Mbeu Zisafunika Kuthirirwa Toera Zikule
1. Ninji cisafunika kuthirirwa toera kukula?
1 Mbeu zingabzwalwa m’munda zisafunika kuthirirwa toera zikule. Ndi sawasawa na mbeu za undimomwene zinabzwalwa m’mitima ya anthu mu cisa cathu. (1 Akor. 3:6) Khala tisafuna kuti mbeu zidabzwala ife zikhale na mitcitci, zimere, pontho zikule tisafunika kuthirira mbeu zenezi zakuphipirisa peno kucita maulendo akubwereza mu kuphatisira Mafala a Mulungu.
2. Tinaphedza tani mwanaciro nyumba kukhala wakufunisisa kudziwa pinafuna kudingwa paulendo wakubwereza?
2 Citani Mbvundzo: Pakukhunganya maperekero anu aumboni, thangwi yanji nkhabe kukhunganyambo mbvundzo wakutundusa anthu wakuti munadzautawira paulendo wakubwereza? Pakumalisa makani a ulendo wakutoma citani mbvundzo unoyu, pontho citani masasanyiro toera kubwerera. Azinji asaona kukhala pyakuphindulisa kusankhula ntsonga za m’bukhu Biblya Isapfunzisanji toera kupangiza kuti pfundziro ya Bhibhlya isacitwa tani.
3. Ndi mphangwa zipi zinafuna kuphatanizwa pakulemba pidacitika paulendo wakutoma?
3 Lembani: Mungamala kwene kumwaza mphangwa paulendo wakutoma, lembani pinthu pyonsene pidalonga imwe. Lembani dzina yace na cisa cinakhala iye. Pinakhala pyadidi kulemba ntsiku na ndzidzi udacedza imwe, ninji pidalonga imwe na bukhu idagawira imwe. Iye alonga kuti asaphembera? Ndi wakumanga banja? Alonga pinthu pinafuna iye na pinandzudzumisa? Mphangwa zenezi zinadzakuphedzani toera kulonga pinthu pyakufunika kwa iye pakucita ulendo wakubwereza. Lembani pontho ntsiku idabverana imwe toera kubwerera na mbvundzo unafuna imwe kudzatawira.
4. Thangwi yanji tisafunika kupirira pakubwerera toera kulonga na munthu adapangiza cifuno?
4 Pirirani: Sathani nee anadzapuma mu kuwangisira kwace toera “kubulusa mafala” adabzwalwa mu ntima mwa munthu. (Mko. 4:14, 15) Natenepa, lekani kubwerera nduli mungathimbana na cinentso cakukhonda kugumana munthu adapangiza cifuno pakucita ulendo wakubwereza. Munakwanisa kumulembera tsamba peno kusiya cidzindikiro pa nyumba? Mpainiya m’bodzi atomesa pfundziro pa nsuwo na nkazi unango mbwenye nee akhangumana pa nyumba, natenepa iye atumiza tsamba. Ntsiku inango mulongo agumana nkazi unoyu pa nyumba yace, nkazi unoyu alonga kuti akhuyiwa kakamwe thangwi ya citsalakano cidapangizwa kwa iye. Tingathirira mbeu za undimomwene, tinakhala na kutsandzaya mu kuona undimomwene kumera, kukula, na ‘kubala misapo, anango makumatatu, anango makumatanthatu, anangombo dzana.’—Mko. 4:20.