Marevista Athu Asacitwa Toera Kutundusa Anthu Azinji

1. Ndi mu njira ipi nsoka wa m’bandazi wakukhulupirika na wandzeru usasangizira mpostolo Paulu?

¹ Ninga mpostolo Paulu akhacinja njira yakumwaza mphangwa zadidi toera kuwina “anthu onsene,” nsoka wa m’bandazi wakukhulupirika na wandzeru usaphatisira marevista athu toera kufikira anthu a makhaliro akusiyana-siyana na apikhulupiro pyakusiyana-siyana. (1 Akor. 9:22, 23) Toera kuphatisira mwadidi A Sentinela na Despertai! pakutoma tisafunika kudziwa kuti marevista anewa alemberwa ani.

2. Revista Despertai! isacitirwa ani?

² Despertai!: Revista ineyi isacitwa na cifuno cakutundusa ntundu wa anthu ninga udalonga mpostolo Paulu pikhalonga iye na “anthu a ku Atena.” (Mach. 17:22) Anthu anewa nee akhadziwa makhaliro Acikristu mbwenye akhadziwa pinthu pyakucepa pya Malemba. Sawasawa, Despertai! isacitirwa anthu akuti ali na cidziwiso cakucepa ca Bhibhlya peno akuti nkhabe cidziwiso ca Bhibhlya. Panango iwo nkhabe kudziwa pipfundziso pya Akristu, panango nkhabe kunyindira relijiau, peno nkhabe kudziwa kuti Bhibhlya iri na uphungu wakuphata basa. Cifuno cakutoma ca Despertai! ndi cakupangiza pakweca anyakuleri kuti Mulungu wandimomwene alipo. Revista ineyi isacitwambo na cifuno cakuwangisa cikhulupiro ca anthu thangwi ya Bhibhlya na kuphedza anyakuleri toera kudziwa kuti Mboni za Yahova ndi zakusiyana na misoka inango ya mauphemberi.

3. A Sentinela ya anthu onsene na ya pfundziro isacitirwa ani?

³ A Sentinela: A Sentinela ya anthu onsene isacitirwa anthu akuti asalemedza Mulungu na Malemba. Iwo ali na cidziwiso cakucepa ca Bhibhlya mbwenye nkhabe kubvesesa mwadidi pinapfundzisa iyo. Anthu anewa ndi sawasawa na anthu adalonga mpostolo Paulu kuti iwo ‘asagopa Mulungu.’ (Mach. 13:14-16) A Sentinela ya pfundziro, makamaka isacitirwa Mboni za Yahova. Paulu akhadziwa kuti ale akhaleri matsamba ace akhadziwa Malemba, pontho akhalimbo na cidziwiso ca undimomwene. (1 Akor. 1:1, 2) Sawasawa, misolo inagumanika mu A Sentinela ya pfundziro, yalemberwa ale anagumanika pa misonkhano yathu, akuti asadziwa malongero na mafala a Mboni za Yahova.

4. Thangwi yanji tisafunika kudziwa mwadidi marevista anaphatisira ife m’basa ya m’munda?

⁴ Maseze tisagawira marevista, kazinji kene tisalonga pya revista ibodzi basi pakugawira. Natenepa, adziweni mwadidi marevista anewa. Buluka penepo, munadzakwanisa kuagawira mwadidi kwa ale anagumana imwe.