Tsidzikizani Manyerezero Anu
1. Ndi upi nsolo wa nsonkhano wa cisa mu caka ca basa ca 2013, na ndi cipi cifuniro ca programu ineyi?
1 Yezu apfundzisa anyakupfundzace toera kufuna Yahova na ntima wawo onsene, na nzimu wawo onsene, na manyerezero awo onsene. (Mat. 22:37, 38, Tradução do Novo Mundo) Misonkhano ya gawo, ya cisa, na yakupambulika ya caka cino yakhunganywa toera kutiphedza kuwangisa uunthu wathu wankati. Khala musakumbuka, nsolo wa nsonkhano wa gawo ukhali ‘Tsidzikizani Ntima Wanu!’ Programu ya ntsiku ya nsonkhano wakupambulika wa caka ca basa ca 2013 iri na nsolo wakuti “Tsidzikizani Cikumbuntima Canu.” Misonkhano ya cisa inafuna kutoma mu nthanda inafuna kudza inadzakhala na nsolo wakuti “Tsidzikizani Manyerezero Anu,” wakubuluswa pa lemba ya Mateo 22:37, NM. Programu iyi yakhunganywa toera kuphedza m’bodzi na m’bodzi wa ife toera kudinga manyerezero athu ene na cifuniro ca kuacitisa kukhala akukomeresa kakamwe kwa Yahova.
2. Tisafunika kusaka matawiro a mibvundzo ipi nkati mwa programu ya nsonkhano wa cisa?
2 Ninji Pinafuna Kudzadingwa: Munabvesera ife nsonkhano wa cisa, tisafunika kusaka matawiro a mibvundzo iyi, yakuti isaimirira ntsonga zikulu:
• Tinakwanisa tani kucalira kukhala na ‘manyerezero a anthu’?
• Tinakwanisa tani kuphedza kubulusa nguwo inaphimbira manyerezero a anthu akukhonda khulupira?
• Ndi ntundu upi wa manyerezero anafuna ife kukhala nawo?
• Kunyerezera mwacidikhodikho pinthu pyakuthema kusabweresa maphindu api?
• Tinatawirisa tani Yahova kuumba manyerezero athu?
• Kodi amuna, akazi, anyakubala, na anapiana anaphedzera tani toera banja ikhale yakutsandzaya?
• Tinakhala tani akukhunganyika ku ntsiku ya Yahova?
• Kodi kusabvekanji kukhunganya manyerezero athu toera kuphata basa mwamphambvu?
• Ndi nkhombo zipi zinakhala na ale anaphatisira pinapfundza iwo?
3. Thangwi yanji ndi kwakufunika kugumanika pa ntsiku ziwiri zene za nsonkhano, kubvesera mwacidikhodikho, na kuphatisira pinapfundza ife?
3 Sathani akumenya nkhondo toera kuphekesa manyerezero athu. (2 Akor. 11:3) Na thangwi ineyi, tisafunika kuwangisira toera kucinjiriza manyerezero athu kuti akomerese Yahova. Tisafunika kupitiriza kupangiza manyerezero a Kristu, na kumenya nkhondo toera kucalira makhaliro akuipa a dziko ino yakusowa mwambo. (1 Akor. 2:16) Natenepa, citani masasanyiro toera kugumanika pa ntsiku ziwiri zene za nsonkhano wa cisa. Bveserani mwacidikhodikho. Kuphatisira ntsonga zakufunika zinafuna kudzaperekwa kunadzatiphedza kukhunganya manyerezero athu toera kuphata basa ya Umambo mwaphinga.—1 Ped. 1:13.