Bokosi Ya Mibvundzo

◼ Kodi m’mwazi mphangwa wankazi asafunika kuphimbira nsolo angaperekerwa na m’mwazi mphangwa wamamuna pakucitisa pfundziro ya Bhibhlya pa nsuwo wa mwanaciro nyumba?

Khala m’mwazi mphangwa wankazi asacitisa pfundziro ya Bhibhlya mwakukhonda phonya, peno acita masasanyiro toera kucitisa pfundziro mbaperekerwa na m’mwazi mphangwa wamamuna, iye asafunika kuphimbira nsolo wace. (1 Akor. 11:3-10) A Sentinela ya 15 de Julho de 2012, tsamba 27, yafokotoza: “Anewa asacita khundu ya masasanyiro akupfundzisa, akuti munthu anacitisa pfundziro ndiye anatsogolera. Pa cakucitika ninga ceneci, pfundziro isakhala khundu yakuthimizirika ya nsonkhano wa mpingo. Khala m’mwazi mphangwa wankazi wakubatizwa akucitisa pfundziro pabodzi na m’mwazi mphangwa wamamuna wakubatizwa, iye asafunika kuphimbira nsolo.” Njira ibodzi ene inaphatisirwambo khala iye abuluka pabodzi na m’mwazi mphangwa wamamuna wakukhonda kubatizwa. Pyenepi pisafunika kuphatisirwa khala pfundziro isacitwa n’nyumba, pa nsuwo wa mwanaciro nyumba, peno mbuto inango.

Mu njira inango, khala pfundziro ya Bhibhlya idzati kukhazikiswa pa nsuwo wa mwanaciro nyumba, mulongo nee asafunika kuphimbira nsolo khala ali na m’mwazi mphangwa wamamuna, ngakhale kuti cifuniro ca ulendo wakubwereza ndi cakutomesa pfundziro ya Bhibhlya peno kudinga nsolo ubodzi m’bukhu inaphatisirwa toera kucitisa pfundziro. Nakuti kazinji kene mapfundziro pa nsuwo wa mwanaciro nyumba asakhazikiswa mwapang’ono pang’ono, kubulukira mu kucita maulendo mazinji akubwereza, amwazi mphangwa anadzafunika kudinga makhaliro na kukhala akulinganira mu kuona kuti ndi ndzidzi upi unafunika iwo kuphimbira nsolo.