Kodi Munakwanisa Kuphedza Nyakumanga Banja Wakukhonda Khulupira?
1. Thangwi yanji Akristu anakhala m‘mabanja akuti mamuna peno nkazi ndi nyakukhonda khulupira nee ndiwo okhene anafuna kuphedza nzawo wa m‘banja kutawira undimomwene?
1 Kodi amwazi mphangwa anango m’mpingo wanu ali na mamuna peno nkazi wakukhonda kukhulupira? Khala ndi tenepo, mwakukhonda penula, amwazi mphangwa anewa asafuna kuti aphatane pabodzi na nzawo wa m‘banja mu ulambiri wandimomwene. Mbwenye nee ndiwo okhene anafuna pyenepi tayu. Ninga Mulungu, mpingo onsene usafuna kuti “anthu onsene apulumuke, adziwembo mapfundisiro adidi.” (1 Tim. 2:4) Kodi tinakwanisa tani kuphedza mamuna peno nkazi wakukhonda khulupira wa amwazi mphangwa a m’mpingo wathu?
2. Kodi udziwisi unatiphedza tani toera kuphedza nyakumanga banja wakukhonda khulupira?
2 Pakutoma, tisafunika kuyesera kuona pinthu m’maonero a munthu wakukhonda khulupira. Anyakumanga banja azinji akukhonda khulupira panango asafuna kakamwe banja yawo na asayesera kukhala mamuna peno nkazi wadidi pontho nyakubala wadidi. Panango iwo ali na pikhulupiro pyakusiyana na pyathu. Panango asadziwa pinthu pyakucepa thangwi ya Mboni za Yahova kusiyapo pidapangwa iwo na anthu akukhonda kudziwa pya Mboni za Yahova peno amanyerezero akuipa. Anango ali na citsuwo ca ndzidzi ukhakhala iwo pabodzi ninga banja wakuti cincino nyakukhulupira asauphatisira mu ulambiri. Udziwisi unadzatiphedza toera kutsalakana nyakukhonda khulupira mu njira yadidi na mwacilemedzo, mbiticalira kuipirwa tingakhala na iye.—Mis. 16:20-23.
3. Kodi ndi njira ipi yadidi toera kuwina nyakukhonda khulupira?
3 Pangizani Citsalakano: Njira yadidi toera kuwina nyakumanga banja wakukhonda khulupira ku ulambiri wandimomwene, makamaka pakutoma, panango ndi kubulukira ku macitiro athu, tayu mu kucedza pya m’Bhibhlya. (1 Ped. 3:1, 2) Cinthu cakufunika kakamwe ndi kupangiza citsalakano. Alongo m’mpingo anakwanisa kupangiza citsalakano kwa nkazi wakukhonda khulupira, na abale asafunikambo kucita pyenepi na mamuna wakukhonda khulupira. Anacita tani?
4. Kodi tinapangiza tani citsalakano?
4 Khala mudzati kudziwa mamuna peno nkazi wa m’bale peno mulongo Wacikristu, panango imwe musafunika pakutoma kubvunzisa mamunace peno nkazace. Lekani kuipirwa khala pakutoma nyakukhonda khulupira nkhabe kutawira mwadidi. Kupangiza kwathu uxamwali na citsalakano panango kunaacitisa kuona Mboni za Yahova mu njira yadidi. (Arom. 12:20) Akristu anango akukola mwauzimu asacemera nyakukhonda khulupira na banja yace toera kudya pabodzi. Asacita pyenepi na cifuno ca kundziwa mwadidi na kumalisa manyerezero onsene akuipa akuti panango ali nawo. Iwo asalonga pinthu pinakomerwa na nyakukhonda khulupira, mbuto mwakukakamiza kucedza pinthu pyauzimu. Mu kupita kwa ndzidzi, nyakukhonda khulupira angapibva kukhala wakusudzuka, panango anakwanisa kucedza pinthu pya Bhibhlya. Panango iye anatawira ncemerero toera kugumanika pa ubodzi wa misonkhano yathu toera kuona pinthu pinapfunza nkazace, makamaka nakuti iye asadziwa abale anango m’mpingo. Ngakhale kuti iye adzati kutoma kupfunza undimomwene, iye anakwanisa kusimbwa thangwi ya ciphedzo cinapereka iye kwa nzace wakukhulupira.
5. Kodi akulu a mpingo anakwanisa tani kuphedza nyakukhonda khulupira?
5 Makamaka akulu a mpingo asafunika kuphedza anyakumanga banja akukhonda khulupira na kusaka miyai yakupereka umboni. Nyakukhonda khulupira wakuti nee atawira kucedza pya Bhibhlya panango anakwanisa kubvesera ciwangiso cakubuluka m’Malemba angagumanika ku nyumba yaungumi peno angathimbana na nyatwa za ungumi. Pangaoneka nyatwa pa banja yakuti mamuna peno nkazi ndi wakukhonda khulupira, ninga kufa kwa munthu pa banja, akulu a mpingo anakwanisa kucemera nyakukhonda khulupira kuti akhale duzi munapereka iwo cithondozo kwa banja.
6. Kodi ndi mathangwi api ali na ife toera kuphedza anyakumanga banja akukhonda khulupira?
6 Nyerezerani kukomerwa kukulu kunakhala na Nkristu m’mpingo wathu nzace wa m’banja angatawira na kubwera mu undimomwene! Kukomerwa kweneko kusatsanzayisambo kakamwe Yahova, aanju na mpingo wonsene. (Luka 15:7, 10) Mbwenye, khala pakutoma nyakukhonda khulupira nkhabe tawira, tisafunika kupitiriza kukhala akukomerwa nakuti kuwangisira kwathu kusakomeresa Yahova, wakuti “hanafuna tayu kuti atayike munthu mbodzi, mbwenye kuti onsene achinyuke.”—2 Ped. 3:9.
[Ntsonga ikulu pa tsamba 6]
Njira yadidi toera kuwina nyakumanga banja wakukhonda khulupira ku ulambiri wandimomwene, makamaka pakutoma, panango ndi kubulukira ku macitiro athu, tayu mu kucedza pya m’Bhibhlya