Kuthimizira Maluso Athu Mu Utumiki—Kutawira Mwanaciro Nyumba Wakuipirwa — BHIBHLIYOTEKA MU INTERNETI ya Torre de Vigia

Kuthimizira Maluso Athu Mu Utumiki—Kutawira Mwanaciro Nyumba Wakuipirwa

Thangwi Yanji Mphyakufunika: Anthu azinji anacedza na ife mu utumiki ndi acilemedzo. Mbwenye, Yezu alonga kuti anthu anango anadzatiida. (Jwau 17:14) Natenepa, ife nee tisafunika kudzudzumika tingagumana mwanaciro nyumba wakuipirwa. Tingagumana anthu anewa, tisafunika kuatawira munjira yakukomeresa ule anaimirira ife, Yahova. (Arom. 12:17-21; 1 Ped. 3:15) Kucita pyenepi kunadzaphedza toera kucalira kuketesana. Pontho pinadzapereka umboni kuna mwanaciro nyumba na anthu anango mbakhala na cifuno cakubvesera Mboni za Yahova pa ndzidzi unango.—2 Akor. 6:3.

Tinacita Tani Pyenepi:

• Khalani wakukhurudzika na wauxamwali. Pyenepi pinadzaphedza toera kucalira kuketesana. Lekani kutowezera kuipirwa kwa mwanaciro nyumba. (Koel. 7:9) Panango iye aipirwa thangwi ya nyatwa zace peno mwafika pa ndzidzi wakukhonda thema. Ngakhala aipirwa na mphangwa zathu, kazinji kene pyenepi pisacitika thangwi yakupeuswa.—2 Akor. 4:4.

• Tawirani mwakukhurudzika na mafala adidi. (Mis. 15:1) Kodi mwamulamusa pakugona peno mwangwandira pikhacita iye? Maseze nee tisaphemba kulekererwa thangwi ya basa yathu, mwakucepeseka, mphyadidi kuphemba kulekererwa thangwi yakufika pa ndzidzi wakukhonda thema. Aipirwa thangwi ya mphangwa zauthambi zidabva iye thangwi ya ife? Khala ndi tenepo, munakwanisa kulonga: “Ndisadziwa thangwi yanji mwatsukwala na pyenepi. Mbwenye pidabva imwe thangwi ya ife si pyandimomwene tayu. Thangwi yanji ndikulonga tepo?” Kodi iye asakhonda pinango mwa pikhulupiro pyathu, ninga kubuluswa m’mpingo peno kuikhwa ciropa? Panango munakwanisa kulonga: “Ndisadziwa. Anango akhalongambo tenepo. Tinakwanisa kuona pabodzi kuti Bhibhlya isalonganji thangwi ya cipfundziso ceneci?”

• Khala munthu aipirwa kakamwe, mphyadidi kubuluka mbamukhonda kuntawira. Iye angaphemba kuti Mboni za Yahova zikhonde kubwera pontho panyumba pace, mpangeni kuti cifuno cace cinacitwa.

Yeserani Kucita Ipi Nkati Mwa Nthanda:

• Yeserani makhundu anewa nkati mwa kulambira kwanu kwa banja.

• Mungabuluka pa nyumba ya mwanaciro nyumba wakuipirwa, bvundzani ndzanu ali na imwe kuti mbamudatawira tani mwanaciro nyumba munjira yadidi.