Citisani Mapfunziro A Biblya A Kuenda Kutsogolo Pa Nsuwo Na M’kuphatisira Ntokodzi
1 Mphyakukomeresa tani kutomesa pfunziro ya Biblya! Mbwenye, kugumana munthu wakufuna kupfunza Biblya ndi cinthu cakutoma basi. Cifuniro ca pfunziro ndi kuphedza munthu kuti akhale nyakupfunza wandimomwene wa Kristu. (Mat. 28:19, 20, Mphangwa Zadidi) Kodi ndi ninji cinafuna kutiphedza kukwanirisa cifuno ceneci?
2 Anthu Akudzudzumika: Anthu lero asapitiriza na kukhala akudzudzumika kakamwe. M’mbuto zinango, anthu akucepa basi panango angatawire kubvunga nzidzi wamumphu towera kupfunza Biblya. Towera kuphedza anthu anewa, tisawangiswa kutoma kucitisa mapfunziro a Biblya pa nsuwo peno m’kuphatisira ntokodzi. Pakutoma, mapfunziro anewa angakwanise kukhala acigwagwa na angakwanise kuphataniza kudinga malemba a Biblya akucepa basi m’kuphatisira ndima ibodzi peno ziwiri m’bukhu ninga iyi yakuti Biblya isapfunzisanji. Ndi kwakusimbika tani kuona amwazi mphangwa azinji cincino kucitisa mapfunziro a pa nsuwo na m’kuphatisira ntokodzi!
3 Kodi tisafunika kukomerwa na kupitiriza kucitisa pfunziro ya pa nsuwo kwenda na kwenda? Nkhabe. Maseze tisaphatisira luso towera tikhonde khala nzidzi uzinji pa nsuwo munatomesa ife kwene pfunziro, Nosso Ministério do Reino wa Maio de 1990, tsamba 8, walonga: “Pfunziro ingakhazikiswa, na mwanaciro nyumba angafuna kuenda kutsogolo, tingakwanise kubvunga nzidzi uzinji pa kucitisa pfunziro.” Pyenepi mphyakufunika. Mwacitsanzo: Mwana wakunenseka na njala angakwanise kupaswa ntsama yakucepa ya cakudya mpaka kufuna kwace kudya kuthimizirike. Mbwenye ife nee tinadikhira kumuona kukhala pontho na mphambvu zace zakukwana na kukula mwadidi angapaswa ntsama ineyi yakucepa m’nthanda zizinji. M’njira ibodzibodzi, nyakupfunza Biblya asafuna pfunziro yakukhazikika na yakukhonda phonya towera akule mbakhala nzakazi wakukola wa Mulungu.—Aheb. 5:13, 14.
4 Mapfunziro A Biblya Nnyumba: Ndi pyadidi kucitisa pfunziro pa mbuto yamwekha—nnyumba peno pa mbuto inango yakuthema. Pyenepi pinadzacitisa kuti kupfunza kukhale kwakukhonda nensa na pinadzaphedza nyakupfunza kubvesesa Mafala a Mulungu. (Mat. 13:23) Pyenepi pinacitisambo mpfunzisi kubveranisa mphangwa za pfunziro na pyakufuna pya nyakupfunza. Kusiyapo pyenepi, kukhala na nzidzi uzinji wa pfunziro kunadzacitisa kuti kudinga Mafala a Mulungu kukhale kwakukwana na kwakuwangisa cikhulupiro.—Arom. 10:17.
5 Kodi tinacita tani kuti pfunziro ya pa nsuwo itome kucitirwa nnyumba? Pakumala kucita mapfunziro mazinji acigwagwa, thangwi yanji nkhabe phemba kupfunza nzidzi wakuthimizirika na wakuthonyeka? Peno mungakwanise kuphatisira njira yakubisika m’kuphemba: “Kodi muna nzidzi lero towera tikhale pantsi na tidinge mphangwa izi pabodzi?” peno “Kodi lero musafuna kubvunga nzidzi ungasi towera kudinga mphangwa izi?” Kuwangisira kwanu kungakhonda bweresa maphindu adidi, pitirizani kucitisa mapfunziro acigwagwa a pa nsuwo. Pa nzidzi unango wakuthema, yeserani pontho kuphemba kuti pfunziro ya pa nsuwo icitirwe nnyumba.
6 Munapitiriza ife na kusaka anthu akufunisisa, mbatilekeni kuduwala cifuniro cathu ca kutomesa na kucitisa mapfunziro a Biblya. Cifuno cathu ndi ca kuphedza anthu a mitima yadidi kukhala anzakazi akuperekeka na akubatizwa a Yahova. Na iye atipase nkhombo munawangisira ife kupitiriza na basa yathu na cifuno ceneci.—2 Tim. 4:5.
[Study Questions]
1. Kodi ndi cipi cifuniro cathu pa kucitisa mapfunziro a Biblya?
2. Kodi mapfunziro a Biblya a pa nsuwo na akuphatisira ntokodzi ndi ninji, na thangwi yanji ndi akuphata basa?
3. Thangwi yanji tisafunika kuwangisira towera kuthimizira nzidzi unabvunga ife pa pfunziro ya pa nsuwo?
4. Kodi kucitisa pfunziro ya Biblya nnyumba kuna maphindu anji?
5. Kodi tinakwanisa tani kuti pfunziro ya pa nsuwo itome kucitirwa nnyumba?
6. Kodi tisafunika kucita basa yathu na cifuno canji, na maonero adadingwa m’nsolo uno anakwanisa tani kutiphedza towera kukwanirisa cifuno ceneci?