Ndi Api Maonekero a Mabukhu Anu?

Unoyu ndi mbvundzo wadidi toera kucita thangwi ya mabukhu onsene anafuna ife kugawira. Bukhu yonsene yakuti iri na matsamba akufunyika-funyika, akuphingizika, akumala kupswipiswa peno akupanduka-panduka, nkhabe kudzapangiza mwadidi gulu yathu, pontho anadzadzudzumisa mwanaciro nyumba kukhonda kuona kubalika kwa mphangwa zakupulumusa umaso za mabukhu athu.

Tinakwanisa tani kucitisa mabukhu athu akhale akucena? Azinji asaona kuti ndi pyakuphindulisa kukhunganya pasta yawo ya basa ya m’munda mbaikha mabukhu a ntundu ubodzi ene pabodzi. Mwacitsandzo, asakhunganya m’mapasta mwawo mbuto yakuikha mabukhu, marevista na mabruxura, mbuto inango toera kuikha matsamba na pinthu pinango. Ndzidzi onsene asaikha mwadidi mu pasta yawo Bhibhlya na mabukhu anango, mu kucita tenepa iwo asacalira kupandula mabukhu. Amwazi mphangwa anango asakoya mabukhu awo m’maenvelopi makulu peno m’mapasta a uliyadu wadidi. Mwakukhonda tsalakana njira inaphatisira ife, nee tisafuna kupasa mathangwi toera kupwaza utumiki wathu mu kupasa munthu mabukhu akupanduka.—2 Akor. 6:3.