Kuthimizira Maluso Athu Mu Utumiki—Kutawira Ale Anatigwandira Mafala
Thangwi Yanji Mphyakufunika: Nyerezerani khala musadziwa kuti cidengwa cacibaliro ciri cifupi. Anthu angakhonda kuthawira pa mbuto yadidi anadzafa. Mwaenda kunyumba ya nyakuendekana wanu toera kuncenjeza, mbwenye iye akugwandirani mafala, mbalonga kuti aphatika kakamwe na basa. Mwandimomwene, imwe mbamudapitiriza kumphedza! Azinji mu cisa cathu nkhabe kutitambira, thangwi nee asadzindikira ntengo wa mphangwa zathu zakupulumusa umaso. Mu ndzidzi unafika ife panyumba pawo, panango ali akudzudzumika na pinango. (Mat. 24:37-39) Peno ali na maonero akuphonyeka thangwi ya mbiri zauthambi. (Mat. 11:18, 19) Panango asanyerezera kuti nee tasiyana na mauphemberi anabala misapo yakuipa. (2 Ped. 2:1, 2) Mwanaciro nyumba angakhonda pangiza cifuno, nee tisafunika kubuluka mwakucimbiza.