniri wa gawo peno m’bale wakutumwa na Beteli, thangwi yanji nkhabe kubandza mwai unoyu toera kutambira mwadidi iye na nkazi wace? Mwandimomwene, tiri na mathangwi mazinji toera kudikhira ntsiku ya nsonkhano wakupambulika unafuna kudza!