Bokosi Ya Mibvunzo

◼ Kodi mpaka papi tisafunika kupfunza na nyakupfunza Bhibhlya wakuthambaruka?

Mphyadidi kupitiriza kupfunza na nyakupfunza Bhibhlya wakuthambaruka mpaka kumalisa mabukhu mawiri—Kodi Mwandimomwene Biblya Isapfunzisanji? na ‘Khalani mu Ufuni wa Mulungu.’ Pyenepi ndi pyakufunika ngakhale kuti nyakupfunza abatizwa mbadzati kumalisa mabukhu mawiri anewa. Angamala kubatizwa tinapitiriza kulemba ndzidzi unaphatisira ife toera kupfunza, maulendo akubwerezera na pfunziro. Khala m’mwazi mphangwa ali kutiperekera pontho mbaperekambo maonero ace pa pfunziro ineyi, iye anakwanisa kulemba ndzidzi unaphatisirwa pakupfunza.—Onani Nosso Ministério do Reino de Março de 2009, tsamba 2.

Mphyakufunika kuti anyakupfunza Bhibhlya akhale na cidziwiso cakukwana ca undimomwene mbitidzati kulimira kupfunza na iwo. Iwo asafunika kukhala na “michichi” mwa Kristu na kuwangisa cikhulupiro cawo, natenepa anadzapembera m’mayesero anafuna kudzathimbana na iwo. (Akol. 2:6, 7; 2 Tim. 3:12; 1 Ped. 5:8, 9) Mwakuthimizira, toera anyakupfunza anewa apfunzisembo anango mwakuphindulisa, iwo asafunika kuti “adziwembo mapfundisiro adidi.” (1 Tim. 2:4) Tingamalisa kupfunza mabukhu mawiri anewa pabodzi na anyakupfunza athu, ife tisaaphedza toera kufamba mu “njira ya kwenda ku moyo.”—Mat. 7:14.

Nyakupfunza mbadzati kubatizwa, akulu a mpingo asafunika kuona mwadidi khala nyakupfunza abvesesa mwadidi pipfunziso pyakutoma pya Bhibhlya na khala asapiphatisira mu umaso wace. Akulu a mpingo asafunika kucita mphole-mphole pa ndzidzi unacita iwo mibvunzo ya ubatizo na nyakupfunza wakuti nee amalisa kupfunza bukhu yakutoma. Khala nyakupfunza nee athema kubatizwa, akulu a mpingo asafunika kuonesesa kuti nyakupfunza unoyu atambire ciphedzo cakukwana toera akhale wakuthema kubatizwa ntsogolo.—Onani bukhu ya Organizados Para Fazer a Vontade de Jeová, matsamba 217-218.

[Ntsonga ikulu pa tsamba 2]

Mphyakufunika kuti anyakupfunza Bhibhlya akhale na cidziwiso cakukwana ca undimomwene