Bokosi Ya Mibvundzo
◼ Ninji cinafuna kutiphedza kutonga toera kupasa munthu mabukhu?
Cinthu cakufunika kakamwe ndi kudinga cifuno ca munthu. Khala munthu apangiza cifuno candimomwene, tinakwanisa kumpasa marevista mawiri, bruxura, bukhu, peno mabukhu anango anagawira ife. Pyenepi pisacitika ngakhale tingaona kuti munthu ali na kobiri yakucepa peno nkhabe kobiri yakucita cakupereka toera kuphedzera basa ya dziko yonsene yapantsi. (Yobe 34:19; Apok. 22:17) Mu njira inango, nee tisafunika kusiya mabukhu athu akufunika kuna anthu akuti nee asaapasa ntengo.—Mat. 7:6.
Mwanaciro nyumba asapangiza tani cifuno? Kufunisisa kwace toera kucedza na ife ndi cidzindikiro cadidi cakuti iye ali na cifuno. Kubvesera mwadidi pinalonga ife, kutawira mibvundzo, na kulonga maonero ace pisapangiza kucita kwace khundu m’makani. Kutowerera munaleri ife Bhibhlya pisapangiza cilemedzo ku Mafala a Mulungu. Kazinji kene, ndi pyakuphedza kakamwe kumbvundza khala analeri mabukhu anafuna kusiyirwa iye. Amwazi mphangwa asafunika kuphatisira luso yadidi toera kudzindikira cifuno ca munthu. Mwacitsandzo, pakupereka umboni mu nseu, nee pinakhala pyadidi kugawira marevista, mabruxura, peno mabukhu kuna anthu onsene anagwanda cifupi na ife. Khala nee tinakwanisa kudzindikira cifuno ca munthu, pinakhala pyadidi kumpasa ncemerero peno katsamba.
Mu njira ibodzi ene, ntsama ya mabukhu inakwata m’mwazi mphangwa m’mpingo isafunika kukhala ntsama inafuna kugawira iye mu utumiki, tayu thangwi ya kobiri inapereka iye. Pyakupereka nee pisacitwa toera kulipa mabukhu, mbwenye toera kuphedzera makhundu onsene a basa yathu yakumwaza mphangwa mu dziko yonsene yapantsi. Mwakukhonda tsalakana mpfuma zathu, kupereka takhuta kunatikulumiza toera kupasa mwakudzala manja ntengo unakwanisa ife, toera kuphedza pifuno pya Umambo. (Mko. 12:41-44; 2 Akor. 9:7) Pontho tisafunika kukwata basi ene mabukhu anafuna ife kuphatisira, tayu kubvunga mpfuma za Umambo.
[Ntsonga ikulu pa tsamba 2]
Amwazi mphangwa asafunika kuphatisira luso yadidi toera kudzindikira cifuno ca munthu