Pitsogolero kuna Ale Anacita Nkhani pa Nsonkhano wa Basa

Kutomera mu Utumiki Wathu Wa Umambo wa nthanda ino, madzina a makhundu a Nsonkhano wa Basa anadzalulupiswa. Pitsogolero na pikumbuso pinatowerera pinadzapheza kubvesesa mwadidi pitsogolero pinagumanika mu nsolo wakuti “Como se preparar para a Reunião de Serviço,” unagumanika mu Nosso Ministério do Reino de Maio de 2009.

◼ Nkhani: Ino ndi nkhani inafunika kucitwa mwakubverana na mphangwa zidaperekwa. Nkhabe kuphataniza kucedza na anyakubvesera. Nyakucita nkhani asafunika kuikha manyerezero ku pire pinaphedza kakamwe mpingo.

◼ Mibvunzo na Matawiro: Isafunika kucitwa ninga Pfunziro ya A Sentinela. Nkhani ino iri na mafala akutoma na mamalisiro acigwagwa, na musacitwa mibvunzo mu ndima zonsene. Nyakucita nkhani ineyi asafunika kucalira kulonga kakamwe. Malemba akufunika panango anakwaniswa kulerwi khala ndzidzi ulipo. Ndima nee zisafunika kulerwi tayu khala pitsogolero nkhabe phemba kuti zilerwi.

◼ Nkhani na kucedza: Nkhani ino isaphataniza kucedza pang’ono na anyakubvesera. Nkhabe funika kucitwa ninga nkhani yakuti nyakuicita analonga ekha, pontho nee isafunika kucitwa yonsene na mibvunzo na matawiro.

◼ Pitsanzo na Mibvunzo na Matawiro: Pitsogolero pya kucita citsanzo pisabveka kuti m’bale adapaswa nkhani ino asafunika kuphataniza citsanzo; nkhabe dikhirwa kuti acite ekhene citsanzo ceneci. Ale anasankhulwa towera kucita citsanzo asafunika kukhala akuthema na acitsanzo cadidi. Iye asafunika kucita masasanyiro na iwo mwanyapantsi pingakwanisika. Mphyadidi kukhonda kuphataniza amwazi mphangwa apswa akuti nee adadzolowera kucita citsanzo ca kupangiza kuti basa isafunika kucitwa tani, basi ene towera kuapasa mwai wa kukwira pa platifomu, maseze anango anaphatisirwa ninga anaciro nyumba. Amwazi mphangwa anacita citsanzo ca maperekero aumboni asafunika kucita mphole-mphole towera kukhonda kupasira nkhodolo anyakubvesera. Ale anaphatisirwa towera kucitwa mibvunzo na matawiro asafunika kukwira pa platifomu mbuto mwa kupereka matawiro awo pa mbuto idakhala iwo. Pitsanzo na mibvunzo na matawiro pisafunika kuyeserwa mwanyapantsi. Khala ndzidzi wa nsonkhano uli kumala, m’bale asafunika kugwanda khundu yace, iye anadzacalira kukhonda kucita citsanzo peno mibvunzo na matawiro. Atumiki akutumikira asafunika kulonga na m’bveranisi wa nsoka wa akulu a mpingo peno nkulu unango wa mpingo mbadzati kusankhula anthu anafuna kuphatisira iye.

Khala khundu inango iri na pitsogolero pyakuthonyeka, pyenepi pisafunika kutowezerwa mwacidikhodikho. Mukucita makhundu a Nsonkhano wa Basa mwakubverana na pidalongwa padzulu, abale anadzaphedza kuti Misonkhano ya Basa ‘icitike na nzeru na ntendere’.—1 Akor. 14:39.