Bokosi Ya Mibvundzo

◼ Tisafunika Kucita Phembero Pakucitisa Pfundziro ya Bhibhlya pa Nsuwo wa Mwanaciro Nyumba?

Pana maphindu mazinji akutoma na kumalisa pfundziro ya Bhibhlya na phembero. Kubulukira mu phembero, tisaphemba Yahova toera atipase nzimu wace wakucena pakucedza kwathu. (Luka 11:13) Phembero isagomezera kwa nyakupfundza wathu kufunika kwa kupfundza Bhibhlya, pontho tisampfundzisambo kuti anaphembera tani. (Luka 6:40) Na thangwi ineyi, mphyadidi kutoma kucita phembero mwakucimbiza pingakwanisika. Natenepa, nakuti makhaliro ndi akusiyana, nyakucitisa pfundziro asafunika kuphatisira luso mu kutonga toera kucita phembero pakucita pfundziro ya Bhibhlya pa nsuwo wa mwanaciro nyumba.

Cinthu cibodzi cakufunika kakamwe toera kudinga ndi mbuto inacitirwa pfundziro. Khala pfundziro isacitwa pa mbuto yakuti nkhabe pinthu pyakudzudzumisa, munakwanisa kucita phembero yacigwagwa yakutoma na yakumalisa pa pfundziro yakukhazikika inacitwa pa nsuwo wa mwanaciro nyumba. Khala mbuto inacitira imwe pfundziro ndi yakudzudzumisa, anthu anadzumatirwa peno nyakupfundza nee anapibva mwadidi, pinakhala pyakuthema kudikhira mpaka kungumana mbuto yadidi. Mwakukhonda tsalakana mbuto inacitirwa pfundziro, tisafunika kuphatisira luso yadidi toera kuona ndzidzi wakutoma kucita phembero.—Onani Nosso Ministério do Reino wa Março de 2005, tsamba 4.