Khalani Akucenjera Mu Utumiki
1. Thangwi yanji tisafunika kukhala akucenjera mu utumiki?
1 ‘Ninga mabira pakati pa mabindzi,’ atumiki a Mulungu asamwaza mphangwa ‘pakati pa anthu akuipa na akunyozeka.’ (Mat. 10:16; Afil. 2:15) Mphangwa zakugopswa za uviyaviya wa ndale, kunjipa kwa uphanga, na kunbvinbviniswa kwa anthu kunaoneka konsene kwene, kusapangiza kuti anthu akuipa akuthimizira “kuipa kwawo.” (2 Tim. 3:13) Ndi midida ipi ya Malemba yakuti tinakwanisa kuiphatisira toera kutiphedza ‘kukhala akucenjera mu utumiki?’—Mat. 10:16.
2. Ndi makhaliro api akuti anaticitisa kusiya cisa mbitienda kamwaza mphangwa ku cisa cinango?
2 Phatani Basa Mwandzeru: Lemba ya Misangani 22:3 isagomezera kuti ‘tisafunika kubisala’ pakuona pyakugopswa. Khalani wakucenjera! Kazinji kene makhaliro adidi a pacisa anakwanisa kucinja mwakukhonda dikhira. Panango munakwanisa kuona kuthimizirika kwa mabasa a apolixa peno uviyaviya mu nseu. M’midzidzi inango, mwanaciro nyumba wa ntima wadidi anakwanisa kukucenjezani. Mbuto mwakufunisisa kudziwa pinacitika, ndi kwandzeru kubuluka mwakucimbiza mbamupitiriza kumwaza mphangwa ku mbuto inango.—Mis. 17:14; Jwau 8:59; 1 Ates. 4:11.
3. Kodi n’dida unagumanika pa Koelete 4:9 unaphatisirwa tani mu utumiki wathu?
3 Phatani Basa Pabodzi: Lemba ya Koelete 4:9 isalonga “mphyadidi kukhala anthu awiri, kupita kukhala munthu ekhene.” Ngakhale kuti panango mwadzolowerera kuphata basa mwekhene mu utumiki, musaona kuti ndi pyakuthema kucita pyenepi cincino? M’mbuto zinango ndi pyakuthema. Mbwenye m’mbuto zinango nee ndi kwakuthema mulongo, mphale peno ntsikana kumwaza mphangwa nyumba na nyumba ekhene, makamaka ncidodo. Pyakucitika pisapangiza kuti mphyadidi kuphata basa awiri. (Koel. 4:10, 12) Munthu onsene anamwaza mphangwa pabodzi na nsoka asafunika kutsalakana citsidzikizo ca anango. Mungamwaza mphangwa pabodzi na anango, adziwiseni khala musafuna kusiya cisa.
4. Tinakwanisa tani kutsalakana citsidzikizo ca onsene m’mpingo pakumwaza mphangwa?
4 Ninga anthu ‘anaonera umaso wathu’, akulu a mpingo ali na basa toera kupereka citsogolero cakuphata basa mwakubverana na makhaliro a cisa. (Aheb. 13:17) Tingapitiriza kupangiza kucepeseka Kwacikristu na kubvera akulu a mpingo, Yahova anadzatipasa nkhombo. (Mik. 6:8; 1 Akor. 10:12) Tisanyindira kuti atumiki onsene a Mulungu anadzacita khundu mukupereka umboni wamphambvu mu cisa cathu, mbwenye ndzidzi onsene mbakhala akucenjera.