Phedzani Mwanaciro Nyumba Toera Kunyerezera
1. Kodi ndi njira ipi yakuti ndi yadidi kakamwe mu utumiki?
1 Kodi ndi njira ipi yakuphindulisa kakamwe mu utumiki—yakusumula peno yakuphedza mwanaciro nyumba toera kunyerezera na kufika pakudzindikira? Mpostolo Paulu anyerezera pabodzi na anyakubvera ace mudalonga iye kwa Ayuda mu Tesalonika, ninga maphindu akucita pyenepi “Ayuda pang’ono [akucepa] atawira.” (Mach. 17:2-4) Kusaphatanizanji kunyerezera pabodzi na anango?
2. Tinakwanisa tani kusangizira citsandzo ca Paulu pakumwaza mphangwa zadidi?
2 Lemedzani Mabvero na Makhaliro: Toera kuphedza anthu mu cisa canu kunyerezera, musafunika kulemedza mabvero awo. Paulu atoma nkhani yace na Agrego akukhonda khulupira a ku Areopago mu kulonga pinthu pikhadziwa iwo na pikhatawira iwo. (Mach. 17:22-31) Natenepa, pakukhunganya maperekero anu aumboni, dingani pikhulupiro pyakudziwika na kusiyanisa anthu kunacitwa mu cisa canu. (1 Akor. 9:19-22) Khala mwanaciro nyumba acita mbvundzo, yeserani kugumana maonero mabodzi ene, pontho phatisirani maonero anewa toera kucedza.
3. Tinakwanisa tani kuphatisira mibvundzo mwaluso toera kunyerezera na anango?
3 Phatisirani Mibvundzo Mwaluso: Nee tinakwanisa kupangiza mulendo njira toera kumphedza kufika ku mbuto inafuna iye kuenda khala ife nee tisadziwa kusagumanika iye cincino. Mu njira ibodzi ene, nee tinakwanisa kuphedza mwanaciro nyumba toera kufika pakudzindikira khala ife nee tisadziwa maonero ace acincino. Mbadzati kunyerezera na nyakubvesera, Yezu kazinji kene akhacita mibvundzo toera kudziwa pikhanyerezera munthu. Mwacitsandzo, munthu unango mudabvundza iye Yezu kuti, “ndichitenji towera ndikhale na moyo wakukhalirathu?,” Yezu asaka kudziwa maonero a munthu unoyu mbadzati kuntawira. (Luka 10:25-28) Pa ndzidzi unango, mudapereka Pedhro ntawiro wakudodomeka, mwaluso Yezu aphatisira mibvundzo toera kulungamisa manyerezero ace. (Mat. 17:24-26) Natenepa, khala mwanaciro nyumba acita mbvundzo peno alonga maonero akudodomeka, tinakwanisa kuphatisira mibvundzo toera kumphedza kunyerezera pa nkhani ineyi.
4. Thangwi yanji tisafunika kuphedza mwanaciro nyumba toera kunyerezera?
4 Tingaphedza mwanaciro nyumba toera kunyerezera, tisasangizira Mpfundzisi Wankulu, Yezu, pabodzi na amwazi mphangwa a pyaka dzana yakutoma. Ife tisatsalakana mwanaciro nyumba, pontho tisapangiza cilemedzo kwa iye. (1 Ped. 3:15) Ninga maphindu akucita pyenepi, mwanaciro nyumba anatitawirisa kucita ulendo wakubwerezera.