Mafala a Mulungu Ndi Akuphindulisa Pakupfundzisa
1. Ndi upi nsolo wa nsonkhano wa cisa wa caka ca basa 2014, na ndi mbvundzo upi unadzatawirwa pa nsonkhano unoyu?
1 ‘Mpfundzisi wathu Wankulu,’ Yahova, ndi mpfundzisi wadidi kakamwe kudzulu na pa dziko yapantsi. (Iza. 30:20, 21) Kodi Yahova asatipfundzisa tani? Iye atipasa bukhu yakupiringana mabukhu onsene—Mafalace akupumirwa, Bhibhlya. Kodi cipfundziso ca Mulungu cisatiphindulisa tani m’manyerezero, m’manungo, na mwauzimu? Ntawiro wa mbvundzo unoyu unadzadingwa pa nsonkhano wathu wa cisa wa caka ca basa 2014. Uli na nsolo wakuti: ‘Mafala a Mulungu Ndi Akuphindulisa Pakupfundzisa,’ wabuluswa pa 2 Timoti 3:16.
2. Kodi ntsonga zikulu zinadzagomezerwa m’matawiro a mibvundzo ipi?
2 Sakani Ntsonga izi Zikulu: Ntsonga zikulu za nsonkhano zinadzagomezerwa m’matawiro a mibvundzo inatowerera:
• Cipfundziso ca Mulungu cisakhuya tani makhaliro athu? (Iza. 48:17, 18)
• Tingacinja makhaliro athu toera kutumikira Yahova mu ndzidzi onsene, kodi tinakhala na cinyindiro canji? (Mal. 3:10)
• Tisafunika kucitanji tingathimbana na ‘mapfundzisiro akusiyana-siyana’?
• Tinatowezera tani ‘mapfundzisiro’ a Yezu? (Mat. 7:28)
• Thangwi yanji apfundzisi m’mpingo asafunika kupfundzisika okhene? (Arom. 2:21)
• Ndi mu njira ipi Mafala a Mulungu ndi akuphindulisa? (2 Tim. 3:16)
• Kodi anthu asakhuyiwa tani na ‘kutekenyeswa’ kwa madzindza? (Ageu 2:6, 7)
• Kodi ndi cinyindiro cipi ciri na Yahova kwa ife? (Aef. 5:1)
• Thangwi yanji tisafunika kuwangisira toera kupitiriza mu pipfundziso pya Yahova? (Luka 13:24)
3. Thangwi yanji mphyakufunika kugumanika na kubvesera mwadidi nsonkhano unoyu wakuti wasasanywa mu ndzidzi wakuthema?
3 Mbazati kulemba mafala a nsolo wa nsonkhano anagumanika pa kapitulu 3 ya 2 Timoti, Paulu alonga pya midzidzi yakugopswa yakuti mbidapangiza ntsiku zakumalisa. Iye alemba: “Anthu akuipa na akunyengeza andzawo, anadzathimiza kuipa kwawo, mbadzadodoma, mbadzadodomesambo andzawo.” (2 Tim. 3:13) Natenepa, ife nkhabe kudzapeuswa, ndi kwakufunika tani kwa ife toera kubvesera na kuphatisira mapfundzisiro a Mulungu! Na thangwi ineyi tisafunika kudzitonga toera kugumanika na kubvesera mwadidi nsonkhano unoyu wakuti wasasanywa mu ndzidzi wakuthema.